Әһли Бејт -АБНА- хәбәр аҝентлијинин вердији хәбәрә әсасән Алманија телевизијалары артыг бир нечә мүддәтдир ки, “Еуровисион” әрәфәсиндә Азәрбајҹан һакимијјәтинин өлкәдә һәјата кечирдији репрессија, мүлкијјәт вә инсан һагларынын позулмасы илә бағлы ҝениш репортажлар һазырлајараг, дүнја иҹтимаијјәтинә тәгдим едиб. Артыг баш верәнләрлә бағлы Алманијанын Азәрбајҹандакы сәфиринин Хариҹи Ишләр Назирлијинә чағырылараг хәбәрдарлыг едилдији билдирилир. Бәс Азәрбајҹан һакимијјәти Алманијаја гаршы бу ҹүр адекват аддымлар атмагла Еуровисион габағы өз имиҹи илә бағлы нәјәсә наил ола биләҹәкми?
Мөвзу илә бағлы faktxeber.com-а ачыглама верән “Шәрг-Гәрб” Арашдырмалар Мәркәзинин рәһбәри Әрсәтун Оруҹлу, һакимијјәтин атдығы аддымлары гејри-адекват вә паранојал реаксија олдуғуну билдирди. “Өлкә мәтбуатында, хүсусилә һакимијјәтин нәзарәтиндә олан “Јени Азәрбајҹан” гәзетиндә Алманија һаггында чох ағласығмаз иттиһамларла долу мәгаләләр чап едилиб. Бәзи вахтлар бу иттиһамлар ҝүлүш доғурур.”
Һакимијјәт јөнлү гәзетләрин Азәрбајҹанда олан ејбәҹәрликләри Алманијанын адына јаздығыны гејд едән Әрәстун бәј, “һесаб едирәм ки, бу ҹүр тәблиғатлар Азәрбајҹан үчүн нә башуҹалығы ҝәтирәҹәк, нә дә ки, өлкәнин хариҹи әлагәләринә хидмәт ҝөстәрәҹәк”,-дејә билдирди: “Әҝәр Азәрбајҹан мүвафиг бејнәлхалг гурумлар вә тәшкилатлар гарышында инсан һагларынын бәрпа едилмәси илә бағлы һансыса өһдәликләр ҝөтүрүбсә, бу өһдәликләрә риајәт етмәлидир. Јох әҝәр өлкәдә инсанлар мүхтәлиф бәһанәләрлә шәрләнәрәк һәбс едилирләрсә, буна демократија вә Авропа дәјәрләринә әмәл етмәк јох, ријакарлыг дејирләр.”
Мүсаһиб сонра гејд етди ки, Алманија тәрәфиндән Азәрбајҹана гаршы апарылан кампанијаны тәзјиг кими гәбул етмәк лазым дејил: “Садәҹә олараг Азәрбајҹан тәрәфи сәсләндирилән тәнгидләри, бу ҹүр ријакар сијасәтдән имтина едиб, һәгиги дәјәрләрә сәдагәтини вә үзәринә ҝөтүрдүјү өһдәликләри әмәл етмәјә олан чағырыш кими гәбул етмәлидир. Һакимијјәт тәрәфиндән Алманијаја гаршы верилән реаксија нәинки адекват, әслиндә гејри-адекват вә чох паранојал бир реаксијадыр. Мүасир Алман дөвләтини фашизимлә мүгајисә етмәк, һеч бир јерә сығмыр. Фашизм вә Һитлер симпатизанларыны мүасир демократик Алманијада јох, Сталин-Брежнев төр-төкүнтүләринин дүшәрҝәсиндә ахтармаг даһа да мәгсәдәујғун оларды”.
“Алманијанын бу ишләри ҝөрмәкдә марағы нәдир” суалына да ајдынлыг ҝәтирән Әрәстун Оруҹлу, буну Алманијанын Азәрбајҹана јатыртдығыны инвестисија илә әлагәдар олдуғуну билдирди: “Алманија Авропанын апарыҹы дөвләти олараг, Азәрбајҹанла ҝениш әлагәләри олан бир өлкәдир. Азәрбајҹанын Алманија илә иллик тиҹари дөвријјәсинин мигдары 2 милјард доллар һәҹминдәдир. Заман-заман Азәрбајҹана тәһким олунан алман инвестисијалары тәһлүкә илә үзләшир. Бу ҝүнә гәдәр Алманија Азәрбајҹанда баш верәнләрә ән лојал мүнасибәт ҝөстәрән өлкәләрдән бири иди. Алманијалы бизнесменләр вә иш адамлары дәфәләрлә Азәрбајҹандакы мүлкијјәтләри таланараг әлләриндән алыныб. Ҝөрүнүр, Алманијанын сәбри түкәниб вә истәмир ки, онун саһибкары вә бизнесменләри илә бу ҹүр рәфтар олунсун.”
Хәјал Шүкүр
Диггәт: Хәбәрдән истифадә етдикдә мәнбәјә истинад лазымдыр
