Әһли Бејт -АБНА- хәбәр аҝентлијинин вердији хәбәрә әсасән бу ҝүн “Хоҹалы” сојгырымынын ил дөнүмү илә әлагәдар Азәрбајҹан Ислам Партијасы конфранс кечириб. Конфрансда өлкәнин танынмыш иҹтимаијјәт вә медиа нүмајәндәләри иштирак едиб. Илкин олараг тәдбири ҝириш сөзү илә ачан АИП-ин мәтбуат хидмәтинин рәһбәри Ҹавид Ҹаббарлы Хоҹалы фаҹиәси һаггында мәлумат верәрәк, бу һадисәнинин дүнја иҹтимаијјәтинә чатдырылма јолларынын мүәјјән едилмәсинин зәрури олдуғуну билдирди.
Сонра чыхыш үчүн сөз Азәрбајҹан Зијалылар Бирлијинин сәдри Елдәниз Гулијевә верилди. Елдәниз мүәллим гејд етди ки, Хоҹалы фаҹиәси Азәрбајҹан халгынын тарихинә ганлы һәрфләрлә јазылмыш ән дәһшәтли фаҹиәдир. “Хоҹалы сојгырымы заманы ган ичән ермәниләр һәтта гадынларын сачындан асылмасы кими ишҝәнҹәләрә әл атыблар. Мән шәхсән гадынларын асылдығы ағаҹлардан бирини ҝөрәндә, онун үзәриндә һәлә дә, гадын сачлары дурурду.”
Фаҹиәнин дүнја иҹтимаијјәтинин чатдырылмасы илә бағлы кифајәт гәдәр тәдбирләрин кечирилдијини гејд едән Елдәниз Гулијев, “лакин кечирилән тәдбирләр бу һадисәнин чатыдырлмасы үчүн кифајәт дејил. Диҝәр мүһүм ишләрдә ҝөрүлмәлидир. Тәдбир чохдур, лакин нәтиҹә јохдур”, - дејә билдирди.
“Бу ҝүнә гәдәр фаҹиәнин сәбәбкарлары илә бағлы ачыг-ашкар һеч нә дејилмир. Мәлум олдуғу кими Хоҹалы фаҹиәсинин 4 сәбәби вар. Рус, ермәни ордусу, өзүмүзүн лагејидлији вә гышын шахтасы. Лакин әсл ҹинајәткарлар һагында һеч нә дејилмир. Горхурам ки, бу һадисәләр бизи онлара охшатсын. Һадисәнин ҝүнаһкарлары һазырда һәм өлкәмиздә, һәм Русијада, һәм дә ки, Ермәнистанда јүксәк рәсми вәзифәләрдә чалышырлар. Хоҹалы фаҹиәси илә бағлы мәгсәдјөнлү вә ҹидди ишләр ҝөрүлмәсә, һеч бир нәтиҹә әлдә едә билмәјәҹәјик.”
Тәдбирдә иштирак едән ВИП рәһбәри Әли Әлијев, Хоҹалы фаҹиәсинин бејнәлхалг сијасәтин нәтиҹәси олараг баш вердијини билдирди. “Ејни һалда бу ҝүнә гәдәр милли дөвләт формалашдыра билмәмәјимиз, бу фаҹиәнин танынмамасына сәбәб олуб. Биз емосионал бир халгыг. Анҹаг һадисәнин вахты ҝәләндән-ҝәләнә тәсирләнирик. Фаҹиәни төрәдән шәхсләрин ҹәзаландырылмасы үчүн милли вә бејнәлхалг һүгугдан истифадә етмәлијик. Дүзҝүн сијаси һакимијјәтин формалашдырылмасына јарадылан маниәләрин нәтиҹәсидир ки, бу ҝүнә гәдәр ермәниләрин ҹавабы верилмәјиб. Гоҹалар, гадынлар вә ушагларымызын мејјитләрини бизә тәһвил верән бир милләтин мүтләгдир ки, ҹавабы верилмәлидир.”
АИП-ын сәдр әвәзи Елчин Манафова чыхышы заманы билдирди ки, бу фаҹиә јаддан чыхмамалыдыр. “Фаҹиә илә бағлы ҝөрүлән ишләр олдугҹа аздыр. Јалныз илдә бир дәфә һадисә гејд олунур. “Еуровисион” а бу гәдәр һазырлылгарын ҝөрүлдүјү һалда нәјә ҝөрә, Хоҹалы илә бағлы ишләр ҝөрүлмәсин. Артыг фаҹиәнин үзәриндән 20 иллик бир мүддәт кечмәсинә бахмајараг, һәлә дә һәр һансы бир ҹидди ирәлиләјиш һисс олунмур.”
Конфранс иштиракчыларындан “Бирлик” тәшкилатынын сәдри Вүсал Һәтәмов исә билдирди ки, 20 ил бундан өнҹә физики мәғлуб едилмәјимизә бахмајараг, бу ҝүндә һәмин мәғлубијјәтин давамы кими информасија саһәсиндә дә мәғлубијјәтә дүчар олуруг. “Кифајәт гәдәр нефт ҝәлирләринә малик бир өлкә үчүн информасија саһәсиндә мәғлуб олмаг гәбул едилмәздир. Хоҹалы сојгырымы ҝүнү ермәни информасија аҝентликәри Хоҹалыда өлән һәмвәтәнләримизи өз шәһидләри кими тәгдим едирләр. Бизим тәгдим етдијимиз фотолары исә Сербијада өлдүрүлән мүсәлманлар кими дүнја иҹтимаијјәтинә чатдырырлар. Артыг дүнјада онларын јаланларына инаныб. Хоҹалы фаҹиәси илә бағлы өлкәдә апарылан тәблиғат кампанијасы олдугҹа ашағы сәвијјәдәдир. Нә 20 јанвар һадисәси, нә дә ки, Хоҹалы фаҹиәси илә бағлы күчәләрдә бир дәнә дә олсун реклам јерләшдирилмир. Лакин фаҹиәнин ил дөнүмү әрәфәсиндә консерт вермәк истәјән бәзи шоу-бизнес нүмајәндәләринин афишалары реклам олунур.”
Сонда чыхыш едән АИП сәдринин сијаси мәсәләләр үзрә мүавини Акиф Һејдәрли, Хоҹалы һадисәсинин мүһарибәнин нәтиҹәси олараг баш вермәдијини билдирди. “Бу һадисә бир халга вә милләтә гаршы сојгырым акты кими төрәдилиб. Әҝәр һәмин дөврдә Хоҹалы јох, Бакы вә ја бүтөв Азәрбајҹан ермәниләрин мүһасирәсиндә олсајды, онлар бүтүн халга гаршы бу фаҹиәни төрәдәрдиләр.Бир нечә ил бундан әввәл олдуғу кими, һазырда да бәзи мүғәнниләр Хоҹалы сојгырымынын ил дөнүмүндә Исраилә вә Санкт-Петербурга маһны охумаға ҝедәҹәкләр. Диҝәр тәрәфдән сојгырымын ил дөнүмүндә Азәрбајҹанлы рәсмиләрин Ермәнистана ҝетмәси чох аҹынаҹаглы һалдыр. Баш верәнләри нәзәр алдыгда, бу фаҹиәнин дүнја иҹтимаијјәтинә чатдырмаг олдугҹа чәтиндир. Дүшмәнләримизи биз өз ичимиздә ахтарараг, Ирагда, Әфганыстанда вә Фәләстиндә сојгырым һәјата кечирән АБШ вә Исраилдән мәсәләјә һүгуги гијмәт вермәсини истәјирик. Бир һалда ки, өлкәнин ән јүксәк гуруму олан Милли Мәҹлисдә бу ҝүнә гәдәр Ермәни сојгырымы илә бағлы һәр һансы бир ганун лајиһәси гәбул олунмајыбса, дүнја иҹтимаијјәтиндән һәр һансы бир шеј ҝөзләмәјимиз јерсиздир.”
Хәјал Шүкүр
Диггәт: Хәбәрдән истифадә етдикдә мәнбәјә истинад лазымдыр
