Әһли Бејт -АБНА- хәбәр аҝентлијинин вердији хәбәрә әсасән февралын бири Јазычы Рүстәм Ибраһимбәјовун евиндә кечирилән форумун топлантысы Азәрбајҹан ҝәнҹләринин проблемләринә һәср олунуб.
Тәдбири ачан Рүстәм Ибраһимбәјов дејиб ки, 150 иллик һүгуг тарихи олан өлкәдә топланты кечирмәк үчүн, нәһајәт, бир јер тапмаг мүмкүн олуб. О тәклиф едиб ки, ҝәнҹләрин мөвҹуд проблемләринин арашдырылмасы мәгсәдилә јығынҹаг ачыг мүзакирәләр формасында кечирилсин.
Профессор Ҹәмил Һәсәнли дејиб ки, форумда ҝәнҹләрин проблемләрини мүзакирә етмәји чохдан арзулајыблар. Лакин бу мүмкүн олмајыб: “Ҝөрүнүр, ҝеҹикмәдә дә бир позитивлик вар. Тәдбиримиз ҝеҹикди вә 2 феврал Ҝәнҹләр Ҝүнү әрәфәсинә тәсадүф етди. Өлкәнин ҝәләҹәјиндә вә талејиндә јахындан иштирак етмәк вә она биҝанә олмамаг үчүн сај мәсәләси аз рол ојнајыр. Әсас бу ишдә иштирак едәнләрин чәкисидир”.
Ҹәмил Һәсәнли гејд едиб ки, һазырда өлкәдә олан проблемләр арасында ҝәнҹләрин гаршылашдығы чәтинликләр хүсуси әһәмијјәт кәсб едир: “Азәрбајҹанын ҝәләҹәји ҝәнҹләрин интеллектуал сәвијјәсиндән, тәһсилиндән, дүнјада баш верән просесләрдән чыхыш јоллары тапмасындан, вәтәнчилик һиссләринин сәвијјәсиндән асылыдыр.
Азәрбајҹанда ишсизләрин бөјүк бир һиссәси ҝәнҹләрдир. Али тәһсил алмаг истәјәнләрин сајы илдән-илә азалыр. Вәзијјәт белә давам етсә, ҝәләҹәкдә даһа да азалаҹаг. Дөвләт һесабына хариҹдә тәһсил алан ҝәнҹләр өлкәјә дөндүкдән сонра онларын ишлә тәминатына проблемләр јарадылыр. Бәзән бу ҝәнҹләрә ишләдикләри дөвләт мүәссисәләриндә дахили әнәнәјә ујғун олараг ганунсуз мааш - пул зәрфләри тәклиф едилир. Онлар да өлкәдә үзләшдикләри вәзијјәтә ҝөрә хариҹә ҝетмәк мәҹбуријјәтиндә галырлар. Дөвләт тәһсил алмаг үчүн ҝәнҹләри хариҹә ҝөндәрмәк һагда програм һәјата кечирир. Амма бүтүн ҝәнҹләр бундан јарарлана билмир. Мүвафиг органлар хариҹә ҝетмәк истәјән ҝәнҹләр, онларын аиләләри, јахынлары һагда ҝениш арашдырма апарыр. Әҝәр киминсә өзү, валидејни, јахын гоһуму сијаси вә сосиал ҹәһәтдән активдирсә, просесләрдә иштирак едирсә, белә ҝәнҹләрин хариҹә јолу бағланыр”.
Јазычысы Әкрәм Әјлисли дејиб ки, ҝәнҹләри сијаси бахымдан ики һиссәјә бөлмәк Азәрбајҹан ҹәмијјәтиндә парчаланмаја сәбәб олаҹаг: “Әрәб өлкәләриндә ингилаблар ҝәнҹләрин үзләшдији проблемләрдән башланды. Ҝәнҹләр хариҹи өлкәләрдә тәһсил алыб гајытдылар вә ҝөрдүләр ки, һәр шеј бир групун әлиндә ҹәмләшиб. Бу вәзијјәт ҝәнҹләрә башга јол гојмады вә күчәләрә чыхдылар. Инди Азәрбајҹанда да бу просес чох сүрәтлә ҝедир”.
Әкрәм Әјлисли һесаб едир ки, Русијада баш галдыран демократикләшмә Азәрбајҹана да тәсир едәҹәк: “Биздә дә бир чох јатмышлар ојанаҹаг. Анҹаг һәр шејдән әввәл халгы дирчәлтмәк лазымдыр. Дирчәлмиш халг өзүнә јол тапаҹаг. Биздә үмуммилли, руһи, үрәкдән ҝәлән дирчәлмә јохдур. Бәзән дејирләр ки, Зијалылар Форумунда зијалы јохдур, бизим һансыса иддаларымыз вар, инкишафы ҝөрмүрүк. Бунлар тамамилә јанлыш фикирләрдир. Бурада отуранлардан һеч ким Азәрбајҹанын динамик инкишафына, јәгин ки, шүбһә етмир. Анҹаг Азәрбајҹанда инкишаф һормоник ҝетмир. Зијалылары јандыран будур. Австралијадан кактусу ҝәтириб булварда әкирләр, амма инсанларын мин бир дәрдинә әлаҹ ахтаран јохдур”.
Профессор Рафиг Әлијев чыхышында ҝәнҹләрин проблемләринин һәллинин ваҹиблијини вурғулајыб: “Ҝәнҹлик сабаһла јанашы, бөјүк ресурсдур. Нә нефт, нә газ, нә дә пул бөјүк ресурсдур. Ән бөјүк ресурс ҝәнҹликдир. Биз ҝәнҹлијә парчаланмыш вәтән мирас гојуруг. Амма бу о демәк дејил ки, бүтүн мәсулијјәти ҝәнҹләрин үзәринә атырыг. Ҝәнҹләр бизим потенсиалдан да истифадә етмәлидирләр”.
Јазычы Меһрибан Вәзир дејиб ки, форумда сәсләнән фикирләр һәјәҹан тәбилидир: “Каш бу өлкәни идарә едәнләр бизим ҝөз јашларымызы ҝөрәјдиләр. Ҝәнҹликлә бағлы дурум һәгигәтән аҹынаҹаглыдыр. Амма гадынларын вәзијјәти дә ағырдыр. Гадынларын дөвләт идарәчилијиндә, мүлкијјәтдә һеч бир пајы јохдур. Она ҝөрә дә нөвбәти форуму гадынларын проблеминә һәср етмәк јахшы олар”.
Рүстәм Ибраһимбәјов диггәти ушагларын проблеминә јөнәлдиб. О дејиб ки, дөвләт бүдҹәсиндән ушагларын проблемләри үчүн вәсаит ајрылмалыдыр: “Ушаглары мәктәбдә рүшвәтхор кими бөјүдүрләр. Онларын вәтәндаш кими формалашмасы, ҝәләҹәји неҹә олаҹаг?”
Диггәт: Хәбәрдән истифадә етдикдә мәнбәјә истинад лазымдыр
