Јанварын 19-да Милли Тәһлүкәсизлик Назирлији Бакыда террорун гаршысыны алдығыны бәјан етди. Назирлијин мәлуматына ҝөрә, террорчулар Бакы јәһуди мәктәбинин мүәллимләринә гаршы суи-гәсд һазырлајырмыш. Әмәлијјат нәтиҹәсиндә Азәрбајҹан вәтәндашлары Әлијев Расим Фәраил оғлу вә Һүсејнов Әли Әлиһәмзә оғлу јахаланыб. Мәлуматда террор ишиндә әввәлләр бандитизм, адам оғурлуғу, гулдурлуг кими хүсусилә ағыр ҹинајәтләр төрәтдијинә ҝөрә барәсиндә ахтарыш елан едилмиш, Иранын хүсуси хидмәт органлары илә әлагәдә олан вә һазырда Иранын Әрдәбил шәһәриндә јашајан Балагардаш Дадашовун ады һалланыр.
Б.Дадашов 2011-ҹи илин августунда Әрдәбилдәки мәнзилиндә гајны Расим Әлијевлә ҝөрүш заманы сонунҹуја Бакыда хариҹи өлкә вәтәндашлары олан иҹтимаи хадимләри өлдүрмәји сифариш едиб вә бунун мүгабилиндә она 150 мин доллар верәҹәјини вәд едиб. Р.Әлијев тәклифлә разылашыб, амма сифариши иҹра едә билмәјәрәк јахаланыблар.
Амма иҹтимаи рәј МТН-ин бу ачыгламасыны бирмәналы гаршыламыр. Сабиг тәһлүкәсизлик забити, политолог Әрәстун Оруҹлу бурада шүбһәли мәгамларын олдуғуну дејир: “Азәрбајҹанда хүсуси хидмәт, һүгуг-мүһафизә, мәһкәмә органларына, онларын мәлуматына ҹәмијјәтдә үмумән бир етимадсызлыг вар. Сон һадисә илә бағлы да мүхтәлиф фикирләр сәсләнир. Иҹтимаи мүзакирәләрдән дә ҝөрүнүр ки, бу мәсәлә илә бағлы шүбһәли мәгамлар вар. Мәнҹә, биринҹи белә мәгам Иранын бу мәсәләјә мүнасибәт билдирмәмәсидир. Бу, бир гәдәр мүәммалы ҝөрүнүр. Иран бу кими террор иттиһамларына онларын адәтән АБШ, Исраил вә ја башга өлкәдән ҝәлмәсинә дә бахмајараг чох агрессив реаксија верир. Иран Азәрбајҹандакы һиҹаб гадағасына, мәсҹид сөкүлмәсинә дә чевик реаксија вериб. Бу јахынларда сәрһәд позуҹулуғу мәсәләсинә дә сәрт реаксија илә растлашдыг. Анҹаг рәсми Теһранын инди Азәрбајҹанын дөвләт гурумунун Иранын Исраил вәтәндашларына террор һазырламасы иттиһамына реаксија вермәмәси шүбһә јарадыр. Илк нөвбәдә бу, Иран әтрафында террору дәстәкләјән дөвләт фикринә бир аз да рәнҝ гатыр. Иранын сусмасы ону демәјә әсас верир ки, ја Теһран бу мәсәләни габартмаг истәмир, ја да бу мәсәләнин, сахланылан инсанларын Ирана һеч бир аидијјәти јохдур. Она ҝөрә дә өзүнү тәмкинли апарыр”.
Ә.Оруҹлунун гәнаәтинә ҝөрә, террорчу кими тәгдим олунан шәхсләрин примитив тәсир бағышламасы да шүбһә доғуран мәгамдыр: “Телевизијада ҝөстәрилән потенсиал террорчулар да пешәкар террорчуја бәнзәмирди. Үмумијјәтлә, террор планы, силаһларын әлдә олунмасы кими епизодлар гејри-ҹидди тәсир бағышлајырды. Террорчуларын аиләләринин реаксијасы да шүбһә јарадыр. Бәзи експертләр дејир ки, мәһкәмә гәрарыны ҝөзләјәк. Анҹаг мән дејирәм ки, Азәрбајҹанда мәһкәмә органларына етимад етмәк олмаз. Мән бу мәсәләнин дејилдији кими олмасына, бу адамларын Иранда тәлим кечмиш террорчулар олдуғуна инанмырам. Террорун тәшкилатчысы кими тәгдим олунан Балагардашын адынын Һаҹы Мәммәдов иши илә һалланмасы да мүәммалары артырыр”.
“Туран” информасија аҝентлијинин директору Меһман Әлијев да МТН-ин мәлуматында бир сыра ачыг мәгамларын олдуғуну, террорчу кими тәгдим олунан шәхсләрин ҹидди тәсир бағышламадығыны дејир: “Террорчулар адәтән хүсуси һазырланмыш адамлар олур. Телевизијаларда нүмајиш олунан бу инсанларда һәмин һазырлығы ҝөрмәдим. Буна ҝөрә дә онларын террорчу олмасы инандырыҹы ҝәлмәди. Чүнки сөһбәт ҹинајәтин һазырланмасындан јох, хариҹи өлкәнин Бакыдакы мәркәзинин партладылмасындан ҝедир. Бу ишдә террорчулар хүсуси һазырланмыш адамлар олмалы иди”.
М.Әлијев дејир ки, Иран-Азәрбајҹан мүнасибәтләриндә ҹидди проблемләр вар. Әввәлки илләрдән фәргли олараг ики өлкә һөкумәтләри бу наразылығы ачыға чыхармаға башлајыб. М.Әлијев террорун гаршысынын алынмасы бәјанатынын архасында сијаси месажларын дајандығыны истисна етмир: “Чүнки бизим тутдуғумуз јол Иранын марагларына зиддир. Азәрбајҹан АБШ вә Исраиллә мүттәфигдир, ҝеосијаси мәсәләләрдә бизим мөвгејимиз Иранла зиддир. Әҝәр бу ҝүнәдәк ики өлкә арасында наразылыг ачыг ифадә олунмурдуса, артыг инди наразылыг ачыг дејилир. Телеканалларда бу барәдә сүжетләр ҝедир. Артыг икитәрәфли мүнасибәтләр ҝәрҝин фазаја кечир”.
МТН-ин бәјанатына Ирандан бу ҝүнә гәдәр һәр һансы рәсми реаксија олмајыб. Дүнән мәсәлә илә бағлы Иранын Бакыдакы сәфирлијинә мүраҹиәт етдик. Сәфирлијин мәтбуат хидмәтиндән верилән рәсми ачыгламада билдирилир: “Иранын Азәрбајҹандакы сәфирлијинин мәтбуат хидмәти бу мәсәләнин Иранла әлагәләндирилмәсини гәти сурәтдә рәдд едир вә билдирир ки, бу мәсәлә сионистләрин ики өлкә - Иран вә Азәрбајҹан арасындакы әлагәләрә хәләл ҝәтирмәк мәгсәди ҝүдән бир провокасијасыдыр”.
КӘНАН
Диггәт: Хәбәрдән истифадә етдикдә мәнбәјә истинад лазымдыр
