Әһли Бејт -АБНА- хәбәр аҝентлијинин вердији хәбәрә әсасән: Мәрҹеи-тәглид Ајәтуллаһ Мәкарим Ширази Женева Университетинин Бејнәлхалг Һүгуг вә Бејнәлхалг Ҹәмијјәтләр Департаментинин мүдири профессор Марко Сассолини гәбул едиб.
Марко Сассолинијә хош ҝәлдин дејән мәрҹеи-тәглид онун Ислам өлкәләринә сәфәрини јүксәк дәјәрләндирәрәк дејиб ки, үмид едирик ки, диҝәр мүтәффәкирләр дә сизин кими мүсәлман иҹмалары вә шәхсијјәтләри илә јахындан таныш оларлар вә башгаларындан Ислам өјрәнмәк јеринә Ислам әгидәсини онлардан әхз едәрләр. Чүнки башгалары бир чох мәтләбләри там әксинә танытдырырлар.
Ајәтуллаһ Мәкарим Ширази ҝөрүш заманы дејиб ки, бу ҝүн инсан һагглары сијасәтчиләрин әлиндә аләтә чеврилиб вә ондан өз мәнфәәтләринә чатмаг үчүн истифадә едирләр. Мәсәлән, Иранда инсан һаггларынын позулмасыны билдирәрәк бизә ирадлар билдирирләр. Һалбуки бәзи әрәб өлкәләриндә нә сечкиләр кечирилир, нә инсан һагглары горунур вә нә дә демократијадан әсәр-әламәт вар. Амма онлара һеч бир ирад билдирилимир. Чүнки онлар бизә ирад билдирәнләрин мәнфәәтләри үзрә һәрәкәт едирләр.
Иранда дәфәләрлә сечкиләр кечирилдијини хатырладан мәрҹеи-тәглид дејиб ки, бу сечкиләр һәгиги сечкиләр олуб вә ҹамаат бу сечкиләрдә јахындан иштирак едиб. Бизим конститусијамыз ҝөзәл шәкилдә јазылмышдыр вә ҹамаат она етимад едир. Әҝәр сиз конститусијамызы өзүнүз арашдырсаныз буну мүшаһидә едәрсиниз вә ҝөрәрсиниз ки, чох мәнтигли вә инсан севҝиси илә долу бир конститусијадыр. Амма бизә ирад билдирәнләр буну гәбул етмирләр. Чүнки онларын мејары өз мәнафеләридир.
Ајәтуллаһ Мәкарим Ширази даһа сонра дејиб ки, бир чох гәрблиләр бизим өлкәмизә сәфәр етдикдән сонра фикирләриндә кардинал дәјишикликләр баш верир вә бәјан едирләр ки, биз ешитдијимиз Иранла ҝөрдүјүмүз Иранын арасында бөјүк бир фәрг вар. Елә бил ки, ики Иран мөвҹуддур. Бири Гәрб КИВ-дә чатдырылан Иран вә бири дә һәгиги Иран.
Биз бүтүн дүнја халглары илә динҹ јашамаг пешиндәјик вә бизимлә мүбаһисәси вә дүшмәнчилији олмајанла һеч бир мүбаһисәмиз вә дүшмәнчилијимиз јохдур дејән мәрҹеи-тәглид дејиб ки, бу Гурани-Кәримин бизә вердији тәлимдир.
Ислам дининин ҝөстәришләриндән бири олан Һәҹҹ мәрасиминдә мүсәлманларын ҝөрүшәрәк бир-биринин һалындан хәбәрдар олмасыны диггәтә чатдыран Гуран мүфәссири билдириб ки, әҝәр бүтүн ҹәмијјәтләр ајрылыгда јашајарларса вә анҹаг өзләри барәдә дүшүнәрләрсә, дүнја ҹәмијјәти пис ҝүнә галар. Буна ҝөрә һамы бир-биринин фикриндә олмалыдыр. Дин бизә өјрәдир ки, диҝәрләринин мәнафејинә өз мәнафејин кими бахмалысан. Вә әҝәр буна әмәл едиләрсә, дүнјада әмин-аманлыг вә сүлһ бәргәрар олар.
Даһа сонра сијасәтчиләрин мүсәлманлар арасында чәкишмәләр вә мүһарибәләр јаратмағына ишарә едән Ислам алими билдириб ки, мин илдән артыгдыр ки, шиәләр вә сүнниләр Ирагда бәрабәр гардашҹасына јашајырдылар вә араларында дава филан јох иди. Амма бу ҝүн һәр ҝүн һәр ики тәрәфдән горхаглар тәрәфиндән ҝүнаһсыз инсанлар гәтлә јетирилир. Биз бунун кимләр тәрәфиндән едилдијини ҝөзәл билирик. Һәмчинин билирик ки, мәгсәд мәзһәб гаршыдурмасы јаратмагдыр.
Шејх Мәкарим Ширази мүсәлман өлкәләринин дахили чәкишмәләр васитәсилә зәифләдилдијини билдирәрәк дејиб ки, бу империалист өлкәләр тәрәфиндән һәјата кечирилир. Ән бөјүк проблем исә бундадыр ки, дүнја мәтбуаты онларыын әлиндәдир вә дүнјаја бизим фәрјадымызын јетишмәсинә мане олурлар.
Сон олараг мәрҹеи-тәглид билдириб ки, Ислам дини бизә өјрәдир ки, әҝәр бир иши камил шәкилдә јеринә јетирә билмәсәниз дә, әлиниздән ҝәлән гәдәр един. Биз дә буна бүтүн иҹтимаи мәсәләләрдә әмәл едәрәк, үмидлә ирәли ҝедирик. Вә нә гәдәр ки, сағыг вәзифәмиз инсан һаггларынын инкишафы үчүн чалышмагдыр.
Ҝөрүшүн сонунда Женева Университетинин Бејнәлхалг Һүгуг вә Бејнәлхалг Ҹәмијјәтләр Департаментинин мүдири профессор Марко Сассолини худаһафизләшәрәк ҝөрүшдән мәмнун галдығыны, ҝөрүшүн онун үчүн фајдалы вә јарарлы кечдијини билдириб.
Диггәт: Хәбәрдән истифадә етдикдә мәнбәјә истинад лазымдыр
