Әһли Бејт -АБНА- хәбәр аҝентлијинин вердији хәбәрә әсасән: Бу ҝүн “Әсҝәр аналарына дәстәк” Иҹимаи Бирлији ордуда баш верән мүәммалы әсҝәр өлүмләри, низамнамәдән кәнар һаллар вә бунун доғурдуғу ҹидди фәсадлар барәдә дәјирми маса кечирди. Тәдбирдә һәмчинин диҝәр мәсәләләрә дә тохунулду. Дәјирми масада гурумун тәмсилчиләри илә јанашы, иҹтимаијјәтин вә мәтбуатын нүмајәндәләри дә иштирак едирдиләр.
Гурумун сәдри Нөврәстә Ибраһимова тәдбири ачараг сон ајларда ордуда өлүм һалларынын артмасы вә онун сәбәбләри һагда ҝениш мәлумат верди. О, конкрет рәгәмләр ҝөстәрәрәк тәхминән 1000 нәфәр итки верилдијини, 600 нәфәрин јараландығыны, 13 әсҝәрин дүшмән ҝүлләсинә туш ҝәлдијини, 13-нүн автомобил гәзасына дүшмәси һагда мәлумат олдуғуну, 16 нәфәрин исә интиһар етдијни билдирди. Нөврәстә ханым деди ки, бүтүн бу тәләфатлар бахымсызлығын, әсҝәрләрә ҝөстәрилән лагејд мүнасибәтин, ҹәзасызлығын аҹы нәтиҹәләридир: “Әсҝәрләр вәтәнин мүгәддаратынын һавасы вә сују сајылыр. Бунларсыз јашамаг мүмкүн олмадығы кими, вәтән дә әсҝәрсиз нәфәс ала билмәз. Мараглыдыр, хидмәтә һәвәслә јолланан әсҝәр сонрадан нәјә ҝөрә интиһар етмәлидир? Шүбһәсиз ки, ону буна вадар едән ҹидди сәбәбләр вар. Азәрбајҹан әсҝәри һәр чәтинлијә дөзсә дә тәһгирә дөзмүр. Бәс ордуда автомобил гәзалары нә үчүн тез-тез баш верир? Автомобил өмрүндә ону идарә етмәјән әсҝәрә етибар едилир вә бунун сону да өлүмлә нәтиҹәләнир. Бунлар һамысы мәнәвијјатын сәвијјәсинин ашағы олмасынын ҝөстәриҹисидир”.
Н.Ибраһимова мүгәддәс китабымыздан, мүгәддәсләримизин һәдисләриндән ситат ҝәтирәрәк деди ки, әсҝәр Аллаһ-Тәаланын севдији кәсдир, Аллаһ онун силаһынын сәсини севир. Амма чох тәәссүф ки, вәтәнин бу ағыр ҝүнүндә, торпагларымызын 20 фаизинин ишғал едилдији бир шәраитдә она һәлә дә биҝанә мүнасибәт ҝөстәрилир вә сәһвләри дүзәлтмәк әвәзинә, зоракылыг давам етдирилир: “Бу әсл фаҹиәдир. Белә фаҹиәләр исә гејд етдијим кими, мәнәви бошлуғун нәтиҹәсидир. Әҝәр әсҝәр Аллаһы таныјырса, онда вәтәни дә ҝөз бәбәји кими горујаҹаг. Командир һәр аддымда Аллаһы башынын үстүндә ҝөрүрсә, онда әсҝәрә аталыг гајғысы ҝөстәрәҹәк, мүәллим һәдијјәјә дејил, өвладларымызын тәһсилинә диггәт јетирәҹәк, һәкимләр вәтәндашларымызын пулуна јох, сағламлығына фикир верәҹәк. Аллаһы таныјан валидејн өз өвладына, аиләсинә дүзҝүн хидмәт ҝөстәрәҹәк.”
Һаҹы Нөврәстә даһа сонра өлкәдәки үмуми вәзијјәтә тохунараг деди ки, кимләр һәгигәти данышырса, ганунсузлуглара етираз едирсә мүхтәлиф иттиһамларла һәбсә атылыр, ағыр ҹәза алыр: “Һәрби хидмәтдән горхмаг иман зәифлијинин нәтиҹәсидир. Вәтән мүгәддәсдир, ону горујанлара ҹанымызы да гурбан версәк јенә аздыр. Јәни әввәлләр белә олуб. Инди исә әсҝәрләрә тәзјиг ҝөстәрилир, ишҝәнҹә верилир, гүрурлары сындырылыр. Неҹә олур ки, ата-ананын хејир-дуасы илә һәрби хидмәтә јолланан әсҝәр өлдүрүлүр, низамнамәдән кәнар һәрәкәтләрин гурбаны олур, амма ҹинајәткар ҹәзасыз галыр, рүтбәләри, вәзифәләри артырылыр, амма һиҹаб гадағасына етираз едәнләр наһагдан ҹәза чәкирләр?”.
Н.Ибраһимова сонда әсҝәр аналарына, өвладлары һәрби хидмәт заманы мүәммалы шәкилдә һәлак олан валидејнләрә мүраҹиәт едәрәк, һагсызлыг вә ганунсузлугларла барышмамаға чағырды: “Әҝәр әсҝәрләр гәсдән өлдүрүлүрсә, ишҝәнҹәләр верилирсә валидејнләр нәјә ҝөрә сусурлар? Өлүмүн сәбәбләрини дәгиг билдији һалда нә үчүн буну мәтбуата ачыг демәкдән чәкинирләр? Нә гәдәр ки, сусгунлуг ҝөстәриләҹәк, мүәммалы өлүмләрин дә сајы артаҹаг. Һаггы, һаггын сәсини боғмаг олар, амма өлдүрмәк олмаз. Чүнки Һагг Аллаһын өзүдүр. Бу ҝүн бүтүн дүнја ермәниләрә һагг газандырыр, лакин Азәрбајҹана дәстәк ҝөстәрән јохдур. Чүнки ермәни мәгсәдинә чатмаг үчүн зүлүм-зүлүм ағлајыр, јаланчы ҝөз јашлары төкүр. Биз исә дүшмәни вә дүшмәнчилији чох тез унудуруг. 20 илдән артыгдыр ки, торпагларымыз ишғал олунса да, бајрамлары чох тәнтәнәли шәкилдә гејд едирик. Инди дә ејни овгатла јени илә һазырлашырыг. Анҹаг бизим үчүн јени ил Гарабағын азадлығындан сонра башлајыр”.
Гурумун тәмсилчиләриндән бири Тәранә Мәммәдова да дигәти мүәммалы әсҝәр өлүмләри вә бунун сәбәбләринә јөнәлтди. Тәранә ханым бу јахынларда бир әсҝәрин ҝизир тәрәфиндән өлдүрүлмәси фактына тохунду: “Мүдафиә Назирлији буну силаһла еһтијатсыз давранманын нәтиҹәси кими тәгдим етди. Амма бу ҹидди шүбһә доғурур. Валидејнләр һеч нәдән чәкинмәмәли, буну ачыг демәлидирләр. Әҝәр әсл сәбәб ҝизләдилирсә, ҹинајәткар да ҹәзасыз галыр вә нөвбәти ҹинајәтләр башлајыр.”
Гурумун диҝәр тәмсилчиси Ҝүнај Рәҹәбова исә Азәрбајҹан ҹәмијјәтиндә һаггын, әдаләтин һәр заман тапдандығыны, заман-заман ахтарылан һәгигәтин тапылмадығыны вурғулады: “Түркијәдә бир әсҝәр дөјүлдүјү үчүн бүтүн ҹәмијјәт дә, орду да ајаға галхды. Амма биздә белә дејил, һәр шејә биҝанә јанашырыг, унутганлыг ҝөстәририк, бир-биримизә дәстәк вермирик. Валидејнләр исә белә һалларда сусмамалыдырлар. Әкс һалда ҹинајәтләр давам едәҹәк. Бунун гаршысыны алмаг үчүн бирлик нүмајиш етдирилмәлидир”.
Сәидә Мәммәдова да шәһидләрин јүксәк мәгамда дајандыгларыны вурғулајараг деди ки, онлар өз ганлары илә гаранлыг сәһифәләримизә ишыг сачыр: “Биз һагсызлыглара, әсҝәр өлүмләринә нә үчүн дөзмәлијик? Сусдугҹа вәтән дә парчаланыр. Мәнәвијјаты, гүруру сындырылан әсҝәр вәтәни горуја билмәз. Тарих унудулурса, фаҹиәләр дә давам едир”.
Гурумун сәдр мүавини Кәмалә Манафова исә Азәрбајҹан халгынын мәнәвијјатына зәрбә вурмагла сәрвәтләримизи таламаға чалышанларын мөвҹудлуғундан данышды. Кәмалә ханым бунун нүмунәси кими өлкәмиздә кечириләҹәк “Авровижин” маһны мүсабигәсинә тохунду. Вә деди ки, бу, Азәрбајҹан үчүн фаҹиәдир: “Игтисади бөһран вәзијјәтиндә белә бир мүсабигәнин кечирилмәси бизә јарашмаз. Аз галыб ки, нәфәс алмағы да карт системинә кечирсинләр”.
Диҝәр гурум тәмсилчиси Илаһә Сәмәдова өвладларымызын һәвәслә һәрби хидмәтә ҝетдикләрини, лакин сонрадан дәһшәтли һадисәләрлә, ишҝәнҹәләрлә үзләшдјини сөјләди. Илаһә ханым һиҹаб гадағасына да тохунду: “Русија телевизијасы дөвләтимизин башчысына һиҹаб гадағасы барәдә суал верәндә, о, белә бир проблемин олмадығыны деди. Әҝәр беләдирсә, ондан нечә ајдан бәри давам едән һәбсләр нә үчүндүр?”
Шәһид анасы Ајнур Мәммәдова исә “Вәтәни севмәк имандандыр ” дејәрәк, оғлу Садиги һәрби хидмәтә јола салдығыны билдирди: “Мәним оғлум да шәһиддир. О да һагг јолунда рәһмәтә ҝетди. Садиг чох ҹәсарәтли ҝәнҹ иди. О, нечә-нечә ермәнини өлдүрә биләрди. Амма чох тәәссүф ки, бизим ордуда әсҝәрә әјилмәји өјрәдирләр. Садиг исә әјилмәји хошламырды, тәһгирә дөзмүрдү. Мән сусмамышам. Садәҹә сәс-күј салмаға утанырам ки, бирдән ермәниләр бизә ҝүләр”.
Диггәт: Хәбәрдән истифадә етдикдә мәнбәјә истинад лазымдыр
