Дүнја ҝөзләјир... Бүтүн динләрин, милләтләрин мәнсублары өз хиласкарыны ҝөзләјир. Јәһудиләрын Давуд пејғәмбәрдән үзү бу тәрәфә ҝөзләри јолдадыр. Онларын әгидәсинә ҝөрә Аллаһ Тәала Бәни-Исраили әсарәтдән гуртармаг үчүн Давудун нәслиндән олан бир нәфәр хиласкар ҝөндәрмәлидир. Һәмин хиласкар Маших олараг Бәни-Исраилин гәдимдәки хош әјјамларыны өзүнә гајтармалыдыр. Әшијанын китабында охујуруг: “Јәссинин ҝөвдәсиндән (Давудун атасы) бир шахә гол-будаг атыб гөнчәләнәҹәк вә Танрынын руһу онда гәрар тапаҹагдыр... О, мискинләрә әдаләтлә һөкм едәҹәкдир. Јер үзүнүн мәзлумларына ҝөрә дүзҝүн һөкм чыхараҹагдыр. Залымлары сусдураҹаг, шәр инсанлары өз нәфәси илә мәһв едәҹәкдир. Белинә әдаләт кәмәри бағлајаҹаг, әманәт гуршағы тахаҹагдыр...”.
Һәзрәт Исанын(ә.с) ҝөјләрә чәкилмәсиндән сонра мәсиһиләр бөјүк инамла онун гајыдаҹағы ҝүнү ҝөзләјирләр. Чүнки Һәзрәти Исадан нәгл едирләр ки, өзү барәсиндә демишидр:
“Инсан оғлу ҝәләҹәкдир, өз атасынын ҹәлалында, өз мәләкләри илә бирҝә. Һәмин вахтда һәр кәси өз әмәлләринә ҝөрә ҹәзаландыраҹагдыр. Һәр заман сизә дејирәм ки, бурада оланлардан бәзиләри инсан оғлунун өз мәләкуту илә ҝәлишини ҝөрмәк истәмирләр”.
Мүсәлманлар да бөјүк шөвг вә интизарла Аллаһын вердији вәдин - Меһди Саһиб-әз-заманын (ә.ф) зүһурунун - ҝерчәкләшәҹәји ҝүнү ҝөзләјирләр: “Аллаһ араныздан иман ҝәтириб јахшы ишләр ҝөрәнләри өзләриндән әввәлкиләр кими Јер үзүнүн варисләри едәҹәјини, онлар мөминләр үчүн Аллаһын Өзү бәјәндији динини (исламы) мөһкәмләндирәҹәјини (һәр тәрәфә јајаҹағыны) вә онларын горхусуну сонра әмин-аманлыгла (архајынчылыгла) әвәз едәҹәјини вәд бујурмушдур. Бундан сонра күфр едәнләр, шүбһәсиз ки, (Аллаһын итаәтиндән чыхмыш) әсл фасигләрдир”.
Азәрбајҹан да ҝөзләјир, өз хиласкарыны ҝөзләјир... Чохдандыр ки, һамы кимисә, нәјисә ҝөзләјир. Хүсусән дә сон вахтлар зүһурла әлагәли јени зүмзүмәләр ешидилмәкдәдир. Ачығы, гәзетләрдән бирининдә дәрҹ олунмуш бир јазыдакы “Хиласкар мүждәси” диггәтими ҹәлб еләди вә һазыркы јазынын “илһам мәнбәји”олду. Сән демә, екс-спикер Рәсул Гулијевин сәһабәләри конфранс кечириб халгы ҝөзләнилән хиласкара бејәт етмәјә, ҝәлишинә зәмин һазырламаға чағрыбмышлар. Огтај Мирзәјев адлы мүбәллиғ бүтүн халгы “Мүгавимәт һәрәкаты”на гошулмаға дәвәт едиб, белә вурғулајыбмыш: “Мән әминәм ки, Рәсул Гулијевин јаратдығы Мүгавимәт Һәрәкаты халг һәрәкатына чевриләҹәк. Биз һәр биримиз өз евимиздә, мәһәлләмиздә, кәндләрдә, гәсәбәләрдә, рајонларда Рәсул Гулијевин бу халгын хиласкары олдуғуну тәблиғ етмәлијик. Биз демократија истәјириксә, демократија Рәсул мүәллимин ҝәлиши илә бағлыдыр. Рәсул мүәллим һакимијјәтә ҝәлмәсә, Азәрбајҹанда демократија олмајаҹаг. Рәсул Гулијев халгын һакимијјәтини гураҹаг. Онун ҝәлиши Азәрбајҹана демократијанын вә әдаләтин ҝәлиши демәкдир... Һамы дәрк едир ки, Азәрбајҹанын хиласкары Рәсул Гулијевдир”.
Бир анлыға мәнә елә ҝәлди ки, - Гуранын да јох, - Мүгәддәс китабын (Инҹилин) мүждә ајәләрини охујурам. Огтај Мирзәјевин дәвәти һәвариләрин чағрышына чох бәнзәјир. Олмаја, Рәсул Гулијев јеванҝилистләрлә иш бирлијинә ҝириб? Мараглыдыр, Азәрбајҹанда бир гисим инсан, хиласкарын Рәсул Гулијев олдуғуну дүшүнүр вә “Рәсул Гулијев Азәрбајҹана ҝирмәјинҹә, демократија да Азәрбајҹана ҝирмәјәҹәк” шүары илә һәрәката башлајыблар. Демәли, бундан сонра милләтимизин бир гисми дәрдләринә, әләмләринә сон гојулан ҝүнүн, интизарын вүсала говушдуғу ҝүнүн Рәсул Гулијевин әлиндә демократија бајрағы илә Азәрбајҹана ҝирәҹәји ҝүнүн интизарыны чәкәҹәк.
Билдијим гәдәри халгын гоҹалыгдан бели бүкүлмүш, ҝөзләмәкдән ҝөзләринә мирвари сују ҝәлмиш јашлы кәсими дә әманәт кассаларындакы пулларын ҝери гајтарылаҹағыны ҝөзләјирләр. Онлар үчүн артыг кин ҝедиб, кимин ҝәлмәјинин бир о гәдәр дә мәнасы јохдур.
Кимин нәјисә ҝөзләмәсини аз-чох тәхмин едә билдим, амма игтидарын нәји ҝөзләдијини тәхмин едә билмәдим. Бәлкә сиз билирсиниз?
