Әһли Бејт -АБНА- хәбәр аҝентлијинин вердији хәбәрә әсасән: декабрын 12-дә президент Илһам Әлијев Инзибати Хәталар Мәҹәлләсинә дәјишикликләри тәсдигләјиб. Дәјишиклији Милли Мәҹлис өтән ај гәбул етмишди.
Инзибати Хәталар Мәҹәлләсинин 300-ҹү маддәсинә едилмиш дәјишикликлә дини етигад һаггында ганунвериҹилијин позулмасы һесаб олунан фәалијјәтләр мүәјјәнләшдирилиб. Јенилијә ҝөрә, мүвафиг иҹра һакимијјәти органы илә разылашдырылмадан вәтәндашларын дини тәһсил мүәссисәләриндә тәһсил алмаг үчүн хариҹә ҝөндәрилмәси, дин хадимләринин мүбадиләси, ислам дининә аид ајин вә мәрасимләри Азәрбајҹандан кәнарда дини тәһсил алмыш вәтәндашларын һәјата кечирмәси, ганунла мүәјјән олунмуш гајдада сатышына иҹазә верилән дини тәјинатлы әдәбијјатын, әшјаларын вә дини мәзмунлу башга мәлумат материалларынын мүвафиг иҹра һакимијјәти органынын разылығы илә јарадылан ихтисаслашдырылмыш сатыш мәнтәгәләриндән кәнарда сатылмасы, әҹнәбиләр вә вәтәндашлығы олмајан шәхсләрин дини тәблиғат апармасы гадағандыр.
Әҹнәбиләр вә вәтәндашлығы олмајан шәхсләрин дини тәблиғат апармасы ганунсуз олараг дини тәјинатлы әдәбијјаты, әшјалары вә дини мәзмунлу башга мәлумат материалларыны јајмагла (сатылмагла) төрәдилдикдә Ҹинајәт Мәҹәлләсинин мүвафиг маддәсинә әсасән ҹинајәт мәсулијјәтинә сәбәб олур.
Инзибати Хәталар Мәҹәлләсинә дәјишикликләри тәсдигләмәсинин ардынҹа президент Илһам Әлијев Ҹинајәт Мәҹәлләсинә јениликләри дә имзалајыб.Бунунла дини ајинләри иҹра етмәјә мане олмаға ҝөрә ҹәримәләрин максимал һәдди 2000 манатадәк, динә етигада мәҹбур етмәјә вә дини ајинләрин иҹрасы ады алтында вәтәндашларын һүгугларына гәсд етмәјә ҝөрә ҹәримәләрин максимал һәдди 9000 мин манатадәк артырылыб.
Ҹинајәт Мәҹәлләсинә бу мәзмунда 167-2-ҹи маддә әлавә едилиб:
Маддә 167-2. Ганунсуз олараг дини тәјинатлы әдәбијјаты, әшјалары вә дини мәзмунлу башга мәлумат материалларыны истеһсал етмә, идхал етмә, сатма вә ја јајма
167-2.1. Мүвафиг разылыг олмадан дини тәјинатлы әдәбијјаты, әшјалары вә дини мәзмунлу башга мәлумат материалларыны истеһсал етмә, сатыш вә ја јајма мәгсәди илә идхал етмә, сатма вә ја јајма - беш мин манатдан једди мин манатадәк мигдарда ҹәримә вә ја ики иләдәк мүддәтә азадлыгдан мәһрум етмәклә ҹәзаландырылыр.
167-2.2. Ејни әмәлләр:
167-2.2.1. габагҹадан әлбир олан бир груп шәхс вә ја мүтәшәккил дәстә тәрәфиндән төрәдилдикдә;
167-2.2.2. тәкрар төрәдилдикдә;
167-2.2.3. вәзифәли шәхс тәрәфиндән өз гуллуг мөвгејиндән истифадә етмәклә төрәдилдикдә - једди мин манатдан доггуз мин манатадәк мигдарда ҹәримә вә ја ики илдән беш иләдәк мүддәтә азадлыгдан мәһрум етмәклә ҹәзаландырылыр.
Диггәт: Хәбәрдән истифадә етдикдә мәнбәјә истинад лазымдыр
