Әһли Бејт -АБНА- хәбәр аҝентлијинин вердији хәбәрә әсасән: Дүнән Бакы шәһәри Нәриманов рајон мәһкәмәсиндә илаһијјатчы Һаҹы Тале Бағыров вә Елшән Аббасовун нөвбәти мәһкәмә-истинтаг просеси кечирилиб
Мәһкәмәдә зәрәрчәкмишләр вә шаһидләр диндирилиб.
Илк олараг мәһкәмәјә "Ҝенерал Ако Kомпани" ширкәтинин нүмајәндәси зәрәрчәкмиш кими диндирилди. Нүмајәндә шикајәтчи олмадығыны вә дәјмиш зәрәри өзләринин өдәдијини билдириб.
Даһа сонра шаһид гисминдә Пост Патрул Хидмәтинин әмәкдашы Вагиф Гијасов чағырылды. Шаһид полис бөлмәсинә Тале Бағыров вә Елшән Аббасову ППХ хүсуси автомобили илә онун ҝәтирдијини билдириб. Лакин мәһбуслар полиси танымадыгларыны вә полис бөлмәсинә онун тәрәфиндән ҝәтирилмәдијини билдирдиләр.
Мәһкәмә залына шаһид гисминдә ППХ әмәкдашы Рзајев Рзаәли чағырылмыш вә Тале Бағыровла Елшән Аббасову Тәһсил назирлијинин инзибати бинасынын јахынлығындакы автобуса апардығыны дејиб. Бу ики нәфәрин полисә табе олдуғуну вә сакит шәкилдә автобуса миндијини, лакин автобусда мүхтәлиф шүарлар сәсләндирилдијини дә билдирди.
Вәкил Анар Гасымлы исә шаһид Рзајевә мүраҹиәт едәрәк билдириб ки, "Сиздән габагкы шаһидләр бу ики нәфәрин ППХ хүсуси автомобили илә полис бөлмәсинә апарылдығыны билдириб. Сиз исә дејирсиниз ки, бу ики нәфәри автобуса апармысыныз. Тале вә Елшәни нечә нәфәр апарыб ки, һәр полис ону бир јерә миндирдијини дејир?"
Шаһид Рзајев суала ҹаваб олараг јадында јалныз Елшән Аббасовун галдығыны вә Талени автобуса апарыб-апармамагда тәрәддүд етдијини деди.
Бундан сонра шаһид Ҝүнәшов Назим зала чағырылыб. Полис Ҝүнәшов, Елшәни јолдан тутдуғуну, һеч кимә хәсарәт јетирмәдијини вә онунла бирликдә даһа 2 нәфәри тутдуғуну, онларын һеч кимә вә һеч нәјә хәсарәт јетирмәдијини, Тале Бағырову да аксијада ҝөрдүјүнү дејиб. Шаһид, Елшән Аббасовун кәнардан күтләјә әл ишарәтләри вердијини билдирди. Лакин буну сүбут едә билмәјинҹә "даһа мәним дејиләси сөзүм јохдур, нә олуб ону демишәм" деди.
Буҝүнкү мәһкәмәнин сон шаһиди кими исә ППХ әмәкдашы Ҝүлмәммәдов Ејваз диндирилди. О Рәшид адлы полисә чијин најиһәсиндән бу ики нәфәрдән бири тәрәфиндән вурулдуғуна шаһид олдуғуну деди. Лакин дәгиг олараг Таленин јохса Елшәнин вурдуғуну хатырламадығыны билдирди. илкин истинтаг заманы шәкилә бахараг бу икисиндән биринин вурдуғуну деди. Анар Гасымлы шаһидә бир нечә суал вердикдән сонра шаһид ҹаваблары гарышдырды. Вәкил илә шаһидин арасында мүбаһисә ҝедәркән һаким деди: "Сиз нәји мүәјјәнләшдирмәк истәјирсиниз. Бир һалдакы о мәһкумлары танымыр." Вәкил Анар Гасымлы полис Рәшидин конкрет кимин тәрәфиндән вурулдуғу протоколлашдырылмасыны тәләб етди.
Бурдаҹа мәһкәмәнин буҝүнкү иҹласы јекунлашды. Нөвбәти мәһкәмә иҹласы нојабр ајынын 25-и саат 14:00-а тәјин олунду.
Хатырладаг ки, “Һиҹаб Азадлыг” аксијасы бу ил мајын 6-да Тәһсил Назирлији гаршысында кечирилиб. Аксија илә бағлы Бакы Шәһәр Прокурорлуғунда иш ачылыб. истинтаг групунун рәһбәри Бакы Шәһәр Баш Полис идарәсинин истинтаг вә тәһгигат идарәсинин рәиси Назим исмајыловдур. Руһани Тале Бағыров Азәрбајҹан Республикасынын Ҹинајәт Мәҹәлләсинин 221.2-ҹи маддәси илә (Бир груп шәхс тәрәфиндән хулиганлыг) вә 233-ҹү маддәси илә (иҹтимаи гајданын позулмасына сәбәб олан һәрәкәтләри тәшкил етмә вә ја бу ҹүр һәрәкәтләрдә фәал иштирак етмә), (3 илә гәдәр һәбс) иттиһам олунур. Һәбс едилдикдән сонра Һаҹы Тале барәсиндә әввәлҹә 15 сутка, даһа сонра исә 2 ајлыг һәбс гәтимкан тәдбири сечилиб вә Күрдәханы тәҹридханасына ҝөндәрилиб.
Диггәт: Хәбәрдән истифадә етдикдә мәнбәјә истинад лазымдыр
