Әһли Бејт -АБНА- хәбәр аҝентлијинин вердији хәбәрә әсасән: 2011-ҹи илин илк ҝүнләриндән башлајан сијаси тәгибләр нәтиҹәсиндә ајры-ајры партија вә тәшкилатлардан онларла нүмајәндә әлијевләр режими тәрәфиндән һәјасызҹасына шәрләнәрәк зинданлара салынды. Бир мүддәт әввәл исә “Хурал” гәзетинин баш редактору Әвәз Зејналлы гондарма иттиһамларла сахланылды.
“Һакимијјәтин сијасәтини бундан сонра неҹә дәјәрләндирирсиниз? Игтидар өзүнә гаршы мүхалиф олан сијаси гүввәләрә гаршы басгыларыны давам етдирәҹәк, јохса мөвгејиндә мүәјјән гәдәр јумшаглыг мүшајиәт олунаҹаг?”
Мөвзу илә бағлы суаллары “Шәрг Гәрб” Арашдырмалар Мәркәзинин сәдри Әрәстун Оруҹлу ҹавабландырыб: “Јумшаглыг үчүн һәлә ки, елә бир әламәт ҝөрмүрәм. Ҝетдикҹә вәзијјәт ҝәрҝинләшир. Ҝүнү-ҝүндән әһалинин сосиал игтисади дуруму ағырлашыр вә наразылығы ҝетдикҹә артыр. Бир ҝүн Бакыда гар јағды вә сон 5-6 ил әрзиндә 3,5 милјард доллар вәсаит ајрылмыш енержи сектору ифлиҹ вәзијјәтә дүшдү. Бу ону ҝөстәрир ки, артыг һөкумәтин фәалијјәтиндәки коррупсија вә өзбашыналығын мигјасы милли тәһлүкә һәддинә чатыб. Артыг һакимијјәтин фәалијјәти өлкә үчүн тәһлүкәјә чеврилиб. Ҝүман етмирәм ки, һакимијјәт өзү вәзијјәти дәјәрләндирә билир. Амма бу һаллар коррупсија вә һакимијјәт дахили груплашмаларын чәкишмәсиндән кәнара чыха билмәјәҹәк. Ҝетдикҹә бу просес дәринләшир.
Баш верәнләр һамысы зәнҹирвари просесләрин тәркиб һиссәсидир. Һакимијјәт бу зәнҹири гырмагла өзү-өзүнү јыхмаг тәһлүкәси илә үзләшәҹәк. Игтидар бу дуруму горујуб сахламағы мүхалиф фәаллара гаршы басгыларда ҝөрүр. Бу басгылардан бири академик Рафиг Әлијевин бу јахынларда тутдуғу вәзифәдән узаглашдырылмасы иди. Зијалылар һакимијјәтин үнванына нә демишдиләр ки? Ҝүман еләмирәм ки, һакимијјәт үчүн һәр һансы бир тәһлүкәли иш ҝөрмүшдүләр. Зијалылар топлантыда чох еһтијатлы данышырдылар. Онлар һакимијјәтин диалога чағырараг, өз фикирләрини чатдырырдылар. Бу һадисә ҝөстәрди ки, Азәрбајҹан һакимијјәти истәнилән шәхси көкүндән балталамаға һазырдыр. Һакимијјәт апардығы бу сијасәтин нә дәрәҹәдә давамлы олаҹағынын фәргинә вармалыдыр.
Бу ҹүр сијасәт тоталитар режимләрә мәхсус олан әнәнәдир. Әрәб диктаторларыны буна мисал кими ҝөстәрмәк олар. Тунисдә ингилаб баш верәндән сонра, Бин Әли гачды. Бундан сонра бүтүн әрәб лидерләри дедиләр ки, бу ингилабын биздә баш вермәси мүмкүн дејил. Һадисәләрин давамы олараг Мисир диктатору Һүснү Мүбарәк деврилди вә һазырда хәрәкдә мәһкәмәјә ҝәтирилир. Мисирдәки ингилабдан сонра Гәззафи деди ки, бу ингилаблар Ливијада мүмкүн олмајаҹаг. Лакин сонра Мүәммар Гәззафи дәһшәтли формада өлдүрүлдү. Һәр бири өзү-өзлүјүндә һаглы иди. Чүнки һәр бир өлкәдә баш верән ингилаблар бир-бириндән фәргли вә даһа дәһшәтли олду. Инди дә дүнјанын диҝәр диктаторлары кими, Азәрбајҹан һакимијјәти дә һәмин сөзләри тәкрарлајырлар. Бу ону ҝөстәрир ки, авторитар режимләрин реал һесаблама механизмләри јохдур. Һәр бир шеј кортәбии шәкилдә өз ахары илә давам едир. Белә бир ахарын да олмасы чох тәһлүкәлидир.
Һакимијјәт реаллығы баша дүшсә белә, һәр һансы бир дәјишиклик етмәк фикри јохдур. Чүнки реаллығы өзүндән чох ону дәјишмәк ҹәһдиндән горхурлар. Бунлар ислаһатдан јох, һәтта ислаһат ҹәһдиндән белә горхурлар. Чалышырлар ки, бүтүн тәшәббүсләри көкүндән вурсунлар. Белә бир һаллар горхудан јаранан реаксијалардыр. 20 нәфәр зијалынын бир јерә топлашыб еһтијатлы формада нә исә демәси белә бунлары нараһат едир. Ејни һалда һакимијјәтин дахилиндә дә парчаланма просесләри баш верир. Һакимијјәт башыны итириб. Билмир нәји, јығыб, јығышдырсын.”
Диггәт: Хәбәрдән истифадә етдикдә мәнбәјә истинад лазымдыр
