Әһли Бејт -АБНА- хәбәр аҝентлијинин вердији хәбәрә әсасән: Бөјүк Гурулуш Партијасынын сәдри, депутат Фазил Мустафа «Бизим Јол»а ачыгламасында дејиб: «Түркијә рәсмиләринин вә гејри-рәсми шәхсләринин Азәрбајҹан тәрәфиндән рәсми Бакынын Исраиллә мүнасибәтләри кәсмәји тәләб етмәси ҹәһдләри доғру дејил».
Депутатын сөзләринә ҝөрә, белә тәләбләрин истәнилмәси, ејни заманда Түркијәнин милли марагларына ҹаваб вермир: «Чүнки ҝәләҹәкдә буна охшар вәзијјәт јаранарса, Азәрбајҹан да Түркијәјә гаршы белә бир тәләблә чыхыш едә биләр. Бу мәсәләдә Гарабағ мүнагишәсини диҝәр проблемләрлә, о ҹүмләдән Түркијә-Исраил мәсәләси илә гарышдырмаг лазым дејил.
Ахы, Гарабағ мәсәләси тәкҹә Азәрбајҹан әразиләринин Ермәнистан тәрәфиндән ишғал едилмәси демәк дејил. Ермәнистан ејни заманда Түркијәјә гаршы да әрази иддиалары илә чыхыш етмәкдәдир. Анкара, Ермәнистан Түркијәнин әрази бүтөвлүјүнү тәһдид етдији заман тәкҹә өз марагларыны нәзәрдә тутан јох, Азәрбајҹанын да мәнафеләринә ујғун олан аддымлар атмалыдыр. Буна ҝөрә дә, Түркијә илә Ермәнистан арасындакы мүнасибәтләри Азәрбајҹанла Исраил арасындакы мүнасибәтләрлә мүгајисә етмәк олмаз».
Диггәт: Хәбәрдән истифадә етдикдә мәнбәјә истинад лазымдыр
