Әһли Бејт -АБНА- хәбәр аҝентлијинин вердији хәбәрә әсасән: БМТ-нин Бакы офисинин нүмајәндәси исламчыларын Бакы Ағыр Ҹинајәтләр Мәһкәмәсиндә кечирилән просесиндә бејнәлхалг тәшкилатларын јеҝанә мүшаһидәчиси олуб. Азәрбајҹан Ислам Партијасы сәдринин сијаси мәсәләләр үзрә мүавини Акиф Һејдәрли вердији ачыгламасында гејд едиб ки, бу гурумун мәһкәмә илә бағлы һесабат ачыгламасы ҝөзләнир: “Еләҹә дә биз јерли Сүлһ вә Демократија Институтуна дәфәләрлә мүраҹиәт етмишик ки, һәбс олунан исламчылар бејнәлхалг тәшкилатлара да, өлкә иҹтимаијјәтинә дә сијаси мәһбус кими тәгдим едилсин. Мөвсүм Сәмәдов, Вагиф Абдуллајев бирбаша сијаси мәһбус һесаб олунур. Чүнки онлар сијаси партијанын рәһбәрләридир”.
Һүгуг Мүдафиә Тәшкилатлары Мониторинг Групунун исламчылары сијаси мәһбус сијаһысына дахил етмәмәсинә ҝәлинҹә, Акиф Һејдәрли дејиб ки, бәзи бејнәлхалг вә јерли гурумлар һәбсдә олан диндарлары сијаси мәһбус сајмыр: “Азәрбајҹан Конститусијасында динин дөвләтдән ајры олмасы мүддәасыны әсас ҝөтүрәрәк исламчылары сијаси мәһбус кими гәбул етмәјә биләрләр. Амма тутуланлар бирбаша Азәрбајҹан Ислам Партијасынын тәмсилчиләридирсә, хүсуси олараг бу һәбсин әсас мотиви партија Баш Мәҹлисинин 2 јанвар иҹласында сәдр Мөвсүм Сәмәдовун чыхышыдырса, бу шәхсләр сијаси мәһбус һесаб олунмалыдыр”.
Акиф Һејдәрли исламчыларын диҝәр гурумларда сијаси мәһбус кими танынмасы үчүн чалышаҹагларыны дејиб: “Бунун үчүн һансы сәнәд лазымдырса, ону тәгдим етмәјә һазырыг”.
Һүгуг Мүдафиә Тәшкилатлары Мониторинг Групунун үзвү, һүгуг мүдафиәчиси Сәидә Гоҹаманлы “Медиа форум” сајтына ачыгламасында дејиб ки, 2001-ҹи илдә Авропа Шурасы онлара сијаси мәһбусларын мүәјјәнләшдирилмәси үчүн беш маддәлик мејар тәгдим едиб: “Бизим үчүн ән әсас мәсәлә дөвләтчиликдир. Дөвләтчилијимизә гаршы чыхан инсанлары сијаси мәһбуслар сијаһысына салмырыг. Бу бизим үчүн чох өнәмлидир”.
Бу мәсәләјә мүнасибәт билдирән Акиф Һејдәрли вурғулајыб ки, Азәрбајҹанда чох гарајахмалар вар: “О ҹүмләдән Азәрбајҹан Ислам Партијасына да белә гарајахмалар олур. Партијанын адыны бир сыра гоншу дөвләтләрлә бағламаг истәјирләр, фәалијјәтимиздәки аддымлары сијаси сифариш кими дәјәрләндирәнләр, јозанлар вар. Биз беләләринә “јухујозанлар” дејирик. Сијаси партијалар дөвләтчилијин мөһкәмләнмәси, әрази бүтөвлүјүнүн горунмасыны әсас фәалијјәт истигамәти кими гәбул едирсә, бу кими јозмалара һагг газандырмаг мүмкүн дејил. Партијамызын сыраларында Дағлыг Гарабағ уғрунда мүбаризәдә дөјүшәрәк јараланан, әлил олан үзвләр вар. Дәфәләрлә бәјан етмишик ки, биз бундан сонра да дөвләтчилик уғрунда, әрази бүтөвлүјү уғрунда ҹанымыздан кечмәјә һазырыг”.
Партија сәдринин мүавини әдаләтсиз мәһкәмә һөкмүнә гаршы исламчыларын мүдафиә фәалијјәтинин давам етдириләҹәјини гејд едиб: “Әслиндә јаланчы шаһид ифадәләри илә бир нечә шәхсә бу ҹүр ағыр ҹәза вермәк һеч бр мәнтигә сығмыр. Һәм дә бу, ҹәмијјәтин, халгымызын парчаланмасына хидмәт едир. Һәр кәс бу ҹүр әдаләтсизлијә гаршы чыхмалыдыр, әдаләтсизлијин сәбәбләрини арашдырмалы вә буна гаршы мүбаризә апармалыдыр. Азәрбајҹанда һүгуги дөвләт јаратмаг истәји вә нијјәти бәјан олунуб. Амма әдаләтсиз мәһкәмә һөкмү ортададырса, демәли, мәнтигсизлик вар. Бејнәлхалг гурумлар гаршысында өһдәлик ҝөтүрмәклә, конвенсијалара гошулмагла бәрабәр Азәрбајҹан мәһкәмәләринин бу ҹүр гәрарлар вермәси дөвләтин, халгын имиҹинә мәнфи тәсир ҝөстәрир вә зәрбәләр вурур. Буну әсас ҝөтүрәрәк әдаләтсиз мәһкәмә һөкмүндән бејнәлхалг тәшкилатлара, Азәрбајҹанда фәалијјәт ҝөстәрән бејнәлхалг институтларын тәмсилчиләринә, хариҹи сәфирликләрә, еләҹә дә Азәрбајҹанда фәалијјәт ҝөстәрән һүгуг мүдафиәчиләринә мүраҹиәт едәҹәјик”.
♦ Арајыш: 2011-ҹи илдә Азәзрбајҹанда бир чох исламчы фәал азадлыгдан мәһруметмә ҹәзасына мәһкум едилиб.Мај ајында руһани Азәр Ҹәбијев, ијун ајында илаһијјатчы Һәсән Мәммәдов, руһани Фәхри Илјасов, октјабрда руһани Илгар Мусајев, Азәрбајҹан Ислам Партијасынын лидери Мөвсүм Сәмәдов, партијанын сәдр мүавини Вагиф Абдуллајев, Астара рајон тәшкилатынын сәдри Руфулла Ахундзадә, Мөвсүм Сәмәдовун гајыны Фирдовси Мәммәдрзајев, әмиси оғлу Дәјанәт Сәмәдов, Масаллы руһаниси Фәрамиз Аббасов, мајын 6-да Бакыда кечирилмиш “Һиҹаба азадлыг” аксијасынын иштиракчылары Араз Исмајылов, Нурани Мәммәдов, Рүфәт Миријев иш алыблар. 15 нәфәрә јахын исламчы фәалын исә истинтагы ҝедир.
Диггәт: Хәбәрдән истифадә етдикдә мәнбәјә истинад лазымдыр
