Әһли Бејт -АБНА- хәбәр аҝентлијинин вердији хәбәрә әсасән: Бакыда јени дәниз тиҹарәт лиманынын тикинтиси вә ҝәләҹәкдә лимана нәзарәт уғрунда нәглијјат назири Зија Мәммәдовла фөвгәладә һаллар назири Кәмаләддин Һејдәров арасында 2 илдән артыгдыр давам едән мүбаризә биринҹинин гәләбәси илә баша чатыб. Артыг Әләтдә инша олунаҹаг лиманын тикинтиси үчүн Нәглијјат Назирлијиндә идарә дә јарадылыб.
Дәниз лиманы уғрунда ики назирин савашы лап әввәлдән, һәлә онун Бакынын мәркәзиндән Әләтә көчүрүләҹәји елан олунан ҝүнләрдән башлајыб. Илк вахтлар 3 милјард доллара баша ҝәләҹәји дејилән лиманын тикинти ишләрини әлә кечирмәк үчүн сон вахтлара гәдәр “фөвгәлназир” Һејдәров фөвгәладә имканларда ҝөрүнүрдү. Лиманын јени үнваны Гарадағ рајонуна иҹра башчысы вәзифәсинә мәһз “Һејдәровун адамы” Сүлејман Микајыловун ҝөндәрилмәси, еләҹә дә Хәзәр Дәниз Ҝәмичилији Идарәсинин рәиси Ајдын Бәшировун она јахын шәхс олмасы бу јени чохмилјардлыг лајиһәнин “фөвгәлназир”ә һәвалә едиләҹәји еһтималларыны ҝүҹләндирирди. Амма демә, Зија Мәммәдов да бош отурмајыбмыш. Бу барәдә бир аз сонра.
Бир лиман, ики назир...
Јени лиманын ҝөрүнүшү (лајиһә)
Һәләликсә ону хатырладаг ки, јени дәниз лиманы уғрунда саваш тәкҹә онун тикинтиси заманы мүмкүн коррупсија һесабына әлавә милјонлар газанмаг наминә дејилди. Бу, һәм дә лиманын ҝәләҹәк фәалијјәти заманы ондан бир тиҹарәт мәркәзи кими газанылаҹаг бөјүк пуллара саһиб олмаг бахымындан әһәмијјәтли иди. Ики назир дә мәһз буна ҝөрә бүтүн ҝүҹ вә имканлары илә “лимана доғру јүрүјүрдү”.
Инди белә ҝөрүнүр ки, нәглијјат назири даһа мөһкәм “тәкәрләр” үзәриндә шүтүјүрмүш вә онун “фөвгәлназир” рәгиби һансыса фөвгәладә вәзијјәт јарада билмәсә ојуну удузуб. Һәр һалда Зија Мәммәдов артыг өзүнү јени лиманын “ағасы” кими иҹтимаијјәтә тәгдим едир. О, рәсми мәтбуатда бу јени лајиһәнин мәрһәләләри вә гијмәти һагда мәлуматларын јер алдығы мәгалә јазыб (ја да јаздырыб) нүмајиш етдирир ки, “ишин биләни” мәһз одур.
Лајиһә нечәјә баша ҝәләҹәк?
Мәммәдов јазыр ки, јени лиманын иншаат дәјәри 870 милјон манат мәбләғиндәдир. Һәрчәнд, сонрадан бу мәбләғин артмајаҹағына да назир һеч бир тәминат вермир. Назир вәд едир ки, әсас олан биринҹи мәрһәләнин һәјата кечирилмәсинә 540 милјон манат, икинҹи мәрһәләјә 150 милјон манат, үчүнҹү мәрһәләјә исә 180 милјон манат хәрҹләнәҹәк. Назир бир дә ону әлавә едир ки, јени лиманын өз тутуму үзрә дүнјада аналогу олмајаҹаг.
Јени лиманын имканлары
Јени Бакы Бејнәлхалг Дәниз Тиҹарәт Лиманы комплексинин тәмәлгојма мәрасими 2010-ҹу илин нојабрында баш тутуб. Лиман комплексинин лајиһәсини Һолландијанын “Ројал Һасконинҝ” ширкәти һазырлајыб. Лиманын 2014-ҹү илдә фәалијјәтә башламасы планлашдырылыр. Тикинти лајиһәси 3 мәрһәләдә һәјата кечириләҹәк. Биринҹи мәрһәләдә 10 млн. тона гәдәр јүк вә 40 мин контејнер, икинҹи мәрһәләдә 17 млн. тона гәдәр јүк вә 150 мин контејнер, үчүнҹү мәрһәләдә исә 25 млн. тона гәдәр јүк вә 1 милјон контејнерин дашынмасы нәзәрдә тутулур.
Лајиһә чәрчивәсиндә лиманын нормал фәалијјәт ҝөстәрмәси үчүн 400 һектар әразидә бүтүн зәрури инфраструктурун тикинтиси планлашдырылыб.
Нәглијјат шефи рәгибини неҹә јенди?
Јахшы бәс, Зија Мәммәдов бу ағыр мүбаризәдә Һејдәров кими гүдрәтли рәгибини неҹә сырадан чыхара билиб? Редаксијамыза дахил олан билҝиләрә ҝөрә, бунун үчүн нәглијјат шефинә “једәјиндән јапышмаг” үчүн чох ири “локомотив” лазым олуб вә... өлкә башчысынын шәхси горумасы, һакимијјәтдахили ҝүҹләрин ән ҝүҹлүләриндән бири ҝенерал Бәјләр Әјјубов көмәјини әсирҝәмәјиб. Даһа дәгиги, Зија Мәммәдов јени лајиһәни рәгибинин, аз гала овҹунун ичиндән гамарлајыб ҝөтүрә билмәк үчүн Бәјләрову өзүнә шәрик гисминдә мүттәфиг сечиб. Бәјләровун бу сечимә, неҹә дејәрләр, һөрмәтлә јанашмасы үчүн исә ортада јетәринҹә бағлар вар. Бу минвалла лиманын тикинтиси Бәјләровун нәзарәтиндә олдуғу дејилән “Азәркөрпү”јә тапшырылыб, онун бир тиҹарәт објекти кими фәалијјәтиндән ҝөтүрүләҹәк ҝәлирдә дә ҝенералын өз пајынын олаҹағы вәд едилиб.
***
О гәдәр дә әһәмијјәтли олмајан даһа артыг деталлара баш вурмадан дејә биләрик ки, мәһз өлкә башчысынын күрәјини етибар етдији Бәјләровун “ишин ичиндән чыхмасы” Һејдәрову ҝери чәкилмәјә вадар едиб. Амма “фөвгәлназир”ин нә гәдәр ҝери чәкилдији вә јени һәмләләрә баш вуруб-вурмајаҹағы да заманын ҹаваб верәҹәји мәҹһул мәсәләдир.
Диггәт: Хәбәрдән истифадә етдикдә мәнбәјә истинад лазымдыр
