Әһли Бејт -АБНА- хәбәр аҝентлијинин вердији хәбәрә әсасән: Вәкилләрин һүгугларына әмәл олунмасына нәзарәт едән Бејнәлхалг Вәкиллик Миссијасы Азәрбајҹан һакимијјәтини вәкил Елчин Намазовун һүгугларынын позулмасына сон гојмаға чағырыб (“Туран”).
Е.Намазов 2005-ҹи илдән Азәрбајҹан һакимијјәтинә бир сыра сијаси оппонентләрин, әсасән фәал Руһани Һөҹҹәтул Ислам Һаҹы Фәхри Илјасов вә Азәр Ҹәбијевин, журналист вә фәал Рамин Бајрамовун һүгугларыны мүдафиә едиб. Өтән ил Е.Намазов бир нечә дәфә Азәрбајҹан һакимијјәтинин, һәмчинин Вәкилләр Коллеҝијасынын һәдәләринә мәруз галыб.
2011-ҹи илин февралында Ҝәнҹәдә јерли полис рәиси блоҝер Бәхтијар Һаҹыјевин һүгугларыны мүдафиә етдијинә ҝөрә ону һәбс едәҹәји илә һәдәләјиб. Март, апрел вә ијунда Вәкилләр Коллеҝијасы ону чағырараг хәбәрдарлыг едиб ки, әҝәр мүхалифәтчиләрин һүгугларыны мүдафиә етмәкдә давам едәрсә, вәкил адындан мәһрум олунаҹаг. Августда бу һәдәләр МТН нүмајәндәләри тәрәфиндән дә сәсләниб.
Августун 27-дә Нәсими Рајон Мәһкәмәсинин һакими Шаһин Абдуллајев Намазову мүхалифәтчи Рүфәт Һаҹыбәјлинин һүгугларынын мүдафиәсиндән кәнарлашдырыб. Буна әсас кими о, Намазову мәһкәмәјә һөрмәтсизликдә иттиһам едиб вә Вәкилләр Коллеҝијасыны онун барәсиндә тәдбирләр ҝөрмәјә чағырыб.
Сентјабрын 14-дә Вәкилләр Коллеҝијасы “Намазовун пешә етиикасыны поздуғуну” тәсдигләјиб, сентјабрын 16-да исә Һүгугшүнаслар Ассосиасијасы ону вәкил статусундан мәһрум едиб.
“Бу тәдбирләр Азәрбајҹанда инсан һүгугларынын мүдафиәси илә мәшғул олан вәкилләрә гаршы репрессијаларын артмасы контекстиндә баш верир. Өтән ил бир нечә вәкил һакимијјәтин тәгиб вә санксијаларына мәруз галыб. Белә ки, вәкил Видади Исҝәндәров һәбс олунуб, Исахан Ашуров коррупсија вә инсан һүгугларынын позулмасына даир ишләр үзрә просесләрдә иштиракына ҝөрә бир нечә дәфә һәдәләниб.
Бунунла әлагәдар Бејнәлхалг Вәкиллик Миссијасы Азәрбајҹан һакимијјәтини вәкилләрин өз сәлаһијјәтләрини манеәсиз јеринә јетирмәсинә зәманәт верән бејнәлхалг конвенсијаларын әсас принсипләринә әмәл етмәјә чағырыр.
Азәрбајҹан һакимијјәти ҹәнаб Намазова гаршы бүтүн ҹинајәт вә инзибати проседурлары дәрһал дајандырмалы, диҝәр һүгугшүнасларын тәгиб олунмасына сон гојмалыдыр.
Һакимијјәт вәкилләрин вә онларын бирликләринин мүстәгиллијинә зәманәт вермәлидир.
Вәкилләр Коллеҝијасы вәкилләрә гаршы инзибати тәдбирләрин өзбашына һәјата кечирилмәсинә сон гојмалыдыр вә өз бирбаша миссијасыны јеринә јетирмәлидир – һүгуг пешәсинин мүстәгиллијини тәмин етмәлидир”, - дејә бәјанатда вурғуланыр.
Гејд едәк ки, Бејнәлхалг Вәкиллик Миссијасы Франсада јерләшән вә Авропа Иттифагы тәрәфиндән малијјәләшдирилән бејнәлхалг гејри-һөкумәт тәшкилатыдыр. Тәшкилат Франса, Испанија вә диҝәр өлкәләрин һүгуг структурлары тәрәфиндән јарадылыб.-02Д-
***
Бу арада Елчин Садыгов да дөвләт башчысы Илһам Әлијевә, Президент Адмистрасијасынын рәһбәри Рамиз Меһдијевә, һүгуг-мүһафизә органлары илә иш шөбәсинин мүдири Фуад Әләсҝәрова мүраҹиәт едиб.
Вәкил мүраҹиәтиндә јазыр ки, Азәрбајҹан Вәкилләр Коллеҝијасынын үзвүдүр, фәрди гајдада фәалијјәт ҝөстәрир, һеч бир сијаси партијанын үзвү дејиләм вә сијаси фәалијјәтлә мәшғул олмур. Азәрбајҹанда вә дүнјада өлкә медиасыны, журналистләри мүдафиә едән мүстәгил, принсипиал вәкил кими таныныр. Мүлки, инзибати вә ҹинајәт мүһакимә иҹраатларында мәтбуат гурумларыны вә журналистләри мүдафиә едир. Мәгсәди өлкәдә сөз вә мәтбуат азадлығынын инкишаф етдирилмәсидир.
“Демократик дөвләт ҝениш сөз азадлығы олмадан јашаја вә инкишаф едә билмәз. Һәр кәсин ифадә азадлығы олмајан јердә халгын ирадәси һөкмран ола, ҹәмијјәт вә дөвләт сәмәрәли идарә, инсан һаглары тәмин олуна, әдаләтли, һүгугун алилилијинә сөјкәнән ҹәмијјәт вар ола билмәз.
Лакин мәтбуаты вә журналистләрин һүгугларыны мүдафиә етдијимә ҝөрә әсассыз тәгибләрә мәруз галырам. Белә тәгибләрдән бири дә танымадығым Бајрам Әлијев адлы шәхсин мәним барәмдә сизә, милли тәһлүкәсизлик назири Елдар Маһмудова вә Вәкилләр Коллеҝијасынын сәдри Азәр Тағыјевә шикајәт етмәсидир”, - дејә гејд едән Садыгов даһа сонра өз һагда шикајәтин мәтнини јазыр вә давам едир: “Бу, мәнә гаршы һәјата кечирилән чиркин вә бөһтан характерли тәхрибатдыр. Барәмдә белә әризәләр тәртиб едиләрәк тәгиб олунмағым јолверилмәздир. Бу тәхрибаты тәшкил едәнләрин дүшүнҹәси 37-ҹи илдән бу тәрәфә адламајыб. Елә билирләр ки, мәни бу сахта үсулла јолумдан дөндәрәҹәкләр”.
Вәкил мүраҹиәтиндә она гаршы һәјата кечирилән бу тәхрибатын гаршысынын алынмасына, тәхрибатчыларын ҹәзаландырылмасына, Вәкилләр Коллеҝијасы тәрәфиндән әсассыз тәгиб олунмасынын гадаған едилмәсинә вә тәһлүкәсизлијинин тәмин олунмасына ҝөстәриш верилмәсини хаһиш едиб.
Диггәт: Хәбәрдән истифадә етдикдә мәнбәјә истинад лазымдыр
