Әһли Бејт -АБНА- хәбәр аҝентлијинин вердији хәбәрә әсасән: Сентјабрын 28-дә дөвләт иттиһамчысы Вүгар Гулијев Азәрбајҹан Ислам Партијасынын лидери Мөвсүм Сәмәдов, партијанын сәдр мүавини Вагиф Абдуллајев, Астара рајон тәшкилатынын сәдри Руфулла Ахундзадә, Мөвсүм Сәмәдовун гајыны Фирдовси Мәммәдрзајев, әмиси оғлу Дәјанәт Сәмәдов, Руһани Фәрамиз Аббасов вә Гуран елмләр үзрә мүтәхәссис илаһијјатчы алим Зүлфүгар Микајылзадәнин иши үзрә тәклифини верәҹәк. Ҹинајәт Мәҹәлләсинә диггәт едилсә, тәгсирләндириләнләр 10 илдән 15 иләдәк, һәтта өмүрлүк азадлыгдан мәһруметмә ҹәзасы ала биләр.
Исламчыларын мүһакимәси Бакы Ағыр Ҹинајәтләр Мәһкәмәсиндә кечирилир. Сентјабрын 26-да мәһкәмә истинтагы битиб вә сонунҹу мәһкәмә арашдырмасында шаһидләр ифадә вериб.
Дөвләт мәмурлары тәрәфиндән шәрләнән тәгсирләндирилән шәхсләр Ҹинајәт Мәҹәлләсинин 214.2.1 (Габагҹадан әлбир олан бир груп шәхс, мүтәшәккил дәстә вә ја ҹинајәткар бирлик (ҹинајәткар тәшкилат) тәрәфиндән ҹинајәтә һазырлыг); 214.2.3 (Одлу силаһдан вә силаһ гисминдә истифадә олунан предметләрдән истифадә етмәклә ҹинајәтә һазырлыг); 228.3 (Ганунсуз олараг одлу силаһ, онун комплект һиссәләрини, дөјүш сурсаты (јивсиз одлу ов силаһы вә һәмин силаһ үчүн дөјүш сурсаты истисна олмагла), партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ја ҝәздирмә); 278-ҹи (Һакимијјәти зорла әлә кечирмә вә ја ону зорла сахлама) маддәләри илә шәрләнәрәк иттиһам олунур.
Руфулла Ахундзадә Ҹинајәт Мәҹәлләсинин 283.1-ҹи (Милли, ирги, сосиал вә ја дини нифрәт вә дүшмәнчилијин салынмасына, милли ләјагәтин алчалдылмасына, һабелә милли, ирги вә ја дини мәнсубијјәтиндән асылы олараг вәтәндашларын һүгугларынын мәһдудлашдырылмасына вә ја үстүнлүкләринин мүәјјән едилмәсинә јөнәлән һәрәкәтләр, ашкар сурәтдә вә ја күтләви информасија васитәләриндән истифадә олунмагла төрәдилдикдә) маддәси илә дә әлавә шәрләнәрәк иттиһам олунур.
Гејд:
Ҹинајәт Мәҹәлләсинин 214-ҹү маддәси (Террорчулуг) вә онун ајры-ајры бәндләри илә тәгсирләндирилән шәхсләрә әмлакы мүсадирә олунмагла он илдән он беш иләдәк мүддәтә азадлыгдан мәһруметмә вә ја өмүрлүк азадлыгдан мәһруметмә ҹәзасы тәтбиг едилә биләр.
Бу маддәјә Ҹинајәт Мәҹәлләсинин 28-ҹи маддәси (Ҹинајәтә һазырлыг) тәтбиг олунур. Гануна ҝөрә, һәр һансы маддәјә 28-ҹи маддә тәтбиг олунурса, бу заман әсас маддәдә ҝөстәрилән ҹәзанын јары мүддәти тәтбиг олунур.
Ҹинајәт Мәҹәлләсинин 228-ҹи маддәси (Ганунсуз олараг одлу силаһ, онун комплект һиссәләрини, дөјүш сурсаты, партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ҝәздирмә) илә тәгсирләндирилән шәхсләри беш илдән сәккиз иләдәк мүддәтә азадлыгдан мәһруметмә ҹәзасы ҝөзләјир.
Ҹинајәт Мәҹәлләсинин 278-ҹи (Һакимијјәти зорла әлә кечирмә вә ја ону зорла сахлама) маддәси илә тәгсирли билинәнләр он илдән он беш иләдәк мүддәтә азадлыгдан мәһруметмә вә ја өмүрлүк азадлыгдан мәһруметмә ҹәзасы илә гаршылаша биләрләр.
Ҹинајәт Мәҹәлләсинин 283-ҹү (Милли, ирги, сосиал вә ја дини нифрәт вә дүшмәнчилијин салынмасы) маддәси илә тәгсирли билинәнә мүәјјән мигдарда ҹәримә ҹәзасы тәтбиг олунмасы, јахуд ики илдән дөрд иләдәк мүддәтә азадлыгдан мәһрум едилмәси мүмкүндүр.
Диггәт: Хәбәрдән истифадә етдикдә мәнбәјә истинад лазымдыр
