Әһли Бејт -АБНА- хәбәр аҝентлијинин вердији хәбәрә әсасән: Иҹтимаи Палатанын 2 апрел митингинә ҝөрә һәбс олунмуш виҹдан мәһбусларынын бир гисминин иши үзрә Сәбаил рајон мәһкәмәсиндә кечирилән сонунҹу мәһкәмә иҹласы барәдә “Азадлыг”ын өтән сајында мәлумат вермишдик. Ејни заманда, һәмин мәһкәмә иҹласында диггәт чәкән бир олајын тәфәррүатларыны буҝүнкү сајымызда тәгдим едәҹәјимизи вәд етмишдик. Беләликлә, вәдимизә дә әмәл едирик.
“2 апрел” мәһбусларына гаршы баш верәнләрин репрессија олдуғу, өтән әсрин 37-ҹи ил әнәнәләринин дирчәлдилмәси кими фикирләр мәһкәмәдә, мәтбуатда сәсләндирилиб. Ҹүмә ҝүнү кечирилән мәһкәмә иҹласында исә виҹдан мәһбусу, АХҸП-нин иҹтимаијјәтлә әлагәләр шөбәсинин рәһбәри Мәһәммәд Мәҹидли бу һагда сәсләнән фикирләри конкрет фактларла сүбут едәрәк, истинтагы вә режими ифша етди.
М.Мәҹидли мәһкәмә просеси башлајандан һакимдән онун барәсиндә мәнфи хасијјәтнамә вермиш (2 апрел митингилә әлагәдар һәбс олунмуш 15 нәфәрдән јалныз Мәһәммәд Мәҹидли һаггында јашајыш јериндән мәнфи хасијјәтнамә верилиб) Ҹәбрајыл Рајон Иҹра Һакимијјәти башчысынын Бөјүк Мәрҹанлы кәнд әрази ваһиди үзрә нүмајәндәси Фәхрәддин Аббасгулу оғлу Нифтәлијевин шаһид кими диндирилмәсини тәләб едирди. Һаким исә һәр дәфә бу һагда вәсатәт вериләндә ону бахылмамыш сахлајырды. Сонда исә һаким елан етди ки, Ҹәбрајыл рајон иҹра һакимијјәтиндән мәһкәмәјә мәктуб ҝөндәриләрәк, һәмин шәхсин ишдән узаглашдырылдығы билдирилиб. Бу сәбәбдән Нифтәлијевин шаһид кими просесә чағырылмасы мүмкүн олса да, бунун үчүн ики һәфтәјә гәдәр вахт лазымдыр. Белә олан һалда, просесин узанмамасы үчүн Мәһәммәд Мәҹидли һәмин шәхс барәдә илҝинҹ фактлар ачыглады.
Мәһәммәд Мәҹидлинин чыхышындан:
“Тарихчијәм, Бакы Дөвләт Университетинин тарих факүлтәсини битирмишәм. Орадан да мәним шәхсијјәтимлә бағлы мүсбәт хасијјәтнамә верилиб. Бахын, әлимдәки гејдләр академик Зија Бүнјадовун ”Гырмызы террор” китабындан чыхарышдыр. Һәмин китабын 237-ҹи сәһифәсиндә рәсми сәнәдләрлә ҝөстәрилиб ки, Фәхрәддинин атасы, 37-ҹи илдә бабам да дахил олмагла, 3 нәфәр Бөјүк Мәрҹанлы кәнд сакининин үзүнә дурмагла, онларын ҝүлләләнмәсинә баискар олуб. Кәндимизин иҹра нүмајәндәси Нифтәлијевин барәмдә вердији хасијјәтнамә илә о вахт атасынын бабама вердији хасијјәтнамә ејнидир. Буну мүгајисә етмәклә ҝөстәрәҹәјәм.
Бүнјадовун китабындан ситат: “Рүстәмов Ханыш Рүстәм оғлу, 1892-ҹи илдә анадан олмуш, голчомаг, Ҹәбрајыл рајонунун Бөјүк Мәрҹанлы кәндиндән, 1930-ҹу илдә әкс-ингилаби фәалијјәтинә ҝөрә 3 ил мүддәтинә конслаҝерә сүрҝүн едилмиш, 1934-ҹү илдә сүрҝүндән гајытмышдыр. Онун һаггында хасијјәтнамә”.
Бу да Фәхрәддин Нифтәлијевин мәнә вердији хасијјәтнамәдән ситатдыр: “Хасијјәтнамә. 1973-ҹү илин сентјабр ајында Ҹәбрајыл рајонунун Бөјүк Мәрҹанлы кәндиндә анадан олмуш али тәһсилли, АХҸП-нин үзвү, субај, Мәҹидов Мәһәммәд Чәркәз оғлуна”.
Гајыдаг Бүнјадовун китабына. Ситат: “Ханыш Рүстәм оғлу Рүстәмов, 1929-ҹу иләдәк онун малдарлыг тәсәррүфаты вар иди вә о, муздурлары истисмар едирди. Әкс-ингилаби Мүсават тәшкилатынын үзвү иди”.
Ф.Нифтәлијевин јаздығы хасијјәтнамәдән ситат: “Мәҹидов Мәһәммәд Чәркәз оғлу АХҸ партијасынын үзвү кими һәмишә мүхалифәтдә олмуш, өлкәдә ҝедән сијаси вә игтисади инкишафа өз призмасындан јанашараг, наразы галмышдыр”.
Бүнјадовун китабындан ситат: “Ханыш Рүстәм оғлу Рүстәмов Мил дүзүндә үсјанчы һәрәкатынын инкишафына көмәк едирди”.
Ф.Нифтәлијевин јаздығы хасијјәтнамәдән ситат: “Мүхалифәт партијасынын үзвү кими, о, өлкә ганунларындан вә онларын һәјата кечирилмәсиндән наразыдыр”.
Бүнјадовун китабындан ситат: “Ханыш Рүстәм оғлу Рүстәмов сүрҝүндән гајыдандан сонра Ашағы Маралјан кәндинин иттиһадчылары Һаҹы Мәһәррәм оғлу, Аллаһверди вә башгалары илә сых әлагә јаратмышды”.
Ф.Нифәтлијевин јаздығы хасијјәтнамәдән ситат: “Ҹәбрајыл рајонундан олан мәҹбури көчкүнләр үчүн Биләсувар рајону әразисиндә тикилмиш 4 сајлы гәсәбәдә гејдијјатдадыр. Гәсәбәдә јашајаркән бир нечә дәфә гәсәбә сакинләри илә мүбаһисә едәрәк наразылыглар јаратмышдыр”.
Бүнјадовун китабындан ситат: “Ханыш Рүстәм оғлу Рүстәмовун анти-совет мејли вар. 1936-ҹы илдә колхозун һесабдары олдуғу вахт колхозун төвләсини јандырмагда ондан шүбһәләнмишләр. 1936-ҹы илдә Бөјүк Мәрҹанлы кәндиндә колхоз јарадылан заман колхоз әлејһинә тәблиғатла мәшғул иди”.
Ф.Нифтәлијевин јаздығы хасијјәтнамәдән ситат: “Өлкәдә ҝедән ислаһатлара мүхалиф мөвгедән јанашыр. Өлкә ганунларына табе олмаг истәмир. Азәрбајҹан Республикасында иҹазәсиз кечирилән һәр һансы топлантыда иштирак етмәјә мејллидир вә һәмфикирләрини һәмин топлантыларда иштирак етмәјә чағырыр”.
Диггәт: Хәбәрдән истифадә етдикдә мәнбәјә истинад лазымдыр
