Әһли Бејт -АБНА- хәбәр аҝентлијинин вердији хәбәрә әсасән:
Вәсатәтдә дејилир:
“Азәрбајҹан Республикасынын Баш прокурору ҹәнаб Закир Гаралова Сумгајыт шәһәр Һүгуг Мәсләһәтханасынын вәкили Анар Елман оғлу Гасымов тәрәфиндән вәсатәт
Һөрмәтли Закир мүәллим!
Мәлумат үчүн гејд едим ки, һазырда Азәрбајҹан Республикасы МТН-нин Истинтаг Баш Идарәсинин мүстәнтиги Ҹавид Гулузадәнин иҹраатында олан 866 сајлы ҹинајәт иши үзрә Сүлејманов Абҝүл Нејмәт оғлу Азәрбајҹан Республикасы ҸМ-нин 234.1, һәмин идарәнин баш мүстәнтиги Әсәд Һаҹыјевин иҹраатында олан 867 сајлы ҹинајәт иши үзрә исә, Гәнијев Ариф Ҝүлсувар оғлу Азәрбајҹан Республикасы ҸМ-нин 228.1 вә 234.1-ҹи маддәләри илә тәгсирләндирилән шәхс гисминдә ҹәлб олунублар.
Гејд едим ки, тәгсирләндирилән шәхсләрин һәр икисинин һүгугларыны онларын јахынлары илә бағланмыш мүгавилә әсасында мән мүдафиә едирәм. Мүдафиәјә гошулдуғум илк ҝүндән истинтагын ҹидди ганун позунтулары илә апарылмасы, буна етираз етдикдә истинтаг органынын вәзифәли шәхсләри тәрәфиндән тәһдид олундуғум үчүн Сизә мүраҹиәт етмәк вә баш вермиш ганун позунтулармы диггәтинизә чатдырмаг гәрарына ҝәлдим. Үмидварам ки, мүраҹиәтим ҹидди арашдырылаҹаг вә Сизин ҝөстәришиниз әсасында истинтаг органы тәрәфиндән јол верилән позунтулар тезликлә арадан галдырылаҹагдыр.
Һәр шејдән әввәл гыса арајыш верим ки, Сүлејманов Абҝүл Немәт оғлу 11 август 2011-ҹи ил тарихдә Исмајыллы рајону Лаһыҹ гәсәбәсиндә, Гәнијев Ариф Ҝүлсувар оғлу исә, һәмин тарихдә Сумгајыт шәһәриндә МТН-нин Антитеррор Мәркәзи тәрәфиндән кечирилмиш әмәлијјат заманы сахланылмышлар.
Һүгуглармы мүдафиә етдијим шәхсләрин тәгсирсизлик презумпсијасы һүгугуну позмадан гејд етмәлијәм ки, ҹинајәт-просессуал ганунвериҹилијин тәләбләринә вә мөвҹуд истинтаг практикасына ујғун олараг, сөзүҝедән ҹинајәт ишләринин истинтагы илә мүвафиг олараг, Исмајыллы рајон Полис Идарәси вә Сумгајыт шәһәр Полис Идарәси мәшғул олмалы иди.
Лакин јухарыда да гејд олундуғу кими вә дәфәләрлә етираз етмәјимизә бахмајараг, гејд олунан ҹинајәт ишләринин истинтагы буна сәлаһијјәти олмајан орган - Азәрбајҹан Республикасы МТН-нин Истинтаг Баш Идарәси тәрәфиндән апарылыр. Дәфәләрлә мүстәнтигләрдән истинтагы давам етдирмәјә сәлаһијјәтли олмаларына даир Азәрбајҹан Республикасынын Баш прокурору тәрәфиндән "истинтагын һәвалә олунмасы барәдә" гәрарын верилиб-верилмәмәсини, мүсбәт һалда, мүдафиә тәрәфини һәмин гәрарла таныш етмәји хаһиш етсәк дә, белә бир гәрарын верилмәдији билдирилмишдир. Она ҝөрә дә, һесаб едирик ки, истинтаг буна сәлаһијјәти олмајан орган тәрәфиндән һәјата кечирилир вә бу олдугҹа ҹидди ганун позунтусудур.
Бундан әлавә, тәгсирләндирилән шәхсләр барәсиндә һәбс гәтимкан тәдбири сечилдикдән сонра 24 саат әрзиндә онлар Бакы Истинтаг Тәҹридханасына көчүрүлмәли олдуглары һалда, 13 август 2011-ҹи ил тарихиндән һазыркы ҝүнәдәк гејри-гануни олараг МТН-нин мүвәггәти сахлама тәҹридханасында сахланылырлар.
Бир факты да нәзәринизә чатдырмаг истәјирәм ки, МТН-нин Истинтаг Баш Идарәсиндә истинтагын ҝедишатына диҝәр мүстәнтигләр вә шөбә рәиси сәвијјәсиндә тез-тез мүдахиләләр олур, истинтаг групуна дахил олмајан шәхсләр фактики олараг истинтагы идарә едир, тәгсирләндирилән шәхсләрлә вә онларын мүдафиәчиси илә мүбаһисә едирләр.
Һөрмәтли Закир мүәллим!
МТН-нин Истинтаг Баш Идарәсинин мүстәнтиги Ҹавид Гулузадә тәрәфиндән апарылан ахтарыш истинтаг һәрәкәтиндә баш вермиш кобуд ганун позунтуларыны да Сизин диггәтинизә чатдырмаг истәрдим. Белә ки, 12 август 2011-ҹи ил тарихдә саат тәхминән 10:00 радәләриндә МТН-нин инзибати бинасыны тәрк едәрәк, мүстәнтиглә бирликдә Сүлејманов Абҝүл Нејмәт оғлунун јашадығы Бакы шәһәри, Биләҹәри гәсәбәси А.Зејналлы күчәси 24А үнванында јерләшән 2 сајлы мәнзилә ҝәлдик. Мәнзилә чатанда бинанын гаршысында тәхминән 20 нәфәрәдәк шәхсин топлашдығыны ҝөрдүм. Сонрадан һәмин шәхсләрин МТН әмәкдашлары олдуғу бәлли олду. Мәнзилин ҝириш гапысына јахынлашан заман сонрадан һал шаһиди олдуғуну билдијим бир нәфәр шәхслә арамызда ашағыдакы мәзмунда диалог олду:
Һал шаһиди: Сиз вәкилсиз?
Мән: Бәли.
Һал шаһиди: Бу гапыны кәсибләр, амма ичәри ҝирән олмајыб, 2 саат олар ки гапынын ағзында отуруб сизи ҝөзләјирик. Ичәри һеч кими бурахмамышам.
Мән: Сиз кимсиниз ки?
Һал шаһиди: Мән һал шаһидијәм.
Мән: Сизә ким ихтијар вериб ки, ҝәлиб бурда кешик чәкәсиз?
Бу заман орада олан МТН әмәкдашлары мүдахилә едәрәк мәнимлә мүбаһисә етмәјә башладылар.
Јухарыдакы диалогдан да ајдын олдуғу кими, мән мүстәнтиглә бирҝә ахтарыш апарылан мәнзилә ҝәлмәздән 1-2 саат габаг МТН әмәкдашлары мәнзилин гапысыны хүсуси васитәләрлә кәсәрәк гапыны ачмышдылар. Она ҝөрә дә, мән әввәлҹә бу истинтаг һәрәкәтиндә иштирак етмәмәк барәдә гәрар вердим, даһа сонра исә, гәрарымы дәјишәрәк истинтаг һәрәкәтиндә иштирак етдим вә гапынын ачыг олмасы, һабелә һал шаһидинин дедикләри барәдә протоколда гејд етдим. Истинтаг һәрәкәти видео чәкилишлә апарылдығындан, бу барәдә видео-протокола да өз фикирләрими билдирдим.
Һөрмәтли Закир мүәллим!
Јухарыда гејд олунанлара әсасән Сиздән хаһиш едирәм: Сүлејманов Абҝүл Нејмәт оғлунун Азәрбајҹан Республикасы ҸМ-нин 234.1, Гәнијев Ариф Ҝүлсувар оғлунун Азәрбајҹан Республикасы ҸМ-нин 228.1 вә 234.1-ҹи маддәләри илә тәгсирләндирилмәсинә даир ҹинајәт ишләринин иҹрааты МТН-нә аид олмадығына ҝөрә, һәмин ишләрин МТН-дән алыныб сәлаһијјәтли органлара верилмәси; Сүлејманов Абҝүл Нејмәт оғлунун вә Гәнијев Ариф Ҝүлсувар оғлунун дәрһал Бакы Истинтаг Тәҹридханасына көчүрүлмәләри барәдә гәрар гәбул едәсиниз.”
