Әһли Бејт -АБНА- хәбәр аҝентлијинин вердији хәбәрә әсасән:
Бу ҝүн Ағыр Ҹинајәтләрә Даир Ишләр Үзрә Мәһкәмәдә Азәрбајҹан Ислам Партијасынын сәдри Мөвсүм Сәмәдовун, партијанын сәдр мүавини Вагиф Абдуллајевин, Астара рајон тәшкилатынын сәдри Руфулла Ахундзадәнин, Мөвсүм Сәмәдовун гајыны Фирдовси Мәммәдрзајевин, гоһуму Дәјанәт Сәмәдовун, Масаллы руһаниси Фәрамиз Аббасов вә илаһијјатчы алим Зүлфүгар Микајылзадәнин ҹинајәт иши үзрә нөвбәти мәһкәмә иҹласы кечирилиб.
Мәһкәмә башлајан кими һаким Елдар Исмајылов Азәрбајҹан Ислам Партијасынын Астара рајон комитәсинин сәдри Руфулла Ахундзадәјә һүгугларыны баша салды вә чыхышы үчүн иҹазә верди. Р.Ахундзадә чыхышына Азәрбајҹан тарихинә ганлы һәрфләрлә јазылмыш 1937-ҹи ил репрессија гурбанларындан сөһбәт ачмагла башлады: «Азәрбајҹанын гејрәтли оғуллары Микајыл Мүшфиг, Руһулла Ахундов репрессијаја мәруз галдылар. Бунлардан әлавә адыны билдијимиз вә билмәдијимиз минләрлә руһани Нарҝин адасында ҝүлләләнди. Лакин үстүндән илләр кечмәсинә бахмајараг, тарих онлары гијмәтләндирди. О заман Азәрбајҹанын бу гијмәтли оғулларынын һәлак олмасында јухарыда отуран ермәниләрин бармағы вар иди. Бәс инди нә олуб?».
Астарада баш верән өзбашыналыгдан данышан Руфулла Ахундзадә, ганунсузлугларла даим мүбаризәдә олдуғундан да сөһбәт ачды: «Рајонумузда тәһсил, хәстәхана, һүгуг органлары һамысы коррупсијаја уғрајыб. Мән даим бунларла мүбаризә апармышам. Һәтта прокурор Әлихан мүәллим дә мәнә јахынлашыб демишди ки, сәнин барәндә чох сөзләр ешитмишәм. Мән дә она демишдим ки, сизин барәниздә дә дејирләр ки, рүшвәт алыр. Бу сөзү демәјә үрәк лазымдыр вә анҹаг јеҝанә Аллаһдан горханлар буну дејә биләрләр. Белә фактлар чохдур».
Һаким Елдар Исмајылов:
- Иттиһамын маһијјәти үзрә данышын
Руфулла Ахундзадә:
- Мән кәнара чыхмырам. Ахы бу мүбаризә апардығым шәхсләр елә мәни шәрләјибләр. Баша дүшмүрәм, коррупсијаја јох дејән, мәни неҹә иттиһам едә биләрләр. Артыг 15 илдир ки, онлар мәни сусдурмаг, ја да өлкәдән чыхартмаға чалышыблар.
Һеч бир канал мәним фикирләрими вермәдијиндән, «Сәһәр» каналына мүсаһибә вермишәм. Мәним үчүн сәрһәд јохдур. Мән мүстәгил адамам вә һәр јердә дә фикирләрими дејәҹәјәм. Гејд едим ки, ДИН дәфәләрлә мәнә әмәкдашлыг тәклиф еләмишди. Мән дә демишәм ки, елә белә рүшвәтхорлуғу демәклә, сизинлә әмәкдашлыг едирәм дә.
Инди һәмин адамлар һеч өз ишләрини белә дүз ҝөрмүрләр. Мәнимлә гоншунун һәјәтини сәһв салыб, силаһлары ора атырлар. Силаһ чыханда Әдаләт Казымова дедим ки, һәјәт мәнә дејил, шофер Шамил Султанова мәхсусдур. Онлар да бир-бирләринә бахдылар.
Гејд едим ки, бу сәһв салмаг да әввәлдә онларын еләдикләри әдаләтсизлијин уҹбатындан олуб. Мән 93-ҹү илдә ев тикәндә һамыја сәнәд верилди, мәндән башга. Аиләмин сајына ҝөрә, мәнә 77 сот верилмәли иди, амма ҹәми 53 сот торпаг саһәси вердиләр. Инди дә бу гарышыглыға дүшүбләр. Әввәлдән нијә јанлыш јазырдылар ки, инди дә белә долашыға дүшсүнләр.
Мән ингилабчы, мәрд, горхмаз, дөвләтини, Вәтәнини, халгыны чох севән бир инсан кими һәрәкатын илк ҝүнләриндә фәалијјәт ҝөстәрмиш бир инсанам. Ҹаванлыгда мәним силаһым анҹаг кәллә, јумруг вә мәнтиг олуб. Үмумијјәтлә, биз мүсәлманларын јеҝанә ән бөјүк силаһы дуадыр. Сәнә гаршы әдаләтсизлик едәнә нифрин јағдырырсан, јахшылыг едәнә дуалар едирсән.
Инди мәни етник тәфригәчиликдә ҝүнаһландырырлар. Сорушан лазымдыр, ахы мәним анам түрк, атам талыш, һәјат јолдашым да шафеидир. Мән неҹә тәфригәчи ола биләрәм.
Д.и: Тәгсирләндирилән шәхсләрдән кими таныјырсыныз?
Р.А: Һаҹы Мөвсүмү 1993-ҹү илдә АИП Али Шурасында ҝөрмүшәм, амма нә ишлә мәшғул олдуғуну билмәмишәм. Вагиф Абдуллајеви 1994-ҹү илдән таныјырам. О заман партијада Кәрбәлаји Сәнан вар иди, о рәһмәтә ҝедәндән сонра, сәһв етмирәмсә, рәһмәтлик Һаҹы Мүзәффәрин дөврүндә Һаҹы Вагиф мүавин тәјин олунду. Фирдовси гардашымызын үзв олдуғуну бурда билмишәм. Фәрәмәз гардашымы да бурда ҝөрмүшәм, биз ејни характерли инсанларыг. Галанларыны да бурада танымышам.
Д.и: Сизин партијада сырави үзв олмусунуз, јохса һансыса фәалијјәтиниз олуб?
Р.А: Хејр, анҹаг ҝүҹүм әмр бе мәруф вә нәһј әз мүнкәрә чатыр.
Д.и: Иран КИВ-дә чыхышыныз олуб?
Р.А: Анҹаг «Сәһәр» каналында. Бир дәфә дә һансыса радиодан мүнасибәт өјрәнибләр.
Д.и: «Сәһәр» каналына сиз зәнҝ еләмисиниз?
Р.А: Онлар мәнә зәнҝ еләмир. Мән өзүм зәнҝ едирәм. Һеч онлар да сон заманлар мәнә сөз вермәк истәмирдиләр.
Д.и: «Сәһәр» каналында нә гәдәр чыхышыныз олуб?
Р.А: Бәс гәдәр. Әввәлләр АНС каналына мүраҹиәт етмишдим. Сонра АНС виран оландан сонра чыхмырам.
Д.и: «Сәһәр» каналында сонунҹу дәфә нә вахт чыхыш етмисиниз?
Р.А: Һаҹылар тутуланда мән суса билмәдим. Тәгрибән 2011-ҹи ил јанварын 8-11.
Д.и: Чыхышларынызын мәзмуну нә илә бағлы олуб. Елә коррупсија илә?
Р.А: Бәли. Мәмур өзбашыналығындан данышмышам. Һаҹыбала вә башгалары кимдир ки, президентин тапшырығыны јеринә јетирмирләр? Мән бу барәдә данышмышам.
