Әһли Бејт -АБНА- хәбәр аҝентлијинин вердији хәбәрә әсасән:
Чыхышы әснасында Ајәтуллаһ Хаменеи дүнја вә реҝионда бу вахта гәдәр ҝөрүнмәмиш бир вәзијјәтин мөвҹуд олдуғуна тохунараг өлкәдәки вәзијјәти јығҹам сурәтдә тәһлил едиб: “Арадан 32 ил өтдүкдән сонра Ислам дөвләтинин малик олдуғу статус вә мөвгеји реал шәкилдә дәјәрләндирсәк, ҝөрәрик ки, һал-һазырда өлкәмиз бөјүк вә тәсәввүредилмәз тәрәгги вә наилијјәтләрә имза атыб. Бу тәрәгги вә наилијјәтләр зирвәләрә доғру сүрәтли һәрәкәтә давам етмәк үчүн үмид вә зәмин јарадыр. Лакин бүтүн бунларла јанашы, һәлә һәллини ҝөзләјән приоритет мәсәләләр вә ҝөрүләси ишләр дә вар. Биз бирлик вә һәмрәјлик шәраитиндә, ҝеҹә-ҝүндүз чалышыб-вурушуб, һәмчинин принсип вә дәјәрләримиз үзәриндә мөһкәм дајанараг, халгын дөвләтә мисилсиз етимадындан вә ҝәнҹләр арасында олан јүксәк милли өзүнәинам әһвал-руһијјәсиндән истифадә етмәклә мөвҹуд имканлардан максимум дәрәҹәдә јарарланмалы, мүсәлман Ираныны дүнјада вә реҝионда лајиг олдуғу статуса чатдырмалыјыг. Өлкәдәки вәзијјәти реал шәкилдә вә дүзҝүн гијмәтләндирмәк үчүн дүнја вә реҝионун һазыркы вәзијјәтини дә нәзәрә алмаг лазымдыр. Чүнки Ислам Ингилабынын гәләбәсиндән бу ҝүнә гәдәр һазырда реҝионда баш галдырмыш ислами ојаныша, Гәрбин үзләшдији һејрәтамиз игтисади бөһрана, һәмчинин Гәрбдә ифратчы ҹәрәјанларын бу сәвијјәдә артымына һәлә һеч вахт раст ҝәлинмәјиб”.
Ајәтуллаһ Хаменеи сөзләринин давамында дејиб: “Дүнја вә реҝионда белә бир ҝөрүнмәмиш вәзијјәтин һөкм сүрмәси Ислам дөвләтинин гаршысында бөјүк шанслара јол ачыб. Өлкәдәки вәзијјәт реал сурәтдә гијмәтләндирилмәсә, бу шанслар әлдән чыха, һәтта өлкә үчүн тәһдидедиҹи фактора чеврилә биләр”.
Өлкәдәки шәраити дүзҝүн дәјәрләндирмәк биртәрәфли јанашмадан чәкинмәјин шәрт олдуғуну билдирән Иран Ислам Ингилабынын Дини Лидери дејиб: “Өлкәдәки вәзијјәти нәзәрдән кечирәркән һәм ҝүҹлү, һәм дә зәиф ҹәһәтләри ҝөрмәк, мүтләг мәнфи, јахуд мүсбәт јанашмадан чәкинмәк лазымдыр”.
Бәзи рәсмиләр вә сијаси лидерләр арасында мүтләг мәнфи јанашманын мөвҹудлуғундан наразы галдығыны билдирән Ајәтуллаһ Хаменеи бу тип јанашманын иҹтимаи нәтиҹәсинин пессимизм вә үмидсизлик олдуғуну билдирәрәк сөзләрини белә давам едиб: “Тәәссүф ки, бәзи мәтбуат органлары да мүәјјән гәрәзли мәгсәдләр наминә јалныз негатив мәзмунлу маншетләрлә чыхыш едирләр. Бу, јанлыш бир методдур. Сырф мүсбәт јанашма да гејри-дүзҝүндүр вә алдадыҹы разылыға сәбәб ола биләр”.
Ајәтуллаһ Хаменеи реҝиондакы вәзијјәтә дә тохунуб. О бу һагда дејиб: “Реҝионда һөкм сүрән һазыркы шәраит Америка вә бејнәлхалг сионизмин ҝүман вә һесабламаларына тамамилә зидд сурәтдә инкишаф едир. Бејнәлхалг аренадакы һеҝемон гүввәләр игтисади санксијаларла Ираны ифлиҹ вәзијјәтинә салмаг истәјирдиләр. Һал-һазырда исә Уҹа Јараданын тәгдири нәтиҹәсиндә онларын өзләрини шиддәтли игтисади бөһран јахалајыб”.
Ајәтуллаһ Хаменеи АБШ-ын Ирана гаршы тәһдидләринин бир нәтиҹә вермәмәсини дилә ҝәтирәрәк дејиб: “Америка вә бәзи Гәрб дөвләтләри Ираны мүһасирәјә алмаг мәгсәдилә Әфганыстан вә Ирага һәрби һүҹумлар етдиләр. Инди исә бу ики өлкәдә батаглыға батмыш кими чәтин вәзијјәтдә галыблар вә өзләри мүһасирәјә дүшүбләр”.
Дүнја диктарорларынын зәлиллијинә ишадәр едән Ислам Ингилабы Рәһбәри дејиб: “Мисирин Намүбарәкинин дәмир бармаглыглар архасына салынараг мүһакимә едилмәси дәрин мәна јүкү олан, һејрәтамиз бир һадисәдир. Мејданын сионист режими үчүн даралмасыны да буна әлавә етмәк олар”.
Ливијанын вәзијјәтиндән сон дәрәҹә нараһатедиҹи олдуғуну өнә чәкән Ајәтуллаһ Хаменеи дејиб : “Гәрб Ливија һаггында рәзил сијасәт јүрүдүр. Онлар чалышырлар ки, халг гијамындан суи-истифадә едиб Ливијанын нефт јатагларына нәзарәти өз әлләринә кечирсинләр. Бу өлкәдә истилаларыны тәсбит едәрәк Мисир вә Тунис дә дахил олмагла Шимали Африкада доминантлыгларыны тәкмилләшдирсинләр”.
Чыхышынын диҝәр гисминдә Ајәтуллаһ Хаменеи Мүбарәк Рамазан ајы вә оруҹлуғун илаһи һәдијјә, тәгваја јетишмәк үчүн зәмин олдуғуну гејд едиб. Һәзрәт Имам Сәҹҹадын (ә) “Мәкаримүл-әхлаг” дуасындан мүәјјән һиссәләринә тохунан Ајәтуллаһ Хаменеи бу һагда дејиб: “Мүхтәлиф мүстәвиләрдә әдаләти ҝенишләндирмәк, гәзәбини боғмаг, мәнтиг вә аргументләрә ујғун һәрәкәт етмәк, ихтилаф вә гаршыдурмадан чәкинмәк, инсанлары өзүндән узаглашдырмаг әвәзинә, онлары өзүнә ҹәлб етмәк үчүн сәј ҝөстәрмәк, әтрафындакыларын давранышында мүсбәт ҹәһәтләри ҝөрүб гејд етмәк, киминсә мәнфи ҹәһәтини ҹамаат арасында ачыгламагдан чәкинмәк тәгванын шәртләриндәндир”.
Диггәт: Хәбәрдән истифадә етди
