Әһли Бејт - АБНА - хебер аҝентлијинин вердији хәбәрә әсасән: Тәһсил назири Мисир Мәрдановун халасы оғлу һәбс едилиб. Бу барәдә “Азадлыг” а дахил олан мәлуматда дејилир ки, назирин халасы оғлунун һәбси Тәһсил Назирлијинин Тәсәррүфат һесаблы Әсаслы Тикинти Идарәсиндәки коррупсија фактлары илә бағлыдыр. Мисир Мәрдановун халасы оғлу Аллеһверди Дәмиров бу идарәнин рәисидир. Коррупсија фактлары Республика Прокурорлуғу вә Малијјә Назирлији тәрәфиндән апарылан арашдырмалар заманы үзә чыхыб.
Мәлуматлара ҝөрә, коррупсија фактларынын ашкар едилмәсинә ҝөрә бундан сонра Тәсәррүфат һесаблы Әсаслы Тикинти Ыдарәси тикинти-тәмир ишләрилә мәшғул ола билмәјәҹәк.
Баш Прокурорлуг бу јахынларда мәктәбләрин тикинтиси заманы јол верилмиш ганун позунтулары илә әлагәдар апарылмыш арашдырмаларын нәтиҹәси барәдә рәсми мәлумат ачыглајыб. Билдирилиб ки, Баш прокурорлуг вә Малијјә Назирлији тәрәфиндән апарылан арашдырма нәтиҹәсиндә Бакы шәһәри Сураханы рајону, Сураханы гәсәбәсиндә јерләшән 85 нөмрәли вә Хәзәр рајону Мәрдәкан гәсәбәсиндә јерләшән 123 нөмрәли орта мәктәбләрин әсаслы тикинтиси заманы ҹидди ганун позунтуларына јол верилмәси фактлары мүәјјән едилиб. Мүәјјән едилиб ки, тикинтисинин смета дәјәри 341 мин 965 манат олан 85 сајлы мәктәбдә “Азәрбәрпа” ММC - нин вәзифәли вә мадди мәсул шәхсләри тәрәфиндән иш һәҹми 35 мин 261 манат шиширдилиб, 11.666 манат иш исә фактики јеринә јетирилмәјәрәк дөвләт вәсаити мәнимсәнилиб.
849 мин 821 манат смета дәјәри олан 123 сајлы мәктәбдә “Рамил” мүәссисәсинин вәзифәли вә мадди шәхсләри тәрәфиндән иш һәҹминин 50.359 манат шиширдилдији, 28 мин 793 манат мәбләғиндә ишин исә үмумијјәтлә ҝөрүлмәјәрәк дөвләт әмлакынын мәнимсәнилдији ашкар едилиб.
“Лајиһә-смета сәнәдләриндән кәнарлашмалара, кејфијјәтсиз ишләр ҝөрүлмәсинә вә бу кими диҝәр ганун позунтуларына бахмајараг, гејд олунан мәктәб биналары Тәһсил Назирлијинин мүвафиг комиссијасы тәрәфиндән гәбул олунмагла истисмара верилиб”, - дејә Баш Прокурорлуг билдириб.
Баш прокурор јанында Коррупсијаја гаршы Мүбаризә идарәси тәрәфиндән гејд олунан мәктәбләрдә әсаслы тикинти ишләрини һәјата кечирмиш “Азәрбәрпа” ММҸ вә “Рамил” фирмасынын вәзифәли шәхсләри барәсиндә вәзифә сәлаһијјәтләриндән суи - истифадә етмә вә күлли мигдарда өзҝә әмлакыны мәнимсәмәјә ҝөрә Ҹинајәт Мәҹәлләсинин 308.1 вә 179.3.2- ҹи маддәләри илә бағлы ҹинајәт иши башланыб.
Аллаһверди Дәмировдан әввәл Тәһсил Назирлијинин башга бир әмәкдашы - Орхан Кәримов да рүшвәт фактына ҝөрә һәбс едилмишди.
Диггәт: Хәбәрдән истифадә етдикдә мәнбәјә истинад лазымдыр
