Әһли Бејт -АБНА- хәбәр аҝентлијинин вердији хәбәрә әсасән: Азәрбајҹанлыларын Түрк бизнесинә “һүҹуму” давам едир. Бу јахынларда президент Илһам Әлијевин әмиси оғлу Илгар Әлијев дә Анталјада ҝөрүнәрәк туризм секторуна сәрмајә јатырмаг нијјәтиндә олдуғуну ачыглајыб. Илгар Әлијев бу ачыгламаны медиаја дејил, Түркијәдәки достларына вериб. Сәрмајә гојулушундан әввәл Илгар Әлијев Түркијәнин танынмыш бир вәкили илә мәсләһәтләшиб. Бу вәкиллә исә ону Бакыда да јығҹам бир бизнеси олан түркијәли иш адамы ҹалашдырыб. Бу васитәчинин персонасы исә чох мараглыдыр.
Јашар Бабаташ адлы һәмин иш адамы 90-ҹы илләрин орталарындан Илһам Әлијевлә хүсуси јахынлығы олан аиләнин нүмајәндәсидир. Онун атасы Һикмәт Бабаташ Истанбулдакы “Свисс Отел”ин казиносуну ишләдән шәхс кими мәшһур иди, амма о заманлар отел иши илә дә мәшғул олараг танынырды. Һәмин заманларда Јашар Бабаташын атасы Һикмәт Бабаташла Түркијәјә чох тез-тез ҝедиб-ҝәлән Илһам Әлијев арасында јахын достлуг мүнасибәтләри јараныб. Әлбәттә, биз ону вурғуламаг истәмирик ки, бу мүнасибәтләрин әсасында бабаташларын казино сөһбәтләри олуб. Тамам башга мүнасибәтләр дә ола биләрди. Бахмајараг ки, һәмин заманларда казино галмагалы Азәрбајҹанын сијаси һәјатына да мүдахилә етмишди. Бу олајлар, һәтта Түркијә вә Азәрбајҹан мәтбуатына да сычрамышды.
Мәсәлән, 1998-ҹи илдә Түркијәдә чыхан “Һүрријет” гәзетинин 14 феврал тарихли сајында белә бир хәбәр јер алмышды: “Азербајҹан Ҹумһурбашканы Һајдар Алијев’ин, Сусурлук Рапору неденијле теһликеје ҝирен Түркије зијарети сыҹак башлады. Дүн саат 15.50’де Истанбул Ататүрк Һавалиманы’на инен Алијев’и, Ҹумһурбашканы Демирел, еши Назмије Демирел, Милли Савунма Баканы Исмет Сезҝин иле Девлет Баканы Аһат Андиҹан төренле каршылады... Девлет Конукеви’нде Алијев’и, ”Азиз кардешим, деғерли достум" дијерек селамлајан Демирел, “Сон 4-5 јыл ичинде Алијев’ин башканлығында Азербајҹан’да чок ҝүзел ҝелишмелер олду” деди. Алијев исе ики үлке достлуғунун “ебеди” олдуғуну сөјледи. Алијев, Сусурлук Рапору’нда, оғлу Илһам Алијев’ин, өлдүрүлен Өмер Лүтфү Топал’а 500 бин долар борҹу олдуғу јолунда ифаделер үзерине Түркије зијаретини иптал етмеје калкышмышты. Демирел’ин девреје ҝирмесијле Алијев бу карарындан вазҝечмишти".
Амма бу Топал рапортуна гәдәр Һикмәт Бабаташ адлы казиночу өлдүрүлмүш вә олајын ичинә ПКК белә ҝирмишди.
Һикмәт Бабаташ 1996-ҹы илин апрел ајында, гурбан бајрамынын биринҹи ҝүнү бизнес ортағы, о заманлар “Гумарханалар кралы” һесаб едилән Өмәр Лүтфи Топалын ҝөстәриши илә өлдүрүлдү. Бу гәтлин сәбәби илә бағлы мүхтәлиф версијалар ирәли сүрүлүб. Амма даһа чох јер алан сәбәб Бодрумдакы бир отел үзәриндә анлашылмазлыгла бағлы олуб.
Һикмәт Бабаташын өлүмү вә бу өлүм үзәриндә гурулан истинтаг әтрафында әсл детектив филминә бәнзәр ссенари һазырланмышды. Топал мафијасы Бабаташын өлүмүнә ҝөрә кимләрисә ҝүдаза вермәли идиләр вә бунун үчүн адамлар да һазырланмышды ки, әсл гатилләр вә ҹинајәти сифариш едәнләр мәсулијјәтдән јајына билсинләр. Ссенаријә ҝөрә, Јусуф Кајапынар адлы шәхс хәјалларында белә тәсәввүр едә билмәјәҹәји бир мөвгејә ҝәтирилир - “Сејһан” адлы отелин казиносуна мүдир тәјин едилир, алтына да баһалы бир автомобил гојулур. Ссенаринин сонрасына ҝөрә, Јусуф Кајапынар Гурбан бајрамыјла әлагәдар гоһумларынын јашадығы Мәрсинә ҝедир, орада гоһумларындан икисини - Метин Ајдоғмушу вә Ерҝүн Мүждени дә автомобилә миндирәрәк “Мерсинә ҝәлмишкән, бир Бодрума да баш чәкиб динҹәләк” дејир. Бодрумда бу груп тәсадүфән Һикмәт Бабаташа раст ҝәлир вә Метин Ајдоғмуш Һикмәт Бабаташа дејир ки, “Реҝал Отел”ин иншаат ишләриндә ики ајдан артыг ишләмишәм, амма пулуму ала билмәмишәм, мәним пулуму вер". Бу зәминдә мүбаһисә силаһа әл атмагла баша чатыр вә Мәтин Ајдоғмуш Һикмәт Бабаташдан зирәк тәрпәнәрәк ону өлдүрүр.
Бу, Топал мафијасынын гурдуғу ссенари иди.
Амма истинтаг мүәјјән етди ки, сахта вәзифәјә ҝәтирилән Јусуф Кајапынар автомобил сүрмәји баҹармыр. Бундан әлавә, нә Метин Ајдоғмуш, нә дә Ерҝүн Мүжде һәјатлары боју бир дәфә дә олсун, Бодрумда олмаға имкан тапмамышдылар. Сахта мүттәһимләрин ҝерчәк гатилләрлә бир јердә үч ҝүн әрзиндә тәлим кечмәсинә, деталларла бағлы әтрафлы мәлумат алмаларына бахмајараг, онлар истинтагын илк суалларындан чашыб галдылар, Топал исә гәтлин тәшкилатчысы кими ахтарыша верилди.
Јашар Бабаташ исә истинтагла паралел олараг атасынын гатилләрини ахтарыб онлардан гисасыны алмаг үчүн тәдбирләр ҝөрмәјә башлады. Мәсәләнин бу тәрәфи дә мүдһиш бир филми хатырладыр.
Һадисәни изләјәк вә өнҹә Өмәр Лүтфи Топалын оғлу Мурат Топалын истинтага вердији ифадәсинә бахаг: “Һикмәт Бабаташ Бодрумдакы ”Реҝал Ресорт" отелинин казиносуну атамла шәрик ишләдирди. Никмәт Бабаташ пајыны сатмаг истәди, атам да алмаг истәди. Анҹаг Бабаташ чох пул истәдијинә ҝөрә анлаша билмәдиләр. Буна ҝөрә дә араларында сүртүшмәләр чыхды. Сон заманлар һеч јола ҝетмирдиләр. Буна ҝөрә дә атам Һикмәт Бабаташы өлдүртдүрдү. Амма бу һадисәләрин деталларыны билмирәм. Атамын көһнә танышларындан олан Сүлејман Чап бу ишләрин ичиндә иди, мәним дә ондан хошум ҝәлмәдијинә ҝөрә бу олајлара хүсуси мараг ҝөстәрмәдим. Билдијим гәдәр, Һикмәт Бабаташы Иһсан Каракајалы вә Ариф Балкан өлдүрүб. Силаһы исә Муғла ҝөлүнә атдыгларыны ешитдим..."
Өлдүрүлән Һикмәт Бабаташын оғлу Јашар Бабаташ исә атасынын гисасыны алмаг үчүн мүәјјән чалышмалара башлајыр. Илк нөвбәдә үзүнү тәбии ки, ПКК-ја тутур. Өмәр Лүтфи Топалын ПКК-ја һагг өдәдији о заманлар һәр кәсә бәлли иди. Буна бахмајараг, Јашар Бабаташ да онларла анлаша билир вә о заманкы пулла 20 милјард лирә мүгабилиндә Топалын өлүмүнү сифариш едир.
Бу анлашманын үстүнү дә Јашар Бабаташ өзү истинтага билдирир. Һәм дә тәсадүфи бир һадисә ону истинтага апарыб чыхарыр. Топалы өлдүрмәк үчүн отелиндә сахладығы ПКК террорчуларындан бири - Дибистан Пәришан еһтијатсыз давраныр вә туалетдә оларкән белинә бағладығы партлајыҹы гурғу ишә дүшүр. Бу гәтлин арашдырмасы заманы да Јашар Бабаташын ПКК илә анлашмасы үзә чыхыр. Јашар Бабаташ истинтага бу мәлуматлары верир: “Атамы Топал өлдүртдүрдү вә буна ҝөрә дә, ону вә оғлу Мурад Топалы өлдүрмәк үчүн ПКК илә 20 милјард лирәјә анлашдыг. Топал ”Реҝал Ресорт" отелинә ортаг олдугдан сонра атама вермәли олдуғу пулу вермирди вә буна ҝөрә дә араларында наразылыг јаранмышды. Буна ҝөрә дә атамы өлдүртдүрдү. Мән Топалы өлдүртдүрмәк үчүн ПКК илә илишҝи гурдум. Бу илишҝиләри Истанбулда код ады Һасан олан Сиддиг Бүлбүллә башлатдыг. Онунла данышдыг, о да бизә тәшкилатын мәсул адамларыјла ҝөрүшүб бизә бир хәбәр верәҹәјини сөјләди. Сонра 20 милјард истәдиләр. Разылашдыг. Биз Топалын өлдүрүлмәси һазырлыгларыны апаракән хәбәр ҝәлди ки, “Топалын тендери битди вә гәләми гырылды”. ПКК Топалы өлдүрмәјә маҹал тапмамыш ону Абдулла Чатлы өлдүрдү. Биз дүшүндүк ки, Мурад Топал атасыны бизим өлдүрдүјүмүзү зәнн едиб бизи вураҹаг. Она ҝөрә дә биз ону габагламаг үчүн ПКК илә илишҝиләри давам етдирдик, Мурад Топалын ев вә иш јерләрини онлара ҝөстәрдик. Амма бир мүддәт сонра Мурадла ҝөрүшүб анлашдыг вә бир-биримизи өлдүрмәк фикриндән ваз кечдик. ПКК-ја бу билҝији вердик".
