Әһли Бејт -АБНА- хәбәр аҝентлијинин вердији хәбәрә әсасән: Дүнја Мүсәлманларынын Али Лидери Ајәтуллаһ Имам Хаменеи меһдичилик үзрә ихтисаслашмыш устадлар, мүтәхәссисләр, мүәллифләр вә мәзунларла буҝүнкү ҝөрүшү заманы тарих боју пејғәмбәрләрин фәалијјәтинин вә гатлашдыглары әзијјәтләрин һәдәфи кими, меһдичилик мөвзусунун чох јүксәк әһәмијјәт кәсб етдијинә тохунараг гејд етди ки, Имамын (ә.ф) зүһуруну ҝөзләмәк меһдичилик әгидәсинин ајрылмаз һиссәсидир. О вурғулады: “Меһдичилик мәсәләсиндә ән мүһүм вә зәрури олан ишләрдән бири дә мөвзунун әсл мүтәхәссисләри тәрәфиндән дәгиг, елми ҹәһәтдән әсасландырылмыш ишләрин артырылмасы, авамјана, ҹаһиланә, гејри-мөтәбәр, тәхәјјүл вә фантазијаја әсасланан ишләрдән чәкинмәкдир”.
Һәзрәт Ајәтуллаһ Хаменеи әввәлҹә меһдичилик мөвзусунун әһәмијјәтини ачыглајараг вурғулады ки, бу әгидә али дин тәлимләриндә өнәмли јер тутан бир нечә башлыҹа мәсәләләр сырасында јер алыр. О, әлавә етди: “Пејғәмбәрләрин фәалијјәтинин вә Јер үзүнә ҝөндәрилмә миссијасынын һәдәфи төвһид чәрчивәсиндә, әдаләтә, инсанын варлығындакы бүтүн потенсиаллардан истифадәјә әсасланан бир дүнјанын гурулмасыдыр. Имам Заманын (ә.ф) зүһуру дөврү исә төвһид, мәнәвијјат, дин вә әдаләтин инсанларын фәрди вә иҹтимаи һәјатынын бүтүн сфераларына һәгигәтән һаким олаҹағы бир дөврдүр”.
Али Мәгамлы Рәһбәр ашағыдакылары вурғулады: “Меһдичилик олмаса, пејғәмбәрләрин бүтүн сәјләри, чәкдикләри әзаб-әзијјәтләр фајдасыз вә тәсирсиз олар”.
Илаһи динләрдә меһдичилик мөвзусунун нә кими јер тутдуғу һагда данышан Һәзрәт Ајәтуллаһ Хаменеи деди: “Демәк олар, бүтүн илаһи динләрдә меһдичилијин һәгигәти илә бағлы үмуми мәгамлар өз әксини тапыб. Ислам дининдә исә бу мөвзу гејд-шәртсиз реал һесаб олунан мәсәләләрдән биридир. Ислам мәзһәбләри арасында шиә мәзһәби меһдичилик мәсәләсини ачыг-ашкар сүбутларла, зүһуру ҝөзләнән шәхсин аиләси вә кимлији һагда шиә вә гејри-шиә мәнбәләриндәки рәвајәтләрдән ҝөтүрүлмүш деталларла гејд едир”.
Али Мәгамлы Рәһбәр меһдичилик мөвзусунун әһәмијјәтини, илаһи динләр вә Ислам мәзһәбләриндәки мөвгејини ачыгладыгдан сонра бу идеолоҝијанын ајрылмаз һиссәси кими, зүһурун интизарында олмаг мәсәләси һагда данышды. О деди: “Интизар ҹанлы бир инсаны, мүтләг бир һәгигәти ҝөзләмәк, ҝәлишинә үмид бәсләмәк мәнасындадыр. Бу мәнада интизарын мүәјјән шәртләри вар ки, онларын сырасында инсанын ҝөзләдији дөврә, о дөврдә мүшаһидә олунаҹаг хүсуси шәраитә мәнәви-психоложи, һәмчинин иҹтимаи ҹәһәтдән һазырлыглы олмасы да јер алыр”.
Һәзрәт Ајәтуллаһ Хаменеи бу барәдә ашағыдакылары да гејд етди: “Зүһурун интизарында олан шәхс ҝөзләдији дөврүн хүсусијјәтләрини даим өзүндә горумалы вә ҝүҹләндирмәлидир. Бу елә бир интизардыр ки, һеч вахт онун нә узунмүддәтли олаҹағыны, нә дә чох гыса сүрәҹәјини ҝүман етмәк лазым дејил”.
Һәзрәт Саһибәззаманын (ә.ф) зүһур едәҹәји дөврүн өзәлликләринә тохунан Али Мәгамлы Рәһбәр ашағыдакылары вурғулады: “О һәзрәтин дөврү төвһид, әдаләт, һагг, ихлас вә Аллаһа ибадәтин һакимијјәт дөврү олаҹаг. Елә буна ҝөрә дә зүһурун интизарында олан инсанлар даим бу кејфијјәтләрә даһа да јахынлашмаг үчүн чалышмалы, мөвҹуд вәзијјәтләри илә гане олмамалыдырлар”.
Һәзрәт Ајәтуллаһ Хаменеинин меһдичилик мөвзусу илә бағлы тохундуғу үчүнҹү мәгам дәгиг, елми ҹәһәтдән әсасландырылмыш ишләрин һәјата кечирилмәсинин ваҹиблији олду. О деди: “Меһдичилик мөвзусу илә бағлы бөјүк тәһлүкәләрдән бири дә авамјана, ҹаһиланә, мәнбәләрлә әсасландырылмамыш, тәхәјјүл вә фантазијалар үзәриндә гурулан ишләрдир. Бунлар јаланчы иддиачыларын ортаја чыхмасы, ҹамаатын зүһурун интизарында олмағын ҝерчәк маһијјәтиндән узаглашмасы үчүн зәмин јарада биләр”.
Өзүндә, јахуд башга бир шәхсдә зүһур әламәтләринин олдуғуну иддиа едән јаланчы инсанлара тарих бојунҹа раст ҝәлиндијини гејд едән Һәзрәт Ајәтуллаһ Хаменеи бунлары әлавә етди: “Бу кими һалларын һамысы јанлыш вә аздырыҹы әмәлләрдир. Чүнки зүһурун әламәтләри илә бағлы гејд олунмуш бәзи мәсәләләр истинад едилмәси үчүн зәифдир. Мөтәбәр һесаб олунан мәгамлары исә кимәсә асанлыгла шамил етмәк мүмкүн дејил”.
Али Мәгамлы Рәһбәр һәмчинин вурғулады: “Белә јанлыш вә аздырыҹы һаллар меһдичилик вә интизарын әсл маһијјәтинин диггәтдән кәнарда галмасына сәбәб олур. Буна ҝөрә дә авамјана ишләрдән вә шајиәләрдән кәскин сурәтдә чәкинмәк лазымдыр”.
Һәзрәт Ајәтуллаһ Хаменеи деди: “Әлбәттә, меһдичилик мөвзусунда мәнбәләрә әсасланан елми ишләр ҝөрмәк дә һәдис вә риҹал елмләрини јахшы билән, фәлсәфи мәсәләләр вә дүшүнҹә тәрзи илә танышлығы олан мүтәхәссисләрин өһдәсинә дүшүр”.
Али Мәгамлы Рәһбәрин меһдичилик мөвзусу илә бағлы тохундуғу сонунҹу мәсәлә Имам Замана тәвәссүл етмәк, о һәзрәтлә мәнәви үнсијјәтдә олмаг мәсәләси иди.
Һәзрәт Ајәтуллаһ Хаменеи бу барәдә ашағыдакылары гејд етди: “Меһдичилик әгидәси илә дүзҝүн вә елми танышлыг инсанын Һәзрәт Саһибәззаманла (ә.ф) даһа чох мәнәви үнсијјәт јаратмасы, али мәгсәдләрә доғру даһа да сүрәтлә ирәлиләмәси үчүн зәмин јарада биләр”.
Али Мәгамлы Рәһбәр ашағыдакылары да вурғулады: “Һәзрәтлә үнсијјәтә ҝирмәк вә Она тәвәссүл етмәк мәсәләсиндә дә дүзҝүн вә нәзәрдә тутулан вариант узагдан тәвәссүл, һәзрәтин диггәтини узагдан ҹәлб етмәјә ҹан атмагдыр. Һәзрәт Меһди (ә.ф), иншаллаһ ки, буну гәбул едир. Һәзрәтлә әјани ҝөрүш јолу илә үнсијјәт гурмаг һаггында бәзи авамјана иддиалар вә бу барәдә ҝәзән сөз-сөһбәтләр, әксәријјәт етибарилә, јаландыр, тәхәјјүлүн мәһсулудур”.
Чыхышынын диҝәр гисминдә Һәзрәт Ајәтуллаһ Хаменеи мәсул шәхсләрә тәшәккүрүнү билдирәрәк Һөҹҹәтүл-Ислам вәл-мислимин Гираәтинин мүхтәлиф сфералардакы, хүсусилә дә намаз, зәкат, тәфсир, меһдичилик, савадсызлыгла мүбаризә мәсәләләри илә бағлы сајсыз-һесабсыз хидмәтләринә тохунараг деди: “Ҹәнаб Гираәти чох ҝөзәл нүмунә, лајигли бир өрнәкдир. Чүнки о, даим чохсајлы бошлуг вә еһтијаҹларын һисс олундуғу сфераларда хидмәтләр ҝөстәриб. Белә бир сәј вә әзмин дәјәри исә икигатдыр”.
Сырф Аллаһ наминә, ихласлы нијјәтин ишләрин ирәлиләмәсинә һејрәтамиз тәсир ҝөстәрдијини гејд едән Али Мәгамлы Рәһбәр мүхтәлиф сфераларда ҝөрүлмүш ишләри давам етдирмәк лазым олдуғуну да вурғулады.
