Әһли Бејт -АБНА- хәбәр аҝентлијинин вердији хәбәрә әсасән: АДП Имишли Рајон Тәшкилатынын сәдри, “Һүрријјәт” гәзетинин бөлҝә мүхбири вә “Күр” Вәтәндаш Гәрарҝаһынын үзвү Мәһбуб Зүлфүгарлы өтән ил Күр әтрафы рајонларда баш вермиш сел дашгынларынын нәтиҹәләринин арадан галдырылмасында негатив һалларын, малијјә јејинтиләринин вә коррупсија фактларынын үзә чыхарылмасында актив иштирак етдијинә ҝөрә Имишли рајонунун јерли мәмурлары тәрәфиндән вәһшиҹәсинә дөјүләрәк мүхтәлиф дәрәҹәли ағыр бәдән хәсарәтләри алыб. О, бу һадисә илә бағлы Имишли Рајон Полис Шөбәсинә мүраҹиәт етсә дә, онун мүраҹиәтинә бахылмајыб. М.Зүлфүгарлынын дөјүлмә нәтиҹәсиндә чәнә сүмүјүнүн сынмасына бахмајараг јерли рајон хәстәханасы тәрәфиндән она тибби јардым ҝөстәрилмәсиндән имтина едилиб.
Баш верән һадисә илә бағлы Азәрбајҹан Демократ Партијасы бәјанат јајыб. Партијанын мәтбуат хидмәтиндән дахил олан мәлуматда билдирилир ки, М.Зүлфүгарлынын дөјүлмәси факты фундаментал инсан һүгуг вә азадлыгларынын позулмасы, јерли мәмурларын өзбашыналығыдыр. Бәјанатда даһа сонра дејилир:
“АДП М.Зүлфүгарлынын вәһшиҹәсинә дөјүлмәсини вә ишҝәнҹәләрә мәруз галмасыны онун сијаси вә иҹтимаи фәалијјәти илә бағлы олдуғуну билдирир бу зоракылыг фактыны һакимијјәт органларынын мүхалифәт дүшәрҝәсинә гаршы апардығы репрессија сијасәтинин тәркиб һиссәси кими дәјәрләндирир.
АДП М.Зүлфүгарлынын дөјүлмәси факты илә бағлы јерли һүгуг мүһафизә органларына етдији мүраҹиәтә бахылмамасыны, онун дөјүлмә заманы ағыр бәдән хәсарәтләри алмасына бахмајараг рајон хәстәханасына гәбулуна вә мүалиҹәсинә имкан верилмәмәсини антиинсани, антиһуманист аддым вә өлкәдә һөкм сүрән дәрәбәјлијин тәзаһүрү һесаб едир.
АДП һакимијјәт органларындан М.Зүлфүгарлынын дөјүлмәси фактында иштирак едән шәхсләрин дәрһал мәсулијјәтә ҹәлб олунмасыны, онун мүалиҹәсинә шәраит јарадылмасыны тәләб едир, әкс һалда бүтүн мәсулијјәтин һакимијјәтин үзәриндә галаҹағыны бәјан едир.
АДП Омбудсман Апаратыны, Азәрбајҹанда фәалијјәт ҝөстәрән бејнәлхалг тәшкилатлары вә дипломатик корпус нүмајәндәләрини өз сәлаһијјәтләри чәрчивәсиндә баш вермиш кобуд ганун позунтусуна мүдахилә етмәјә чағырыр.”
Диггәт: Хәбәрдән истифадә етдикдә мәнбәјә истинад лазымдыр
