Әһли Бејт -АБНА- хәбәр аҝентлијинин вердији хәбәрә әсасән: Һагг Јолу Елм вә Мәдәнијјәт Институту (ҺЈЕМИ), Һиҹаб вә Һиҹаб Гадағасы Мәһбусларыны Мүдафиә Комитәси (ҺҺГМ МК), Мүбариз Руһаниләр Ҹәмијјәти (МРҸ) Азәрбајҹан Республикасында ДЕВАММ-ын тәшәббүсү илә орта мәктәбләрдә һиҹаб проблеминин һәлли үчүн Азәрбајҹан дөвләт башчысына јүз мин вәтәндашын мүраҹиәти илә әлагәдар кампанија тәдбирини мүзакирә етмиш вә вахтында атылмыш бу зәрури аддымла бағлы бәјанат јајмышдыр.
Бәјанатын мәтни:
Рәһман вә Рәһим Аллаһын ады илә
Һагг Јолу ЕМИ, ҺҺГМ МК вә МРҸ Азәрбајҹан Республикасынын танынмыш илаһијјатчы алими Һаҹы Илгар Ибраһимоғлунун рәһбәрлији алтында ДЕВАММ-ын орта мәктәбләрдә һиҹаб проблеминин һәлли үчүн Азәрбајҹан дөвләт башчысына јүз мин вәтәндашын мүраҹиәти илә әлагәдар кампанија тәдбирини дәстәкләјир вә бу кампанијаја гатылыр. Бу мүһүм тәдбирин тәшкилинә ҝөрә ДЕВАММ вә онун рәһбәрлијинә дәрин миннәтдарлығымызы билдириб диггәти бир нечә зәрури нөгтәјә јөнәлдирик:
1.Азәрбајҹан Республикасында гејри-рәсми Һиҹаб Гадағасы артыг сон илләрдә ҝүндәмдән дүшмәјән глобал анти-ислам лајиһәнин тәркиб һиссәсидир. Бу гадағадан өнҹә шәхсијјәт вәсигәләриндә өртүклү фотонун јасагланмасы, азана гадаға, мәсҹидләрин сөкүлмәси, дөври сурәтдә тәһсил оҹаглары вә мүәссисәләрдә һиҹаб гадағасы, үмумијјәтлә диндарларын сечиб-сечилмәк кими ибтидаи инсан һагларынын мәһдудлашдырылмасы, сонда руһани-тәләбәләрин, фәал диндарларын шәрләнәрәк һәбсә алынмасы сүбута јетирир ки, Һиҹаб Гадағасы локал бир проблем дејил вә Бөјүк Азәрбајҹан Халгы бу кампанијанын ардынҹа диҝәр һагларынын мүдафиәсинә галхасыдыр. Бу ҝүн дини инанҹына ҝөрә 37 вәтәндаш һәбсдәдир. Халг онларын талејинә биҝанә гала билмәз.
2. “Јүзминлик имза кампанијасы кимә лазымдыр?” контекстиндә мүхалифәт гәбуледилмәздир вә һеч шүбһәсиз дини кәсимин истәкләринә ҹаваб вермир. Бәзиләри дүшүнүр ки, Һиҹаб Гадағасынын габардылмасы Һиҹаб Мәһбусларынын јаддан чыхмасы илә сонуҹланаҹаг. Һиҹаб гадағасынын ләғви вә Һиҹаб Мәһбусларынын азадлығы сых бағлы олан ики зәрури тәләб вә вәзифәдир – ејнән намаз вә оруҹ кими. Чох заман биләрләкдән ја билмәјәрәкдән “намазсыз оруҹ, оруҹсуз намаз гәбул дејил” дејәрәк Исламдакы тәдриҹилик принсипини нәзәрә алмамыш вә милјонларла инсаны дини вәзифәләрин иҹрасындан чәкиндирмишләр. Биз дејә билмәрик ки, һиҹаб гадағасы ҝөтүрүлмәсә һиҹаб мәһбусларынын азадлыға чыхмасыны истәмирик. Дејә билмәрик ки, һиҹаб мәһбуслары азад олмаса, һиҹаб гадағасынын ләғвини истәмирик. Бу вәзифәләр намаз вә оруҹ кими Аллаһ тәрәфиндән тәјин олунмушдур вә биз јалныз вәзифәмизи јеринә јетиририк.
3. Президентә мүраҹиәт о демәк дејил ки, Гадир Аллаһын Азад Бәндәләри кимәсә јалварышла ағыз ачыр, өз һаггыны диләнир. Мүсәлманларын, руһанијјәтин иззәт вә шәрәфи јол вермир ки, дини кәсим Аллаһдан гејрисинин гаршысында әјилсин. Шүбһәсиз ки, кампанијанын ҝедиши боју мүсәлманлар башыны дик тутаҹаг вә өз һаггыны ҝүзәштә ҝетмәјәҹәк.
4. Биз “Јүзминлик имза кампанијасы”на гатылмагла јанашы Ислам Партијасынын етираз аксијаларыны дәстәкләјир, парламентдән јүз мин сәс үзәриндә дајанмыш һаггымызы тәләб едирик.
5. Азәрбајҹан Республикасында гејри-рәсми Һиҹаб Гадағасыны гүввәјә миндирән вә бу ишин архасында дуранларын тезликлә ганун чәрчивәсиндә ҹәзаландырылмасыны тәләб едирик.
Диггәт: Хәбәрдән истифадә етдикдә мәнбәјә истинад лазымдыр
