Әһли Бејт -АБНА- хәбәр аҝентлијинин вердији хәбәрә әсасән: Ислам Ингилабынын Лидери Һәзрәт Ајәтуллаһ Хаменеи Судан Республикасынын президенти Өмәр Әл-Бәшир вә ону мүшајиәт едән нүмајәндә һејәти илә ҝөрүшүб. Хамнеји һәзрәтләри сон дөврдә реҝионда баш верән халг һәрәкатларынын мүсәлман өлкәләриндә вә реҝионда әсаслы бир дәјишиклијин башланғыҹы олдуғуну гејд едәрәк билдирди: “Үмидварам ки, јахын ҝәләҹәкдә Шимали Африкада мөһкәм бир мүсәлман иттифагынын шаһиди олаҹағыг”.
Мисир, Тунис вә Ливијадакы ислами ојанышын ону севиндирдијини билдирән Һәзрәт Ајәтуллаһ Хаменеи реҝионда баш верән халг һәрәкатларынын Америка, Гәрб вә сионистләрин мәнафејинә ујғун олмадығыны дејәрәк әлавә етди: “Мәһз буна ҝөрә дә ајыг-сајыг олмаг лазымдыр ки, Америка вә Гәрб бу халг һәрәкатларынын өз тәбии мәҹрасы илә давам етмәсинә мане олмасын, онлардан өз хејринә истифадә етмәсин”.
Һәзрәт Ајәтуллаһ Хаменеи деди: “Әлбәттә, Америка вә Гәрб бу гыса мүддәт әрзиндә һеч бир иш ҝөрә билмәјәҹәк. Лакин, һәр һалда, реҝиондакы халг һәрәкатларынын истәнилән формада јанлыш бир истигамәтә јөнәлдилмәсиндән, јахуд јаделлиләрин бу һәрәкатлардан суи-истифадә етмәсиндән еһтијатлы олмаг лазымдыр”.
Мисир һадисәләрини реҝиондакы дәјишикликләрә мүһүм тәсир етмиш бир амил кими дәјәрләндирән Али Мәгамлы Рәһбәр әлавә етди: “Америка вә Исраилин Мисирдәки мөһкәм мөвгеләри бу ҝүн сарсылыб. Америка вә ондан асылы олан бәзи диҝәр дөвләтләр јахын ҝәләҹәкдә олмаса белә, илләр сонра Мисири башга истигамәтә јөнәлтмәјә чалышырлар”.
Тарих боју шәхсијјәтләрин вә ингилаби һәрәкатларын заман кечдикҹә тәдриҹән дәјишикликләрә уғрамасы фактларына раст ҝәлиндијини гејд едән Али Мәгамлы Рәһбәр ашағыдакылары вурғулады: “Реҝионумузда ҝедән просесләрин белә бир һалла нәтиҹәләнмәсинә имкан вермәк олмаз”.
Һәзрәт Ајәтуллаһ Хаменеи Ливијада баш верән һадисәләрлә бағлы ашағыдакылары деди: “Ливијадакы вәзијјәт бизи сон дәрәҹә нараһат едир. Чүнки Ливијадакы халг һәрәкаты ҹидди вә реал бир гијамдыр. Гәрблиләр исә бу ҝерчәк халг һәрәкатынын мүсбәт сонуҹланмасына имкан вермәмәкдә гәрарлыдырлар”.
“Гәрбин Ливијаја һәрби мүдахиләсинин сәбәби дә мәһз будур” – дејән Али Мәгамлы Рәһбәр әлавә етди: “Гәрблиләр Ливијада – Гәрбин бир аддымлығында исламјөнлү бир һөкумәтин тәшкил олунмасындан чох горхурлар вә буна мане олмаг истәјирләр”.
Сөһбәтинин диҝәр һиссәсиндә Суданла бағлы мәсәләләрә, Гәрбин бу өлкәјә етдији тәзјигләрә тохунан Имам Хаменеи вурғулады: “Иран Ислам Республикасы өз мүстәгиллијини, исламчылығыны вә әрази бүтөвлүјүнү горујуб сахламагда гәрарлы олан Судан дөвләтини, халгыны вә һаким ислами режими дәстәкләјир”.
Хаменеи һәзрәтләри әлавә етди: “Судан дөвләтинин вә халгынын Америка, Исраил вә Гәрбин мәкрли планлары, тәзјигләри гаршысындакы мүбаризлији, мәтинлији тәгдирәлајигдир”.
Али Мәгамлы Рәһбәр һәмчинин ашағыдакылары да вурғулады: “Һазыркы шәраитдә Судандакы бүтүн партија вә ҹинаһлар ајыг-сајыг олмалы, бир јумругда бирләшмәлидир”.
Өлкә президенти ҹәнаб Маһмуд Әһмәдинежадын да иштирак етдији ҝөрүшдә Судан Республикасынын президенти ҹәнаб Өмәр Әл-Бәшир Судан-Иран әлагәләрини мөһкәм вә мүсбәт әлагәләр кими дәјәрләндирди. Өлкәсинә вердији дәстәјә ҝөрә Иран Ислам Республикасына гәдирданлығыны билдирән Судан президенти деди: “Гәрбин тәзјигләринә бахмајараг, Судан дөвләти вә халгы бу тәзјигләрин гаршысында мөһкәм дуруб, ҝәләҹәјә үмидлә бахырлар”.
Реҝионда ҝедән дәјишикликләри мүсбәт дәјәрләндирән вә просесләрин Ислам өлкәләринин хејринә олдуғуну билдирән Судан президенти деди: “Реҝионун вәзијјәти халг һәрәкатларындан өнҹәки дөврә, гәтијјән, гајытмајаҹаг. Реҝиондакы дәјишикликләрдән әсл зијан чәкән Америка вә сионист режими олаҹаг”.
Диггәт: Хәбәрдән истифадә етдикдә мәнбәјә истинад лазымдыр
