Әһли Бејт -АБНА- хәбәр аҝентлијинин вердији хәбәрә әсасән: Ијунун 9-да Ағсунун Дашдәмирбәјли кәндинин сакини, полис сержанты Асим Бахшијевин өлүмү илә бағлы “Азадлыг” гәзетинин өтән сајларында јазмышдыг. Јазыда А.Бахшијевин өлүмүнүн сәбәбләри арашдырылмышды. Гејд олунурду ки, полис сержантынын Дөвләт Јол Полисинә мәхсус “Волксваҝен-Пассат” маркалы автомобилдә хидмәти силаһы илә өзүнү ҝүлләләмәсинин сәбәбкары Ағсу рајон полис шөбәсинин рәиси Һатәм Һаҹыјев олуб.
Аиләси, дост-танышлары, үмумијјәтлә, Асим Бахшијеви узагдан-јахындан таныјанлар полис сержантынын интиһар етмәсиндә Һатәм Һаҹыјеви сучлу билир: “Маашындан һәр ај 250 манат кәсилирди, рајонун мәркәзи базарынын рәһбәри Варис Мәммәдову шәрләмәк әмри вермишди. Полис рәиси Асимә ”ја дедикләрими едәҹәксән, ја да шәрләниб өмүрлүк һәбсә ҝедәҹәксән” дејиб. Рәис тәклиф едиб ки, о, иш јолдашы олан диҝәр полис әмәкдашынын үзүнә дурсун вә ону рүшвәт аланда ҝөрдүјүнү сөјләсин”. Јазыда о да вурғуланырды ки, һадисә баш вермәздән аз өнҹә мәрһум Һатәм Һаҹыјевин отағында олуб: “Һәмин вахт орада гәрарҝаһ рәиси Горхмаз Мәммәдов вә Кәрәм адлы рајон полис шөбәсинин ҹинајәт-ахтарыш бөлмәсинин рәиси дә олуб. Һәр үчү Асими тәһгир едиб, ишдән чыхмасы һаггында она әризә јаздырмаг истәјибләр. О исә һәмин вахт әризәни көнүллү јазмаг истәмәјиб. Полис рәиси вә диҝәр ики нәфәрин тәһгирләринә дөзмәјиб отағы тәрк едиб. Јалныз буну дејиб: ”Бир нечә дәгигәдән сонра ҝәлиб әризәни јазаҹам”. О, хидмәти силаһыны да ҝөтүрүб машынына ҝедиб. Бир саатдан сонра исә Асимин мејити хидмәти автомобилиндән тапылыб. Асим һадисәдән әввәл, јәни саат 21:00-да сыра бахышында да олуб”.
Јазыда ады һалланан полис рәиси Һатәм Һаҹыјев дә гәзетимизлә әлагә сахлајараг јазыланларын һәгигәт олмадығыны билдирмишди: “Сизин јазыныза етиразымы билдирирәм. Республика Прокурорлуғунун арашдырмасы ҝедир. Һәр кәсдән изаһат алыныб. Јазыда адлары чәкилән әмәкдашларын һәр бири, о ҹүмләдән мән бу арашдырманын сонуну ҝөзләјирик. Ганун шаһдыр, шаһ ганун дејил. Әҝәр биз ганунсузлуға јол вермишиксә, ганун гаршысында ҹаваб вермәјә, ҹәзамызы чәкмәјә һазырыг”.
Бундан башга, Ишҝәнҹәләрә Гаршы Азәрбајҹан Комитәсинин сәдри Елчин Беһбудов Ағсу вә Шамахы рајон полис шөбәләринин мүвәггәти сахланма мәнтәгәләриндә мониторинг кечириб. О, Асим Бахшијевин ҹинајәт иши илә дә марагландығыны АПА-ја билдириб: “Ағсу рајонунда оларкән ијунун 9-да интиһар едән полис әмәкдашы Асим Бахшијевин ҹинајәт иши илә дә марагландым. О, Мәһәммәд Әмин Рәсулзадә күчәсиндә интиһар едиб. Арашдырма заманы мәлум олуб ки, о, бир гызы истәјиб, лакин она вермәјибләр. Буна ҝөрә интиһар едиб. Фактла бағлы ҹинајәт иши башланыб, арашдырма апарылыр”.
Аиләси бу иттиһамлары гәбул етмир. Дејирләр ки, Асим Бахшијев Һатәм Һаҹыјевин тәзјигләринә дөзмәјәрәк интиһар едиб.
Диггәт: Хәбәрдән истифадә етдикдә мәнбәјә истинад лазымдыр
