Әһли Бејт -АБНА- хәбәр аҝентлијинин вердији хәбәрә әсасән: Ијунун 29-у Ҝәнҹәнин Низами Рајон Мәһкәмәсиндә руһани Һаҹы Фәхри Илјасовун иши үзрә кечирилән просесдә һаким Ҝүндүз Ширинов һөкмү елан едиб. О, Фәхри Илјасова 3 ил 6 ај мүддәтинә азадлыгдан мәһруметмә ҹәзасы кәсиб. Ијунун 16-да кечирилән просесдә дөвләт иттиһамчысы Әлиһүсејн Мәммәдов ҝәнҹәли руһанијә 4 ил 6 ај иш истәмишди.
Мәһкәмәнин һөкмүндән разы галмајан вә апеллјасија шикајәти верәҹәјини билдирән вәкил Елчин Намазов ачыгламасында дејиб ки, Конститусија Мәһкәмәси ҝәнҹәли руһаниләрин иттиһам олундуғу Ҹинајәт Мәҹәлләсинин 221.3-ҹу маддәси илә бағлы гәбул етдији гәрар артыг гануни гүввәсинә миниб: “Она ҝөрә дә һаким Фәхри Илјасовун иттиһам олундуғу 221.3-ҹү маддәни 221.2 илә әвәзләди. Бу исә әдаләтсизликдир. Биз һесаб едирик ки, ән пис һалда Фәхри Илјасова 315.1-ҹи маддә илә иш кәсилә биләрди. Әслиндә бу да әдаләтсизликдир. Биз бу ҝүн мәһкәмәдән һүгугларыны мүдафиә етдијим шәхсин азадлыға бурахылмасы барәдә гәрар ҝөзләјирдик. Гәрара тәәссүф едирәм”.
Фәхри Илјасов бу илин јанварында башга бир ҝәнҹәли руһани Азәр Ҹәбијевлә Ҝүрҹүстана ҝедәркән, сәрһәд постунда һәбс едилиб. Онлар Ҹинајәт Мәҹәлләсинин 221.3-ҹү маддәси илә (силаһдан вә ја силаһ гисминдә истифадә едилән әшјалары тәтбиг етмәклә хулиганлыг) иттиһам олунублар.
Мајын 12-дә Ҝәнҹәнин Низами Рајон Мәһкәмәсиндә һаким Абдулла Исҝәндәров Азәр Ҹәбијевин 4 ил мүддәтинә азадлыгдан мәһрум едилмәси барәдә гәрар чыхарыб. Азәр Ҹәбијевин дә вәкили Елчин Намазовдур.
Диггәт: Хәбәрдән истифадә етдикдә мәнбәјә истинад лазымдыр
