Әһли Бејт -АБНА- хәбәр аҝентлијинин вердији хәбәрә әсасән: Бу ҝүн вә ијулун 1-дә Тәһсил Назирлијинин гаршысында һиҹаб гадағасына вә тәһсил һагларынын галдырылмасына гаршы «Фәвварәләр» мејданында аксија кечирилә биләр
Орта мәктәбләрдә һиҹаб гадағасына етираз әламәти олараг мајын 6-да Тәһсил Назирлијинин өнүндә диндарлар аксија кечирмишдиләр. Һәмин вахт гәфил шәкилдә мејдана чыхан диндарларын һәрәкәтиндән бәрк горхуја дүшән һакимијјәт онларын бир гисмини һәбс етди, барәләриндә ҹинајәт иши галдырды.
Анҹаг диндарларын бундан горхаҹағы ҝөзләнилмирди. Елә дејиләнләр тәсдигини тапмагдадыр. Диндарлар ијунун 29-да саат 14:30-17:00 аралығында Тәһсил Назирлијинин гаршысында аксија кечирмәјә гәрар верибләр. Сосиал шәбәкәләрдә јајылан мәлуматларда ачыг шәкилдә аксијаја чағырыш едилир вә өлкәдәки бүтүн диндарларын бу митингә гатылмасы истәнилир.
Аксијанын шүарлары “Һиҹаба азадлыг!” вә “Һиҹаб бизим намусумуздур, она узанан әлләр кәсиләҹәк!” олаҹаг.
Бундан әлавә, Назирләр Кабинети (НК) бир мүддәт әввәл али мәктәбләрдә тәһсил һагларынын артырылмасы илә бағлы гәрар верди. Һәмин мәсәлә илә бағлы ачыглама верән Тәһсил Назирлији вә Тәләбә Гәбулу үзрә Дөвләт Комиссијасы (ТГДК) билдирмишди ки, бу, онларлыг мәсәлә дејил. Дејирләр ки, гијмәтләри НК мүәјјәнләшдирир вә бунун иҹрасыны исә гејд олунан дөвләт гурумлары һәјата кечирир.
Анҹаг бу гијмәт артымы артыг өлкәдә ҹидди наразылыға сәбәб олмаға башлајыб. Белә ки, индијә гәдәр әксәр сијаси партијалар вә ҝәнҹләр тәшкилатлары али тәһсил оҹагларында тәһсил һагларынын артырылмасына етиразларыны билдирибләр. Анҹаг бу етиразларын һеч бири бәјанат сәвијјәсиндән о јана кечмәјиб. Лакин просесин бу шәкилдә галаҹағы да инандырыҹы ҝөрүнмүрдү. Нәһајәт, баш верәнләрә ачыг шәкилдә, јәни аксија формасында етираз етмәк истәјәнләр тапылды.
Сосиал шәбәкәләрдә бир груп ҝәнҹ тәһсил һагларынын артырылмасына етираз әламәти олараг аксија кечирәҹәкләри илә бағлы мәлумат јајыблар. Һәмин мәлуматда дејилир ки, ијулун 1-дә саат 18:00-21:00 аралығында “Фәвварәләр” мејданында етираз аксијасы кечириләҹәк. “Университетләрдә гијмәт артымына етираз едәк!” девизи алтында кечириләҹәк аксијанын тәшкилатчылары исә һеч бир сијаси гуруму тәмсил етмәдикләрини вурғулајыблар.
Гејд едәк ки, мүстәгил, һеч бир сијаси тәшкилаты тәмсил етмәјән һәмин ҝәнҹләрин шәһәрин мәркәзиндә аксија кечирмәләри илк һадисә дејил. Ејни заманда, бу, 11 мартдан сонра кечирилмәси нәзәрдә тутулан аксијалардан биридир.
Диггәт: Хәбәрдән истифадә етдикдә мәнбәјә истинад лазымдыр
