Әһли Бејт -АБНА- хәбәр аҝентлијинин вердији хәбәрә әсасән: Иран президенти Маһмуд Әһмәдинежад шәнбә ҝүнү билдириб ки, Иран Ислам Республикасы вә Азәрбајҹан террорчулугла мүбаризәдә әмәкдашлығы ҝенишләндирәҹәкләр.
Шәнбә ҝүнү Әһмәдинежад Теһранда кечирилән террорчулугла мүбаризә үзрә бејнәлхалг конфранс заманы Азәрбајҹан милли тәһлүкәсизлик назири Елдар Маһмудовла ҝөрүшүб.
Ҝөрүш заманы Иран президенти ики өлкә арасында сых әмәкдашлыгдан мәмнунлуғуну ифадә едиб.
О, гејд едиб ки, Теһран вә Бакы өз ҝениш сијаси, игтисади вә мәдәни имканлары илә бөлҝәдә сүлһ вә сабитлијин бәрпасына јардым едәрәк һәр ики өлкәнин мәнафеләрини тәмин едә биләр.
Әһмәдинежадын сөзләринә ҝөрә, Азәрбајҹанын конфрансда фәал иштиракы ики өлкә арасында әлагәләр вә әмәкдашлығын дәринләшмәсинә шәраит јарадаҹаг.
Өз нөвбәсиндә Маһмудов Азәрбајҹан-Иран мүнасибәтләрини достлуг вә гардашлыг әлагәләри адландырыб. Онун сөзләринә ҝөрә, ики өлкә террорчулугла мүбаризәдә мүсбәт вә конструктив әмәкдашлыг едир вә Азәрбајҹан Теһранла бу саһәдә әмәкдашлығы давам етдирмәк нијјәтиндәдир.
Диггәт: Хәбәрдән истифадә етдикдә мәнбәјә истинад лазымдыр
