Әһли Бејт -АБНА- хәбәр аҝентлијинин вердији хәбәрә әсасән: Өлкә башчысы Вашингтондан дәвәт алмаг, Ағ Ев исә әввәлҹә вәдләрин јеринә јетирилмәсини истәјир
Вашингтонда үмид олунур ки, Азәрбајҹан һакимијјәти сон һәфтәләрдә АБШ илә апарылмыш јүксәк сәвијјәли диалогун руһуна ујғун олараг, ијунун 19-да пајтахтда сәрбәст топлашмаја ҹәһд етмиш оппонентләрини ҹәзаландырмагдан чәкинәҹәк.
АБШ рәсмиләриндән бири “Туран”ын мүхбиринә билдириб ки, сон ики һәфтәдә администрасија Бакыја үч нүфузлу елчисини ҝөндәриб. Онлар енержи (Морнингстар), инсан һаглары (Мелиа) вә тәһлүкәсизлик (Шапиро) үзрә АБШ-ын приоритетләрини изаһ етмәк вә ирәли апармаг миссијасыны дашыјырлар.
“Азәрбајҹан һакимијјәти һәр үч приоритет үзрә АБШ-ын марагларыны анладығыны вә онлара "мүдрик јанашма" ҝөстәриләҹәјини вәд едиб", - мәнбә өтән ај Вашингтонда Азәрбајҹан ХИН башчысы илә апарылан диалога истинадән билдириб.
Бунунла јанашы, өтән һәфтә Бакыда демократија үзрә АБШ-Азәрбајҹан диалогунун ҝедишиндә бири АБШ вәтәндашы олмагла, ики гәрбли фәал намәлум шәкилдә дөјүлүб. “Биз бу инсидентин үстүнүн ачылмасыны сәбирсизликлә изләјирик",- дејә мәнбә вурғулајыб.
АБШ енержи вә тәһлүкәсизлик истигамәтләриндә дә Азәрбајҹанла апардығы мүзакирәләрин конкрет бәһрәләр верәҹәјини ҝөзләјир.
Мәнбә гејд едиб ки, икитәрәфли диалогларын "неҹә ишләмәсиндән" асылы олараг, Вашингтонда Азәрбајҹандан јүксәк сәвијјәли рәсми сәфәрләр барәдә Бакынын мүраҹиәти нәзәрдән кечирилир.
“Туран”а башга мәнбәләрдән мәлум олуб ки, Азәрбајҹан ХИН рәһбәри өтән ај АБШ-а сәфәри заманы президент Әлијевин вә онун администрасија үзвләринин АБШ-а рәсми сәфәрә дәвәт олунмасы илә бағлы истәкләрини чатдырыб.
Диггәт: Хәбәрдән истифадә етдикдә мәнбәјә истинад лазымдыр
