Әһли Бејт -АБНА- хәбәр аҝентлијинин вердији хәбәрә әсасән: "Азадлыг" гәзетинә халг һәрәкатынын лидерләриндән олан, бир нечә ҝүн әввәл Нәсими Рајон Мәһкәмәсинин һөкмү илә 6 ил мүддәтинә азадлыгдан мәһрум едилән Немәт Пәнаһлынын гардашы Сәмәд Пәнаһлы дејиб: “Немәт Пәнаһлынын һәбсини бирбаша Илһам Әлијев сифариш вериб. Биз дә сона гәдәр мүбаризә апарыб онун ҝүнаһсыз олдуғуну сүбут едәҹәјик”.
Онун сөзләринә ҝөрә, мәһкәмәнин гәрары онлары да, вәкилләри дә шока салыб: “Немәт бәјин дә, Ҹејһун бәјин дә тәҹрүбәли, пешәкар вәкилләри вар. Онлар дејирләр, биз һәлә вәкил ишләдијимиз мүддәтдә бу дәрәҹәдә сахта, гурама ишә раст ҝәлмәмишик. Һүгугдан башы чыхмајан адамын габағына белә, бу иши гојсан, о мүстәнтиги, прокурору вә һакими нәинки тәнгид, һәтта тәһгир едәр. Немәт бәј чыхышында деди ки, һакимијјәт она гаршы белә ојунлары чох гурдуғу үчүн психолоҝијасына бәләддир. Билирләр ки, ону, аиләсини тәһгир еләјәнин гаршысындан өлүм олса белә, гачмаз. Дәфәләрлә белә едибләр, ҹавабларыны да алыблар”.
С.Пәнаһлынын сөзләринә ҝөрә, гардашы садәҹә она тәәссүф едир ки, зәрәрчәкән кими тәгдим едилән адама бармағы белә, дәјмәјиб: “Дејир, о адам илк ҝүндән мәнимлә елә мүнасибәт гурду ки, илләрин танышлары илә елә јахын мүнасибәтим јох иди. Сонрадан мәлум олуб ки, о, хүсуси хидмәт органларынын тәлиматландырдығы адамдыр. Она дејибләр ки, Немәт Пәнаһлы 88-ҹи илдән бу јана баш верәнләрлә бағлы 700 сәһифәлик китаб јазыб, сән ону әлдә ет. Немәт бәј о китабда бүтүн һәјатыны, бүтүн һадисәләри јазыб. Садәҹә чап етдирмәк үчүн мадди имканы олмајыб. Немәт бәј дејир ки, бу адам вар ҝүҹүјлә о китабы әлдә етмәјә чалышырды. Китабын чапына спонсорлуг етмәк истәдијини дејирди. Инди баша дүшүрүк ки, онун бу дәрәҹәдә јахын мүнасибәт гурмагда мәгсәди китабы алыб хүсуси хидмәт органларына тәһвил вермәк иди. Немәт бәј дејир ки, мәни машынын јанына чағырыб гапыны ачан кими башлады сөјмәјә. Һәтта кәнардан бир ушаг гышгырыб ки, дајы сизи чәкирләр. Дөнәндә ҝөрүб ки, полисләр камера илә чәкир. О заман баша дүшүб ки, бу тәхрибатдыр. Она гәдәр дә хејли тәһдидедиҹи зәнҝләр олмушду ки, сәни, аиләни өлдүрәҹәјик”.
С.Пәнаһлы дејир ки, онлар Н.Пәнаһлынын һәбсини јох, һәтта өлдүрүләҹәјини ҝөзләјирдиләр: “Амма бу дәрәҹәдә ҹылыз, ләјагәтсиз иш апараҹагларыны ҝөзләмирдик. Немәт бәјин мәһкәмә просесиндәки бүтүн чыхышларыны ҝизли шәкилдә јазмышыг вә јахын вахтларда онларын һамысыны мәтбуата тәгдим едәҹәјик”.
Хатырладаг ки, ијунун 17-да Нәсими Рајон Мәһкәмәсиндә Немәт Пәнаһлы вә досту Ҹејһун Фәрзуллајевә һөкм охунуб. Н.Пәнаһлы 6, Ҹ.Фәрзуллајев 4 ил мүддәтиндә азадлыгдан мәһрум едилиб.
Бу ил јанварын 8-дә һәбс едилән тутулан Н.Пәнаһлы силаһдан вә ја силаһ гисминдә истифадә едилән әшјалары тәтбиг етмәклә хулиганлыг вә гәсдән сағламлыға аз ағыр зәрәр вурмагда иттиһам едилир. Иттиһамын әсасында вәтәндаш Елдәниз Рзајевин шикајәти дајаныр. Шикајәтә ҝөрә, Н.Пәнаһлы вә Ҹ.Фәрзуллајев јанварын 7-дә Бакынын Мирәли Гашгај күчәсиндә Елдәниз Рзајеви дөјүб, она јумруг вә метал әшја илә зәрбә ендирибләр.
Диггәт: Хәбәрдән истифадә етдикдә мәнбәјә истинад лазымдыр
