Әһли Бејт -АБНА- хәбәр аҝентлијинин вердији хәбәрә әсасән: Ҝәнҹәнин иҹра башчысы Елмар Вәлијев шәһәр сакинләрини һејрәтләндирмәкдә давам едир. Иҹра башчысы тәјин едилдији ҝүндән абадлыг ады алтында сөкүнтү ишләринә башлајан Елмар Вәлијев, бу әмәлијјаты өзүнәмәхсус шәкилдә һәјата кечирир.
Елмар Вәлијевин сөкүнтү ишләриндән, хүсусилә әзијјәт чәкән саһибкарлардыр. Иҹра башчысы фактики олараг, Ҝәнҹәдә саһибкарлыг фәалијјәтини ифлиҹ едиб. Һансы саһибкар Елмар Вәлијевин шәртләрини гәбул етмирсә, дәрһал онун објектләри јерлә-јексан едилир.
Дүнән әлдә етдијимиз мәлуматлара ҝөрә, иҹра башчысы инди дә Ҝәнҹә чајынын сағ саһилиндәки шадлыг евләри вә ресторан-кафеләрин сөкүлмәси әмрини вериб. Артыг шадлыг сарајларындан бири учурулуб. Бу, “Елнур” шадлыг сарајыдыр. Мәлуматлара ҝөрә, учурулма әмәлијјаты ики ҝүн әввәл һәјата кечирилиб.
Шадлыг сарајынын саһиби објектин учурулмасына етираз едәрәк ону бошалтмајаҹағыны билдириб. Бу һалда, Елмар Вәлијев шадлыг сарајыны бүтүн әшјалары илә бирҝә дармадағын етмәк әмрини вериб. Әмр дәрһал иҹра олунуб. Шадлыг сарајынын саһиби әмлакынын учурулдуғуна дөзмәјәрәк инфаркт кечириб.
“Гафгазинфо” исә мәлумат јајыб ки, Малик адлы һәмин саһибкар Ҝәнҹә Кардиоложи Клиникасынын реанимасија шөбәсинә јерләшдирилиб. Һазырда вәзијјәти ағыр олараг галыр.
Мәлуматда, һәмчинин дејилир ки, баш верәнләрдән горхуја дүшән иҹра башчысы Ҝәнҹәни ҝәзәркән, автомобилдән дүшмүр. Елмар Вәлијеви Ҝәнҹәнин полис рәиси шәхсән мүшајиәт едир.
Диггәт: Хәбәрдән истифадә етдикдә мәнбәјә истинад лазымдыр
