Әһли Бејт -АБНА- хәбәр аҝентлијинин вердији хәбәрә әсасән: Милли Тәһлүкәсизлик Назирлијинин вә баш прокурор јанында Корупсијаја Гаршы Мүбаризә Идарәсинин Тәһсил Назирлијиндә кечирдији антикоррупсија әмәлијјаты ҝүнүн әсас һадисәләриндән бири олараг галыр. Дөвләт гурумлары мәшһур шаир Әли Кәримин оғлу Орхан Кәримовун һәбс олунмасы илә нәтиҹәләнән әмәлијјат һаггында әтрафлы мәлумат вермир.
Хатырладаг ки, О.Кәримовун назирликдә малијјә шөбәсинин рәис мүавини вәзифәсини тутуб.
Дүнән назирлијин мәтбуат хидмәтинин рәһбәри Бајрам Һүсејнзадә «Бизим Јол»-а јохламанын назирлијин тәшәббүсү илә апарылдығыны сөјләсә дә, малијјә шөбәсинин рәиси Шаһрза Әлијев Орхан Кәримовун һәбсинин иш фәалијјәти илә бағлы олмадығыны иддиа едирди. Тәәссүф ки, дүнән ҝүн әрзиндә Шаһрза Әлијевлә дәфләрәлә әлагәл јаратмаға чалышсаг да, буна наитл ола билмәдик.
Әлдә етдијимиз мәлумата ҝөрә һәбсләр Тәһсил Назирлијиндә ҝениш јохламаларын апарылмасына рәваҹ вериб. Дөвләт гурумунун малијјә әмәлијјатлары, али мәктәбләрдән көчүрмәләр, дөвләт вәсаитләринин истифадәси ҹидди шәкилдә јохланаҹаг.
Дүнән Орхан Кәримин анасы Елза Кәримлә әлагә сахладыг. Елза ханым һәм телевизијаларда, һәм дә мәтбуатда мәрһум һәјат јолдашы танынмыш шаир Әли Кәримин адынын һалланмасына етиразына билдирди: “Ај оғул, белә олмаз, бу ҹүр јазмазлар. Әли Кәримә сағлығында раһатлыг вермәдиләр, инди дә адыны бу ҹүр бөһтанларда чәкирләр. һәлә һеч нә билинмир, мәним ешитдијимә ҝөрә, јохлама заманы мүдирини тапмајыблар вә Орханы һәбс едибләр. Инди јијәсиздир, атасы, дајысы јохдур дејә, Орханы тутмалыјдылар?”. Елза ханым һәлә һеч бир дөвләт органына шикајәт етмәдијини сөјләди: “Һәлә дүнән апарыблар вә бу, һәбс јох, сахланылмадыр, һәлә изаһат иши апарырлар. Ҝәлиб, евдә ахтарыш апарыблар, һеч нә тапмајыблар, ҝәлин бахын ҝөрүн Орхан һарада јашајыр. Бу ев атамын евидир, рәһмәтлик Әли Кәримин еви олмајыб ахы, о, зирзәмидә јашајыб. Сонра биз атамын евинә көчдүк, валидејнләрим вәфат едәндән сонра бу ев Орхана галды. Демәк истәјирәм ки, галдығымыз ев елә бир вәзијјәтдәдир ки, күләк әсәндә гапыны ачыр. Биз намусла јашајан адамыг, еви јохлајанлар јашајыш дурумумузу ҝөрәндә үзр истәдиләр. Онлара дедим ки, оғлум әјри иш ҝөрсә, белә евдә јашајараммы? Билдирдим ки, Әли Кәримин һәјат јолдашыјам, 40 ил журналист-тәрҹүмәчи ишләсәм дә 85 манат тәгаүд алырам. Хаһиш едирәм, Әли Кәримин адыны һалландырмајын. Һесаб едирәм ки, ҝөзләмәк лазымдыр, гој арашдырсынлар, тарихдә белә шејләр чох олуб вә әдаләт дә сонда бәрпа едилиб. Мәним талејимә бахын, 29 јашында Әли Кәрим вәфат етди, сонра анам кор олду, даһа сонра атам өлдү, ушаглары бир зүлмлә бөјүдүб охутдум вә 72 јашымда башыма ҝәлән. Нијә биз јахшы инсанлара гијмәт вермирик, Әли Кәрим зирзәмидә јашајырды, ҝеҹәләр јазыр, ҝүндүзләр дә ушаглары ојнадырды”.
Е.Кәрим Орханын ики көрпә өвладынын олдуғуну билдирди: “О, өвладларыны ҝүҹлә сахлајырды, инанарсынызмы ки, Орхан әјри иш ҝөрәр? Түркијәнин Бишкәнд Университетиндә дәрс дејән гардашы Азәр көмәк едирди бизә. Артыг Азәрә хәбәр вермишик, амма мән истәмирдим ки, о, билсин. Мән јенә дејирәм, Орханын һеч бир ҝүнаһы јохдур”.
Баш верән олајла бағлы ХХI Әср Тәһсил Мәркәзинин рәһбәри Етибар Әлијев Азадлыг Радиосуна билдириб ки, Орхан Кәримовун назирликдә тутдуғу вәзифә 4-ҹү дәрәҹәлидир, о һеч вахт сәнәдин биринҹи нүсхәсинә гол чәкмир. Бүтүн көчүрмәләр назирин имзасы илә баш верир. Мисир Мәрданов тәһсил назири оландан 10 минләрлә инсан ихтисасыны дәјишиб вә көчүрүлүб, бу исә бир нечә јүз милјон вәсаит демәкдир.
Диггәт: Хәбәрдән истифадә етдикдә мәнбәјә истинад лазымдыр
