Әһли Бејт -АБНА- хәбәр аҝентлијинин вердији хәбәрә әсасән: Гафгаз Мүсәлманлары Идарәси (ГМИ) 2011-ҹи илин Һәҹҹ зијарәти илә әлагәдар сәнәд гәбулунун башладығыны елан едиб. Гурумун мәтбуат хидмәтиндән верилән мәлумата ҝөрә, ГМИ Һәҹҹ зијарәти илә бағлы мүгәддәс Мәккә вә Мәдинә шәһәрләринә сәфәрләри Сәудијјә Әрәбистанынын Һәҹҹ Назирлији илә имзаланмыш протокол әсасында һәјата кечирир.
Бу ил нәзәрдә тутулан квотаја ујғун олараг Азәрбајҹандан Һәҹҹ зијарәтинә 2000 нәфәр зәввар автобусларла вә тәјјарәләрлә јола дүшәҹәк. Зијарәт үчүн сәнәд гәбулу сентјабр ајынын орталарынадәк давам едәҹәк.
Автобуслар Азәрбајҹан - Ҝүрҹүстан - Түркијә - Сурија - Иорданија-Сәудијјә Әрәбистаны маршруту илә, тәјјарәләр исә Бакы-Ҹиддә, Мәдинә-Бакы маршруту үзрә һәрәкәт едәҹәк.
Зијарәт Түркијәнин танынмыш «Улусој» ширкәтинә мәхсус автобусларла һәјата кечириләҹәк ки, билетин гијмәти 2650 манатдыр. Тәјјарә илә сәфәр хәрҹи исә 3750 манат дәјәриндәдир. Бу мәбләғә зәвварларын нәглијјат, меһманхана, виза хәрҹләри, торпаг басды верҝиси, чадырларын иҹарә һаггы дахилдир.
ГМИ-дән билдирилир ки, јениликләр сырасына зәвварларын мәҹбури һәјат сығортасы, отелләрдә ҝүндә исти јемәк вә гәлјаналты дахил олмагла 2 дәфә јемәк, Мина вә Әрәфатда исә гәлјәналтыларын тәклиф олунмасы, һабелә Мүздәлифә вә Әрәфата зәвварларын дәмирјол гатары илә чатдырылмасы дахилдир. Бүтүн бу јениликләрлә бағлы әлавә хәрҹләр, һәмчинин Сәудијјә Әрәбистанда отелләрин баһалашмасы зијарәт сәфәринин гијмәтиндә дәјишиклијә сәбәб олуб.
Арашдырмалар ҝөстәрир ки, Азәрбајҹан зәвварлары Һәҹҹ зијарәтинә чәкдији хәрҹләрә ҝөрә өн сыраларда дајаныр. Лакин өдәнилән мәбләғин гаршылығында ҝөстәрилән хидмәтин сәивјјәси ашағы олур.
Теолог вә бир нечә дәфә Һәҹҹ зијарәтиндә олмуш Елшад Мири «Бизим Јол»а дејир ки, Азәрбајҹандан Һәҹҹә ҝетмәк үчүн чәкилән хәрҹләр һәтта Авропа өлкәләри, Түркијә, Иран вә АБШ-дан да јүксәкдир. Амма Бакыдан јола дүшән зәвварлар вердикләри пулун мүгабилиндә јүксәк хидмәт ҝөрмүрләр: «Мән бир нечә дәфә Һәҹҹ зијарәтиндә олмушам. Ән бәрбад тәшкилатчылыг Гафгаз Мүсәлманлары Идарәсининдир. Хидмәт сәвијјәсинин ашағы олмасына бахмајараг, Азәрбајҹан әксәр Авропа өлкәләриндән дә баһалы хидмәт ҝөстәрир. Белә гијмәтләрин гаршылығында зәвварлара һансыса хидмәт ҝөстәрилдијини демәк мүмкүн дејил.
Мәсәлән, Авропадан ҝәлән түркләри јерләшдирән тәшкилат онлар үчүн телевизија ајырмышды, онлары информасија илә, ҝүндә үч дәфә јемәклә тәмин едирди, отел шәһәрдән кәнардадырса, зәвварлары дашымаг үчүн автобуслар ајырмышдылар. Һәмин автобуслар 24 саат онларын хидмәтиндә иди. Онлар үчүн сәһијјә хидмәти тәшкил едилиб, отелин өзүндә пулсуз интернет вар иди.
Мәсәлән, Түркијәдә һәҹҹ зијарәтини Дәјанәт Ишләри Баканлығы һәјата кечирир. Бу зијарәтә кишиләрлә јанашы, гадынлар да ҝедир. Түркијә баканлығы гадын вә киши арасында фәрг гојмајараг, ашбаз тутурду ки, онлара јемәк һазырласын.
Амма Азәрбајҹан тәрәфиндә белә бир хидмәт јохдур. Бәзән зәвварлары Кәбәдән чох узаг бир мәканда јерләшдирирләр. Орадан Кәбәјә ҝәлиб-ҝетмәк үчүн әлавә нәглијјат хәрҹи чәкмәлисән. Бу заман иҹтимаи нәглијјат вә такси сүрүҹләри зәвварлардан бир нечә гат артыг пул алырлар. Ади дәрманла тәминат белә јохдур. Групда кимсә хәстәләнирсә, Авропадан ҝәлән түркләрин галдығы отелләрә мүраҹиәт етмәли олурсан. Чүнки ГМИ ҹәми 2-3 тибб ишчиси ҝөтүрүр. Онлар да јалныз мәсләһәтләр верир. Нә мүалиҹә, нә дә мүајинә етмәк вар. Һәтта галдығымыз отелләрдә дә тибби хидмәт сәвијјәси бәрбад вәзијјәтдә олур. 4000 доллара јахын пул өдәјән зәввара белә хидмәт ҝөстәрмәк тәһгирдир. Бунун адыны белә гојурлар ки, ҝуја һәҹҹ зијарәтинә ҝедәндә чәтинлик чәкилмәлидир. Һалбуки, бунун мәсәләјә һеч дәхли јохдур».
Теолог фикирләрини исбатламаг үчүн ики ил әввәлин гијмәтләрини һазырки таарифләрлә мүгајисә едир: «Ики ил әввәл мән зијарәт үчүн 3500 манат өдәмишдим. Амма һәмин или Авропадан ҝәлән зәвварлар 2500-2800 авро арасында хәрҹ чәкмишдиләр. Ирандан һәҹҹә ҝетмәјин гијмәти 1500-1600 доллар арасы олуб. Түркијәдән исә бу гијмәтә 2 нәфәри апармаг олар. Бизим тәшкилатчылар исә инсан амилини кәнара атыр, бизнес марагларыны үстүн тутурлар. Груп рәһбәрләри дә инсанла давранмағы баҹаран шәхсләр олмалыдыр. Она ҝөрә дә тәшкилатчылыг орада чох ваҹиб мәсәләдир. Тәәссүф ки, алынан мәбләғин мүгабилиндә зијарәт чох зәиф тәшкил олунур».
Диггәт: Хәбәрдән истифадә етдикдә мәнбәјә истинад лазымдыр
