Әһли Бејт -АБНА- хәбәр аҝентлијинин вердији хәбәрә әсасән: Мајын 6-да Бакыда кечирилмиш “Һиҹаба азадлыг” аксијасына ҝөрә һәбс олунанларын истинтагы давам едир. Һәбс олунанлардан Тәрлан Исмајыловун вәкили Дилгәм Ағајевин вә Рәшад Вәлигулијевин мүдафиәчиси Заман Сәмәдовун вердикләри мәлумата ҝөрә, јени експертизалар тәјин едилиб.
Експертизалар тутуланлардан бәзиләринин евиндә мајын 17-дә апарылмыш ахтарыш заманы ҝөтүрүлән дини китабларын, дискләрин лингвистик тәһлилдән кечмәсијлә бағлыдыр.
Һәр ики вәкил һүгугларыны мүдафиә етдикләри шәхсләрлә мүтәмади ҝөрүшдүкләрини вә онларын сахланма шәраитиндән шикајәтчи олмадыгларыны билдирибләр.
З.Сәмәдов ијунун 4-дә Р.Вәлигулијевлә ҝөрүшәҹәк: “Хүсуси истәји јохдур. Әввәл бәзи дини китаблары истәди, лакин буна иҹазә олмады. Онун барәсиндә сечилмиш һәбс гәтимкан тәдбиринин ев дустаглығы илә әвәз едилмәсинә даир иддиа әризәси һазырламышыг. Ҝәлән һәфтә әризәни Нәриманов Рајон Мәһкәмәсинә тәгдим едәҹәјик”.
6 мај аксијасына ҝөрә Бакы Шәһәр Прокурорлуғунда Ҹинајәт Мәҹәлләсинин 221.2.2. (иҹтимаи гајданын горунмасы үзрә вәзифәни јеринә јетирән вә ја иҹтимаи гајданын позулмасынын гаршысыны алан һакимијјәт нүмајәндәсинә вә ја диҝәр шәхсә мүгавимәт ҝөстәрмәклә хулиганлыг) вә 221.3. (силаһдан вә ја силаһ гисминдә истифадә едилән әшјалары тәтбиг етмәклә хулиганлыг) вә 233-ҹү (иҹтимаи гајданын позулмасына сәбәб олан һәрәкәтләри тәшкил етмә вә ја бу ҹүр һәрәкәтләрдә фәал иштирак етмә) маддәләри илә шәрләниләрәк иш ачылыб. Истинтаг групунун рәһбәри Бакы Шәһәр Баш Полис Идарәсинин Истинтаг вә Тәһгигат Идарәсинин рәиси Назим Исмајыловдур.
Гејри-рәсми мәлумата ҝөрә, 6 мај аксијасына ҝөрә тутуланларын сајы 16 нәфәрә чатыб. Онлардан 2 нәфәрә 233-ҹү маддә илә иттиһам ирәли сүрүлүб.
Диггәт: Хәбәрдән истифадә етдикдә мәнбәјә истинад лазымдыр
