Әһли Бејт -АБНА- хәбәр аҝентлијинин вердији хәбәрә әсасән: Сәбаил Рајон Мәһкәмәси Иҹтимаи Палатанын 2 апрел митингинә ҝөрә 2 ајлыг һәбс едилән Мүсават Партијасы Ҝәнҹләр Тәшкилатынын сәдр мүавини Әһәд Мәммәдли вә ҝөздән әлил, битәрәф Елнур Исрәфиловун ев дустаглығына бурахылмасы һагда вәсатәтләри тәмин етмәјиб. Мәлуматы “Медиа форум” сајтына вәкил Јалчын Иманов вериб.
Вәкил дејиб ки, Әһәд Мәммәдлинин ҹәзасынын ев дустаглығына дәјишдирилмәси үчүн вердији вәсатәтә мајын 24-дә һаким Нурәддин Бағыровун сәдрлији илә бахылыб: “Мәһкәмә просесинә Әһәд Мәммәдли дә ҝәтирилмишди. Һакимин нәзәринә чатдырдым ки, Әһәд Мәммәдлинин даими јашајыш јери мәлумдур, истинтагын објектив апарылмасына тәсир етмәк имканы јохдур, чағырышлара вахтлы-вахтында ҝәләҹәк, ҹәмијјәтдә иҹтимаи-сијаси хадим, дүрүст инсан кими таныныб, узун илләрдир журналист ишләјир, өлкәнин ән нүфузлу идман нәшри олан “Футбол+” гәзетинин әмәкдашыдыр. Она ҝөрә дә Әһәд Мәммәдлини ев дустаглығына бурахмағын һеч бир тәһлүкәси јохдур. Әһәд Мәммәдли дә вәсатәти мүдафиә етди. Һаким гыса мүшавирәјә ҝетди вә гајыдыб һеч бир әсас ҝөстәрмәдән вәсатәти тәмин етмәди”.
Елнур Исрәфиловун ев дустаглығына бурахылмасы һагда вәсатәт дә тәмин олунмајыб. Ишә һаким Елнур Һәсәновун сәдрлији илә бағылыб.
Јалчын Иманов ачыгламасында дејиб ки, просес башлајан кими мүдафиә етдији шәхсин дәмир бармаглыглар арасындан чыхарылыб вәкилин јанында отурдулмасына даир вәсатәт вериб: “Һаким Елнур Һәсәнов вәсатәти тәмин етди вә мәһкәмә нәзарәтчиләринә Елнур Исрәфиловун дәмир бармаглыглар архасындан чыхармаг ҝөстәриши верди. Лакин ҝөзләнилмәдән нәзарәтчиләр буна етираз етди. Дедиләр ки, јухарынын ҝөстәриши олмадан тәгсирләндирилән шәхси дәмир бармаглыглар архасындан чыхарыб вәкилин јанында отурда билмәзләр.
Һакимлә нәзарәтчиләр арасында мүбаһисә јаранды. Нәзарәтчиләр залдан чыхыб кимәсә зәнҝ етдиләр. Гајыдыб һакимә дедиләр ки, јухары иҹазә вермир. Һаким мөһкәм һирсләнди вә просесдә фасилә елан етди, деди ки, мән гајыдана гәдәр мәһкәмәнин гәрары иҹра олунсун. Һаким зала гајыданадәк Елнур Исрафилову дәмир бармаглыглар архасындан чыхарыб вәкилин јанында отуртдулар. Лакин әлләри гандаллы. Гандалын әлиндән чыхарылмасы һагда јени вәсатәт вердим. Һаким тәмин етди. Бундан сонра Елнурун әлләрини ачдылар. Мәһкәмәдә баш верәнләрә ҝөрә протокол тәртиб олунду. Һаким деди ки, мәһкәмәнин гәрарына әмәл етмәјән вәзифәли шәхсләр барәсиндә гәти өлчү ҝөтүрүләҹәк”.
Диггәт: Хәбәрдән истифадә етдикдә мәнбәјә истинад лазымдыр
