Әһли Бејт АБНА хәбәр аҝентлијинин вердији хәбәрә әсасән: Ҝүрҹүстанын пајтахты Тифлисдә өтән ҝүндән башалајан ҝәрҝинлик бу ҝүн дә давам едир. Бу сәһәр мүхалифәт тәрәфдарлары илә һүгуг-мүһафизә органларынын әмәкдашлары арасында јени тоггушма баш вериб. Ҝүрҹүстан Иҹтимаи Телевизијасынын бинасы өнүндә баш верән гаршыдурмада полис ҝөзјашардыҹы газдан истифадә едиб.
Етираз аксијасынын иштиракчылары Ҝүрҹүстан президенти Михаил Саакашвилинин истефасыны тәләб едир. Онлар Саакашвилини коррупсија вә демократик ислаһатлара имкан вермәмәкдә иттиһам едирләр.
Ҝүрҹүстан Дахили Ишләр Назирлијинин ачыгламасында билдирилир ки, тоггушмалар мүхалифәт тәрәфдарлары полис машынына зәрәр вурмаға чалышаркән баш вериб. Мүхалифәт тәрәфдарлары исә полисин онлардан бир нечәсини һәбс етмәјә чалышаркән тоггушманын јарандығыны иддиа едирләр.
Хатырладаг ки, дүнән Тифлисдә он минә јахын мүхалифәт тәрәфдары анти-һөкумәт нүмајиши кечириб. Күтләви аксијаны мүхалифәт блоку олан "Милли Мәҹлис" вә кечмиш парламент спикери Нино Бурҹанадзенин лидерлик етдији "Демократик Һәрәкат-Ваһид Ҝүрҹүстан" партијасы тәшкил едиб. Мүхалифәт нүмајишләринин бу ҝүн дә давам едәҹәји ҝөзләнилир.
Диггәт: Хәбәрдән истифадә етдикдә мәнбәјә истинад лазымдыр
