Диггәт: Хәбәрдән истифадә етдикдә мәнбәјә истинад лазымдыр
Әһли Бејт -АБНА- хәбәр аҝентлијинин вердији хәбәрә әсасән: Дағыдыҹы зәлзәләләрин баш верәҹәји вахты әввәлҹәдән тәхминләмәклә бағлы үмид јараныб.
“Кјодо" мәлуматы билдирир ки НАСА-нын әмәкдашы вә арашдырма апармыш алимләрдән бири Димитар Узуновун дедијинә ҝөрә, мартын 11-дә Јапонијада баш вермиш дағыдыҹы зәлзәлә вә сунамидән әввәл тәбии фәлакәтин јашанаҹағы бөлҝәдә һава исинмәјә башлајыб.
"Даһа доғрусу, зәлзәләнин еписентри үзәриндә атмосфер фәлакәт ҝүнү гызыб, атмосфер гатларынын орта температуру јүксәлиб. Апардығымыз тәдгигатлар заманы ҝөрдүк ки, зәлзәләјә бир нечә ҝүн галмыш тектоник сынма вә јералты тәкан зонасында һава исинмишди. Зәлзәләдән үч ҝүн әввәл исә атмосферин јухары гатларында исинмә максимума чатыб", - Узунов дејиб.
Алимләрин фикринҹә, бунун башлыҹа сәбәби Јер тәкиндә тектоник активләшмә, сынма вә сүрүшмәләр заманы бөјүк мигдарда радон газынын чыхмасыдыр.
Космик пејкләрдән чәкилмиш фотолар да Јапонијадакы дәһшәтли сунами вә зәлзәләдән һәлә 10 ҝүн әввәл фәлакәт зонасы үзәриндәки атмосфер гатларынын исинмәјә башладығыны ҝөстәрир. Ионосфер исә билаваситә мартын 11-дә, зәлзәлә вә сунами ҝүнү хејли исиниб, инфрагырмызы шүаланма артыб.
Алимләр һесаб едирләр ки, глобал инфраспектрал вә ионографик мүшаһидәләр, һабелә космик орбитдән атмосферин ајры-ајры бөлҝәләринин, даһа доғрусу, сејсмик ҹәһәтдән фәал олан јерләрин үзәриндәки сәманын мониторинги васитәсилә дағыдыҹы зәлзәләләри әввәлҹәдән прогнозлашдырмаг мүмкүндүр.
