Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Республикасынын кечмиш спикери вә 1992-ҹи илдә президентин сәлаһијјәтләрини иҹра етмиш Јагуб Мәммәдов Иран Ислам Республикасынын Гарабағ мәсәләсиндә ермәниләрин тәрәфиндә олмасынын јалан олдуғуну билдирди.
Јагуб Мәммәдов әмәкдашымызла сөһбәт заманы үмумијјәтлә бүтүн медиаларла мүсаһибәјә һазыр олмадығыны билдирсә дә, 1992-ҹи илдә Теһранда Ермәнистан вә Азәрбајҹан Республикасынын дөвләт башчылары арасында Иранын васитәчилији илә мүзакирә ҝедән вахт бу дөвләтин Шуша шәһәринин ишғал едилмәсиндә мәсулијјәт дашымадығыны сөјләди.
Онун сөзләринә ҝөрә, һәмин вахт Азәрбајҹан Республикасынын дахилиндә мүәјјән гүввәләр, еләҹә дә бәзи хариҹи гүввәләр Ираны ҝөздән салмаг вә онун васитәчилијини әнҝәлләмәк үчүн Шушанын ишғалына баис олдулар.
Хатырладаг ки, мүхтәлиф мәнбәләр Шушанын ишғалына Русијанын јашыл сигнал вердијини вә америкалыларын бу тәхрибата дәстәк вердикләрини билдирирләр.
Јагуб Мәммәдов һәмчинин дејиб: Иран рәсмиләри илә ҝөрүшләримиздә Ирандан силаһ алмаг барәдә разылыға ҝәлмишдик вә әлбәттә ондан өнҹә дә Иран гејри-рәсми шәкилдә бизә силаһ верирди вә Мүдафиә Назирлији бу силаһлары тәһвил алырды.
Мәммәдов ермәни сепаратчыларынын тәҹавүзләринин гаршысыны алмаг үчүн Иранын тәшкилатчылығы илә Әфган мүҹаһидләрин Гарабаға ҝәтирилмәси һагда да дејиб: Бу иш мән һакимијјәтдән кәнарлашдыгдан сонра баш вериб.
Гејд етмәк лазымдыр ки, Иран Ислам Республикасынын Гарабағ мәсәләсиндә Азәрбајҹан Республикасына сијаси, һәрби, игтисади вә һуманитар јардымларына бахмајараг, Азәрбајҹан Республикасында Гәрбин мәнафејинә хидмәт едән мәлум даирәләр Иранын ҝуја Ермәнистаны һимајә етдијини иддиа едирләр.
Диггәт: Хәбәрдән истифадә етдикдә мәнбәјә истинад лазымдыр
