Әһли Бејт -АБНА- хәбәр аҝентлијинин вердији хәбәрә әсасән: Немәт Пәнаһлынын вәкили Самир Исајев дејиб ки, просесдә зәрәрчәкән Елдәниз Рзајев, иттиһам тәрәфинин шаһидләри Рәшад Һүсәнов вә Рагиф Ҹәбрајылов ифадә верибләр: “Зәрәрчәкән Елдәниз Рзајев ифадәсиндә билдирди ки, Немәт Пәнаһлы илә араларында олан мүнагишә автомобил үстүндә баш вериб. Зәрәрчәкән деди ки, Немәт Пәнаһлыдан автомобил алыб, автомобил исә хараб чыхыб. Мәсәләни ајдынлашдырмаг үчүн Немәт Пәнаһлы илә ҝөрүшүб. Ҝөрүш заманы араларында мүбаһисә олуб, бир-бириләрини синәләриндән итәләјибләр, тәһгир едибләр. Елдәниз Рзајев билдирди ки, Немәт Пәнаһлыдан јеҝанә тәләби автомобилин пулуну гајтармасыдыр. Әҝәр пул гајтарылса, Немәт Пәнаһлыја гаршы һеч бир иддиасы, тәләби јохдур”.
Вәкилин сөзләринә ҝөрә, шаһидләр Рәшад Һүсәнов вә Рагиф Ҹәбрајылов исә ифадәләриндә дејибләр ки, һадисә баш верән ҝүн әразидән кечирмишләр: “Шаһидләр дедиләр ки, ики нәфәрин күчәдә мүбаһисә етдијини, бир-бирини сөјдүјүнү ҝөрүбләр. Онларын сөзләринә ҝөрә, һәмин вахт әразидә башга адам олмајыб. Ејни заманда, шаһидләр мүбаһисә едән инсанларын бир-бирини вурдуғуну, әлбәјаха олдугларыны ҝөрмәдикләрини, хулиганлыг һадисәсинин шаһиди олмадыгларыны дедиләр. Шаһидләр истинтага да бу формада ифадә верибләр. Немәт Пәнаһлы да истинтага ифадәсиндә дејиб ки, Елдәниз Рзајев мәни сөјүрдү, мән дә ону сакитләшдирирдим. Немәт Пәнаһлы илә шаһидләрин ифадәләри үст-үстә дүшүр”.
Вәкил билдириб ки, һаким Немәт Пәнаһлыја да ифадә вермәји тәклиф едиб. Лакин о, ифадә вермәкдән имтина едиб: “Немәт Пәнаһлы деди ки, буҝүнкү просесдә журналистләр иштирак етмир. О, журналистләрин иштиракы илә ифадә вермәк истәјир. Һаким нөвбәти просеси мајын 17-нә тәјин етди. Мајын 17-дә Немәт Пәнаһлы ифадә верәҹәк”.
Милли азадлыг һәрәкатынын лидерләриндән олмуш Немәт Пәнаһлы досту Ҹејһун Фәрзуллајевлә јанварын 8-дә тутулуб. Онлар Ҹинајәт Мәҹәлләсинин 221.3 маддәси илә (силаһдан вә ја силаһ гисминдә истифадә едилән әшјалары тәтбиг етмәклә хулиганлыг) иттиһам едилирләр. Иттиһамын әсасында вәтәндаш Елдәниз Рзајевин шикајәти дајаныр. Шикајәтә ҝөрә, Немәт Пәнаһлы вә Ҹејһун Фәрзуллајев Бакынын Мирәли Гашгај күчәсиндә Елдәниз Рзајеви дөјүб, она јумруг вә метал әшја илә зәрбә ендирибләр. Немәт Пәнаһлы илә Ҹејһун Фәрзуллајевин мүдафиәчиләри бу иттиһамы гондарма сајыр вә онларын сијаси сифариш нәтиҹәсиндә тутулдугларыны иддиа едирләр.
Диггәт: Хәбәрдән истифадә етдикдә мәнбәјә истинад лазымдыр
