Әһли Бејт -АБНА- хәбәр аҝентлијинин вердији хәбәрә әсасән: Илһам Әлијев Президент Администрасијасынын рәһбәри Рамиз Меһдијевин “анти-ингилаб тактикасы”нын үзәриндән бирдәфәлик хәтт чәкиб. Вә бејнәлхалг тәшкилатларын јанында бу кампанијанын бүтөвлүкдә һакимијјәтин мөвгеји кими баша дүшүлмәмәсини истәјиб. Һакимијјәтә јахын мәнбә “Азадлыг”а белә дејиб.
Сөһбәт әрәб ингилабларынын Азәрбајҹана тәһлүкәсини өнләмәјин фонунда мүхалифәтә вә бејнәлхалг тәшкилатлара гаршы апарылан кампанијадан ҝедир. Өтән сајларымызда бу барәдә мәлумат вермишдик. Билдирмишдик ки, мүхалифәтә гаршы “зәһмәткеш аксијалары” вә бејнәлхалг тәшкилатларын шантаж олунмасы әслиндә Рамиз Меһдијевин планы олуб. Бу кампанијаја мәһз Меһдијевин мүәллифлик етдијини сөјләмәк үчүн онун коммунист номенклатурасына садиглији вә һакимијјәтдәки русијапәрәст гүввәләрин башында дајанмасы фактына истинад етмәк јетәрлидир.
Лакин академикин тактикасы уғурлу нәтиҹә вермәди. Әксинә мүхалифәтә гаршы кампанија ҹәмијјәтдә икраһ һисси ојатды. Бејнәлхалг тәшкилатларын шантажы исә ҹәмијјәтин үмидсизлијә гапылан кәсиминин фәаллашмасына сәбәб олду. Һакимијјәт елә буна ҝөрә дә тактиканы дәјишмәк гәрарына ҝәлди вә артыг јени план һазырланыб ки, бу барәдә дә өтән сајларымызда әтрафлы мәлумат вердијимиздән тәкрарчылыг етмәк истәмирик.
Јени хәбәрләрдә һәмчинин дејилир ки, бејнәлхалг тәшкилатларын нүмајәндәләри Илһам Әлијевлә ҝөрүшләриндә бу кампанијаја ачыг шәкилдә етиразларыны билдирибләр. Вә бу мәсәлә мүзакирә олунанда һакимијјәтдәки ајры-ајры груплар да дөвләт башчысынын нәзәринә чатдырыблар ки, кампанијанын бу шәкилдә апарылмасы Рамиз Меһдијевин мүәллифлији вә тәшкилатчылығынын нәтиҹәсидир. Бундан сонра дөвләт башчысы да дипломатик нүмајәндәләрлә ҝөрүшләриндә мәсулијјәти ПА рәһбәринин үзәринә атыб. Илһам Әлијевин бу аддымыны Рамиз Меһдијеви ҝүдаза вермәк кими дә дәјәрләндирмәк олар.
Диггәт: Хәбәрдән истифадә етдикдә мәнбәјә истинад лазымдыр
