Әһли Бејт -АБНА- хәбәр аҝентлијинин вердији хәбәрә әсасән: “Азәрбајҹанын өлүм һөкмү ҹәзасыны ләғв етмәси доғру аддым дејилди”. Буну парламентин Һүгуг сијасәти вә дөвләт гуруҹулуғу комитәсинин иҹласында депутат Илјас Исмајылов билдириб. Депутатын сөзләринә ҝөрә, өлүм һөкмүнүн ләғви Авропа Шурасынын тәләби олса да, бу ҹәза ләғв едиләркән зәрәрчәкәнләрин һүгугларынын горунмасы да нәзәрә алынмалы иди: “Мән буну дәфәләрлә сөјләмишәм вә китабымда да јазмышам. Мән шәхсән өлүм ҹәзасынын ләғвинә тәрәфдар дејиләм. Шәхсијјәт әлејһинә төрәдилмиш ҹинајәтләрдә бу сахланылмалыдыр. Биз ҝәрәк Авропанын тәклиф етдији ганунлары гәбул етдикдә милли мәнафеләримизи дә нәзәрә алаг”.
И. Исмајылов һесаб едир ки, өлүм ҹәзасынын бәрпа олунмасына еһтијаҹ вар вә бу, ҹинајәтләрин сајынын азалмасына тәсир ҝөстәрә биләр.
И. Исмајыловун бу фикирләри ҹәмијјәтдә бирмәналы гаршыланмајыб. Сосиал шәбәкәләрдә бу фикирләр гызғын мүзакирә мөвзусуна чеврилиб. Бөјүк бир гисим һөкмүн ләғвини мүсбәт аддым һесаб едиб. Бәзиләри исә өлүм һөкмүнүн ләғв олунмасыны ағыр ҹинајәтләр төрәтмиш шәхсләрин вәзијјәтини даһа да ағырлашдырдығы гәнаәтиндәдирләр: “Ағыр ҹинајәт төрәтмиш шәхсин өзүнүн ҝүлләләнмәси онун үчүн чох јүнҝүл ҹәзадыр. Әҝәр һәмин шәхс өмрүнүн сонуна кими дөрд дивар арасында јашамаға мәһкум едилирсә, бу даһа ағыр ҹәзадыр. Үстәлик, белә оланда сәһвән өлүм һөкмүнә мәһкум олунмуш шәхсләрин сонрадан бәраәт верилмәси дә мүмкүндүр”.
Диггәт: Хәбәрдән истифадә етдикдә мәнбәјә истинад лазымдыр
