Әһли Бејт -АБНА- хәбәр аҝентлијинин вердији хәбәрә әсасән: “Фөвгәлназир”ин оғлунун рәһбәрлик етдији ҹәмијјәтин Инҝилтәрәнин партија тәмсилчиләри илә әлагәләри јерли мәтбуатда суаллар доғуруб...
Азәрбајҹанын фөвгәладә һаллар назири Кәмаләддин Һејдәровун вә оғлунун рәһбәрлик етдији ҹәмијјәтин ады британијалы сијасәтчиләрин пулла әлә алынмасында һалланыр. Британија сосиалистләринин гәзети олан “Тһе Морнинҝ Стар” јазыр ки, әрәб өлкәләрини ингилабларын бүрүдүјү бир вахтда авропалы сијасәтчиләрин, депутатларын, назирләрин әрәб шејхләринин малијјәләшдирдији конфрансларда онларын хејринә сијаси лоббичиликлә мәшғул олдуғу вә гијмәтли һәдијјәләр алдығы үзә чыхыр.
Мәсәлән, мәлум олуб ки, Бәһрејн кралы нүмајишчиләри ҝүлләләтмәздән ҹәми бир ај әввәл Британијанын хариҹи ишләр назири Уилјам Һејги гонаг едиб вә она ҝүнү 1115 фунт стерлинг олан отел нөмрәси ајырыб. Гәзетин јаздығына ҝөрә, мәлум олуб ки, Бәһрејн крал аиләсинин үзвләри Британија парламентинин үзвләринә пул верәрәк онлары өз хејирләринә лоббичилик фәалијјәтләринә ҹәлб едиб. “Лакин нефтлә зәнҝин, деспотик Фарс Көрфәзи өлкәләри бизим парламентин үзвләринә пул сәпмәкдә тәк дејил. Британија парламентинин онларла үзвү Азәрбајҹан һакимијјәтинин хејринә лоббичилик фәалијјәтләринә ҹәлб олунуб. Онлар Азәрбајҹанын милјардларла долларлыг сәрвәти олан фөвгәладә һаллар назири Кәмаләддин Һејдәровун оғлунун рәһбәрлик етдији ҹәмијјәтин тәшкил етдији тәдбирләрә гатылыр, јахуд нағд гонорарлар алараг мүхтәлиф лобби фәалијјәтләри һәјата кечирир. Азәрбајҹан кечмиш совет республикасыдыр, бу өлкәдә сечкиләр сахталашдырылыр, авторитар һакимијјәт мөвҹуддур. Британија ХИН билдирир ки, Азәрбајҹанда инсан һагларынын дуруму писдир. Лакин Азәрбајҹанын бп илә бөјүк нефт-газ мүгавиләләри вар”, - дејә гәзет јазыб.
“Тһе Морнинҝ Стар” фөвгәладә һаллар назиринин оғлу, Азәрбајҹанын ән ҝәнҹ милјардер иш адамы кими танынан Тале Һејдәровун гурдуғу Авропа Азәрбајҹанлылары Ҹәмијјәти тәрәфиндән Лондонда һәјата кечирилән лобби фәалијјәтләриндән бәһс едир. Бу ҹәмијјәт рәсмән Британија парламентинин һаким лејбористләрдән олан 20 үзвү илә ишләјир. 2008-2009-ҹу илләрдә ҹәмијјәт 23 мин фунт стерлинг хәрҹ чәкәрәк парламентин 9 үзвүнү “танышлыг миссијасы” үчүн Азәрбајҹана ҝөндәриб. Бу јахынларда исә мүдафиә назири Лајам Фокс ҹәмијјәтин тәшкил етдији банкетә гатылыб вә орада верилән ичкиләри тәрифләјиб. Өтән ил исә ҹәмијјәт парламентин үзвү Кен Кларк үчүн зијафәт вериб. “Бу зијафәтдә баһалы шәраблар су кими ахыб”, дејә гәзет јазыб.
Гәзет даһа сонра Кәмаләддин Һејдәров вә онун бизнеси барәдә WикиЛеакс сајты тәрәфиндән јајылан Америка мәхфи телеграмларындан бәһс едир. Хатырладылыр ки, Бакыдакы Америка сәфирлији К.Һејдәрову өлкәнин аз гала ән нүфузлу адамы кими ҝөстәриб, билдирилиб ки, онун нәһәнҝ бизнес империјасы вар. Еләҹә дә ФҺН өлкәдә аз гала һаваја вә суја да нәзарәт едән нәһәнҝ гурумдур. Авропа Азәрбајҹан Ҹәмијјәтинин тәмсилчиси исә гәзетә ачыгламасында WикиЛеакс тәрәфиндән јајылан сәнәди шәрһ етмәк истәмәдикләрини, анҹаг онларын Лондондакы лоббичилик фәалијјәтинин “тамамилә шәффаф вә ганунлара ујғун” шәкилдә гурулдуғуну дејиб. Бунунла белә гәзет јазыр ки, ҹәмијјәтин Британијада Ториләр Партијасындан олан бәзи сијасәтчиләрин сечки кампанијасыны малијјәләшдирдији һагда мәлуматлар вар. Лакин гәзетин мәлуматына ҝөрә, Лејбористләр Партијасынын бәзи тәмсилчиләри дә азәрбајҹанлы олигархларын “фан-клубундан” нағд пул алыблар.
Хатырладаг ки, Азәрбајҹан игтидарынын тәмсилчиләринин Гәрбдә өз һакимијјәтләринин мөвгејини мөһкәмләндирмәк үчүн лобби фәалијјәтләринә бөјүк пуллар хәрҹләмәси јени дејил. Белә лобби фәалијјәтләри индијәдәк әсасән АБШ-да һәјата кечирилирди. Лакин сон илләр АБШ-ла һакимијјәтин мүнасибәтләри корландығындан белә лобби фәалијјәтләри азалыб, белә ҝөрүнүр ки, инди әсас ағырлыг Лондона верилиб. “Думанлы Албионда” Азәрбајҹан һакимијјәтиндәки ән нүфузлу олигархын адамлары сијасәтчиләрә һәвәслә пул хәрҹләјир вә онлары лобби фәалијјәтләринә ҹәлб едиб. Доғрудур, Авропа Азәрбајҹан Ҹәмијјәти Гарабағ мәсәләсиндә дә фәал лоббичилик апарыб, Хоҹалы гәтлиамы илә бағлы Авропада бир сыра тәдбирләр тәшкил едиб. Анҹаг бу ҹәмијјәтин әсас фәалијјәти британијалы сијасәтчиләрлә әлагә гуруб онлары һакимијјәтин хејринә ишләтмәкдир.
Бундан әввәл дә британијалы сијасәтчиләрин Азәрбајҹанла шүбһәли әлагәләри бу өлкә медиасынын диггәтини ҹәлб едиб. Мәсәлән, өтән ил Бөјүк Британија парламентинин либерал-демократ үзвү, Азәрбајҹан һакимијјәти илә әлагәләри олан Мајк Һанкокун Русија кәшфијјаты илә әлагәләри арашдырылырды. Һанкок дәфәләрлә Азәрбајҹанда сечкиләри изләмәјә дәвәт олунуб вә һәр дәфә сечкиләрин там демократик кечдијинә даир бәјанатлар вериб.
Диггәт: Хәбәрдән истифадә етдикдә мәнбәјә истинад лазымдыр
