Әһли Бејт -АБНА- хәбәр аҝентлијинин вердији хәбәрә әсасән: Рәсми Бакы Азәрбајҹанда ифадә вә сәрбәст топлашмаг азадлығынын вәзијјәти илә бағлы Авропа Иттифагы комиссарынын адындан јајылмыш бәјаната мүнасибәт билдириб
Президент Администрасијасы бејнәлхалг әлагәләр шөбәсинин мүдири Новруз Мәммәдов Азәрбајҹанда ифадә вә сәрбәст топлашмаг азадлығынын вәзијјәти илә бағлы Авропа Иттифагынын Ҝенишләнмә вә Гоншулуг Сијасәти үзрә комиссары Штефан Фулјенин адындан јајылмыш бәјаната мүнасибәт билдирәрк деди: “Өлкәдә ҝедән просесләрә адекват олмајан мөвгеләрин билдирилмәси Авропа Иттифагы илә Азәрбајҹан арасында формалашмыш әмәкдашлығын руһуна зиддир... Тәәссүф һисси илә билдирмәк истәјирәм ки, Авропа Иттифагынын Ҝенишләнмә вә Гоншулуг Сијасәти үзрә комиссарынын нүмајәндәсинин 17 апрел аксијасы илә бағлы дәрһал вердији бәјанат бәзи гејри-дәгиг мәлуматлара әсасландығындан һәгигәтә ујғун дејил вә просесләрә әдаләтли мөвге нүмајиш етдирмир”.
Н. Мәммәдов Азәрбајҹанда фикир вә сәрбәст топлашма азадлығы илә бағлы һеч бир проблемин олмадығыны билдириб: “Журналистләрин фәалијјәтинә ҝәлдикдә исә, онларын өз пешәләри илә мәшғул олмағына мәһдудијјәт гојулмур, онлар өз һүгугларындан там истифадә едирләр. Мүхалифәтин ганунвериҹилик чәрчивәсиндә топлашмасы вә динҹ аксија кечирмәси үчүн Бакы шәһәр Иҹра Һакимијјәти тәрәфиндән мүвафиг јерләр ајрылыб вә бу барәдә рәсми мәлумат верилиб. Азәрбајҹан үзв олдуғу бејнәлхалг вә реҝионал тәшкилатлар вә гурумлар гаршысында үзәринә ҝөтүрдүјү өһдәликләрә садигдир вә онлары јеринә јетирир. Гејд етмәк лазымдыр ки, өлкәдә ҝедән просесләрә адекват олмајан мөвгеләрин билдирилмәси Авропа Иттифагы илә Азәрбајҹан арасында формалашмыш әмәкдашлығын руһуна зиддир.
Гејд едәк ки, Иҹтимаи Палатанын 17 апрел аксијасы илә бағлы Ш. Фулјенин адындан јајылан бәјанатда Азәрбајҹанда ифадә вә сәрбәст топлашмаг азадлығынын вәзијјәтиндән нараһатлыг ифадә олунуб. Бәјанатда, һәмчинин, Азәрбајҹан һакимијјәти мүнасиб јерләрдә динҹ нүмајишләр кечирилмәсинә шәраит јарадылмасына, инсан һаглары вә демократија саһәсиндә Авропа Шурасы вә АТӘТ-ин өһдәликләринә әмәл едилмәсинә чағырылыб.
Диггәт: Хәбәрдән истифадә етдикдә мәнбәјә истинад лазымдыр
