Әһли Бејт -АБНА- хәбәр аҝентлијинин вердији хәбәрә әсасән: Һәр ики мүхалифәт лидери аксијаларын давам едәҹәјини билдириб.
Иса Гәмбәр дејир ки, 2 апрел аксијасы үмумхалг аксијасынын сүбутудур:
«Буҝүнкү аксија прогнозлашдырдығымыз кими, сон илләрин ән ҝүҹлү етираз аксијасы кими баш тутду. Аксија бу дәгигәләрәдәк давам едиб. Минләрлә инсан аксијада иштирак едиб вә бу дәгигә бөјүјә дә биләр. Хүсусилә гејд етмәк лазымдыр ки, шәһәр сакинләри митинг иштиракчыларыны дәстәкләјирләр, бир чох һалларда онлара гошулуб, шүарлар сәсләндирир, митинг иштиракчыларынын јүрүшләринә гошулурлар. Бу да 2 Апрел аксијасынын садәҹә, мүхалифәтин аксијасы дејил, үмумхалг аксијасы олдуғунун сүбутудур».
Әли Кәримли дә һесаб едир ки, аксија иштиракчылары өз мәгсәдләринә чатыб:
«Сон илләрдә белә мүтәшәккил вә һөкумәти сарсыдан аксија хатырламырам. Һөкумәт чох ҹидди профилактик аддымлар атмышды. Демәк олар ки, пајтахтда ҝириш-чыхыш дајандырылмышды. Чохлу сајда мүхалифәтчиләр һәлә әјаләтләрдән ҝәлмәмиш һәбс олунмушду. Партија фәаллары, елә бизим рәјасәт һејәтинин 3 үзвү митинг башламамышдан тутулмушду. Бу дәфә сај јүзләрлә өлчүлүр. Чох бөјүк гәддарлыг нүмајиш еләдиләр, газдан, електрошокдан, дәјәнәкләрдән истифадә етдиләр, инсанлары күтләви шәкилдә дөјдүләр. Буна бахмајараг, инсанлар өз етиразларыны ифадә едә билдиләр».
Диггәт: Хәбәрдән истифадә етдикдә мәнбәјә истинад лазымдыр.
