Әһли Бејт -АБНА- хәбәр аҝентлијинин вердији хәбәрә әсасән: Ливија лидери Мүәммар Гәззафинин әркөјүн оғлу вә онун һәјат јолдашына Ливана ҝәлмәјә иҹазә верилмәјиб. Һаннибал Гәззафи вә онун һәјат јолдашы ливанлы моделјер Әлинә Скафанын Ливана ҝетмәк истәји баш тутмајыб. Буна сәбәб исә Ливан дөвләтинин онларын өлкәјә дахил олмасына иҹазә вермәмәсидир.
Гејд едәк ки, Ливија лидери Гәззафи ҝәрҝин вәзијјәтдән чыхыш јолу ахтардығы бир вахтда, онун аиләси Ливијадан гачмаг јолларыны фикирләшир. "Ливанын сәси" радиосунун вердији мәлумата ҝөрә, дүнән Скаф вә Гәззафи аиләсинин 9 үзвү олан тәјјарәнин Ливанын аеродромуна енишинә иҹазә верилмәјиб.
Нәзәринизә чатдыраг ки, Ливана енә билмәјән тәјјарә Сурија илә Кипрә ҝетмәк истәјиб. Ливија лидеринин оғлу Һаннибал Гәззафи, хариҹи өлкәләрдә проблемли инсан кими гәбул олунур. Бир нечә ил бундан әввәл Лондонда јерләшән отелләрин бириндә һәјат јолдашы Әлинә Скафы дөјән Һанибалл һаггында ҹинајәт иши ачылмышды. Лакин Һаннибалын дипломатик тохунулмазлығы олдуғуна ҝөрә, онун һаггында галдырлан ҹинајәт ишинә хитам верилмишди.
Хатырладаг ки, бундан әлавә Һаннибал Гәззафи вә онун һәјат јолдашы Әлинә Скаф Исвечрә илә Ливија арасында бөһранын јаранмасына сәбәб олуб. 15 ијул 2008-ҹи илдә Һаннибал вә арвады Скаф Исвеч вәтәндашы олан ики хидмәтчини дөјдүкләринә ҝөрә, Исвечрә полиси тәрәфиндән һәбс олунмушду. Оғлунун полис тәрәфиндән диндирилмәси Ливија лидерини гәзәбинә сәбәб олмушду. Бу һадисәдән сонра Гәззафи бүтүн пулларыны Исвечрә банкындан ҝөтүрәрәк, Исвечрәјә нефт ихраҹыны дајандырмышды.
Диггәт: Хәбәрдән истифадә етдикдә мәнбәјә истинад лазымдыр.
