Әһли Бејт -АБНА- хәбәр аҝентлијинин вердији хәбәрә әсасән: Ҝәнҹә Апеллјасија Мәһкәмәси руһаниләр Фәхри Илјасов вә Азәр Ҹәбијевин һәбсдән азад едилмәси барәдә верилмиш вәсатәти тәмин етмәјиб. Бу барәдә руһаниләрин вәкили Елчин Намазов мәлумат вериб. Вәкилин сөзләринә ҝөрә, һакимләр Ҹејһун Мурадов вә Ҹејһун Әһмәдовун сәдрлији илә баш тутан мәһкәмә просеси ганунлара һөрмәтсиз јанашма шәраитиндә кечиб. “Тәрәфимиздән верилмиш вәсатәтин мүзакирәси заманы һакимләр һәр ики шәхсин һәбсдә ганунсуз сахланмаларына инамларыны ифадә етдиләр. Билдирилди ки, истинтаг органынын вә прокурорлуғун аргументләри тамамилә әсассыздыр. Белә ки, иттиһам тәрәфи етиразыны онунла әсасландырырды ки, руһаниләрин өлкәни тәрк етмәк еһтималы мөвҹуддур. Биз буна етираз едәрәк, билдирдик ки, онларын үмумвәтәндашлыг паспорту вә шәхсијјәт вәсигәләри истинтагдадырса, өлкәни тәрк едә билмәзләр. Бу заман прокурорлуғун нүмајәндәси ҝүлүнҹ еһтималла чыхыш етди. Билдирди ки, руһаниләрин сәрһәдди ганунсуз олараг, кечид мәнтәгәсиндән кәнар кечәҹәкләриндән еһтијатланырлар. Һакимләр бунун ҹәфәнҝијјат олдуғуну билдирәрәк, мүшавирәјә ҝетдиләр. Биз инанмаға башладыг ки, вәсатәтимиз тәмин олунараг, руһаниләр азадлыға бурахылаҹаг. Тәәссүф ки, һакимләр мүшавирәдән гајыдыб, хәҹаләт чәкдикләрини ҝөстәрәрәк, вәсатәти тәмин етмәдикләрини билдирдиләр”-дејә руһаниләрин вәкили Елчин Намазов билдириб.
Гејд едәк ки, Е.Намазов баш верәнләрин сијаси сифаришлә һәјата кечирилдијини бир даһа тәсдигләјини дејәрәк, сәнәдләри Авропа Мәһкәмәсинә ҝөндәрәҹәјини гејд едиб: “Јахын ҝүнләрдә сәнәдләри Авропа Мәһкәмәсинә ҝөндәрәҹәм. Бунунла јанашы, ганунсузлуғу тезликлә арадан галдырмаг үчүн даһа кәскин аддымлар атаҹағыг. Сүбут едәҹәјик ки, һакимијјәт етираз едән инсанлары белә ијрәнҹликләрлә сусдура билмәјәҹәк. Бу јолла инсанлары мүвәггәти ҹәмијјәтдән тәҹрид етмәк олар, анҹаг һагг јолундан дөндәрмәк олмаз”.
Хатырладаг ки, Фәхри Илјасов вә Азәр Ҹәбијев полисә гаршы зоракылыг ҝөстәрмәклә хулиганлыг төрәтмәкдә иттиһам олунурлар. Онлар барәсиндә ҸМ-нин 221.3-ҹү (хулиганлыг) маддәси илә ҹинајәт иши башланыб.
Диггәт: Хәбәрдән истифадә етдикдә мәнбәјә истинад лазымдыр.
