Әһли Бејт -АБНА- хәбәр аҝентлијинин вердији хәбәрә әсасән: 18 ҝүнлүк етираз аксијаларындан сонра Мисир президенти Һүснү Мүбарәк истефа верди. Бу барәдә медијалар Мүбарәкин истефасына Азәрбајҹан мүхалифәт лидерләринин мүнасибәтини өјрәниб.
Азәрбајҹан Халг Ҹәбһәси Партијасынын сәдри Әли Кәримли дүшүнүр ки, Һүснү Мүбарәкин истефасы дүнјанын бүтүн әзилән, һүгугу тапданан халглары үчүн бир уғурдур: “Дүнјанын ән гәддар тиранларындан бири халгын тәзјигилә һакимијјәтдән ҝетмәјә мәҹбур олду. Мисир халгы ҝөзүмүзүн гаршысында тарих јазды. Нөвбәти дәфә халгын ән бөјүк ҝүҹ олдуғуну, ән гәддар тиранлара да галиб ҝәлмәк игтидарында олдуғуну сүбут еләди. Ынанырам ки, Мисир халгынын гәләбәси дүнјада бүтөвлүкдә демократикләшмә просесинә ҹидди тәкан верәҹәк. Нөвбәти дәфә сүбут олунду ки, һеч бир диктатуранын, авторитар режимин перспективи јохдур, ҝәләҹәк халгларындыр, демократијанындыр”.
Мүсават партијасынын башганы Иса Гәмбәр Мүбарәкин постундан ҝетмәсини өнәмли бир һадисә кими гијмәтләндириб: “Чох бөјүк бир һадисәдир. Мисир халгынын һәјатында һәддиндән артыг өнәмли һадисәдир. Мисирин мүстәгиллијини әлдә етмәси гәдәр өнәмли бир ҝүндүр”.
Иса Гәмбәр һесаб едир ки, бу һадисә тәкҹә Мисирдә дејил, реҝионун һәјатында да, глобал мигјасда да чох бөјүк дәјишикликләрә тәкан верәҹәк: “Дүнјанын ән бөјүк дөвләтләриндән бириндә, ән өнәмли мүсәлман дөвләтләринин бириндә халг һакимијјәти имканы јараныб, диктатура деврилиб, һакимијјәтдән кәнарлашдырылыб. Мән бу һадисәни чох мүсбәт дәјәрләндирирәм”.
Диггәт: Хәбәрдән истифадә етдикдә мәбәјә истинад лазымдыр
