Мүсаһибимиз политолог Зәрдүшт Әлизадәдир.
- Зәрдүшт бәј, Президентин коррупсијаја гаршы мүбаризәјә башламасына неҹә бахырсыз?
- Ҹидди нијјәтли тәдбирләр олмајаҹаг. Кичик адамлары ҹәзаландыраҹаглар, амма дөвләт
башчысынын рәһбәрлик етдији бөјүк коррупсија системи тохунулмаз галаҹаг. Бу онларын әсас мәгсәдидир. Дөвләти, вәтәни гарәт етмәк нијјәтиндән онлар һеч вахт ҝери чәкилмәзләр.
- Мүхалифәт дејир ки, һөкумәт коррупсијанын гаршысыны алмаг үчүн ислаһатлар кечирмәлидир. Ислаһат дејәндә онлар нәји нәзәрдә тутурлар?
- Онлар һакимијјәтдә оланда һеч бир ислаһат кечирмәдиләр. Одур ки, һакимијјәтә ислаһат кечир дејәндә, һакимијјәтә аҹыг вермәк истәјирләр, һакимијјәти тәнгид едирләр, онун ҹәмијјәт арасындакы мөвгејини сарсыдырлар, амма бу сәмәрәсиз бир иш олур. Әлбәттә, ислаһатлар кечирилмәлидир, амма бизим һакимијјәт ислаһатлара ҝетмәз.
- Саакашвили коррупсија илә мүбаризә апаранда бизим мүхалифәт ону тәрифләјирди, амма Илһам Әлијев мүбаризә апаранда нијә она дәстәк олмурлар?
- Саакашвили коррупсијаја гаршы ҝерчәк мүбаризә апарырды, бизим һакимијјәт исә ҝөрүнтү јарадыр. Саакашвилинин вахтында Назирләр Кабинети нечә дәфә дәјишди, амма биздә Назирләр Кабинети дәјишмәз олараг галыр. Олигарх назирләрдир, бүдҹәдән ајрылан вәсаити мәнимсәјирләр. Јенә дә дејирәм, президентин коррупсија илә мүбаризә апармаг нијјәти јохду. Бу, ҝөрүнтү јаратмаг үчүн атылан бир аддымдыр.
- Медиа, ГҺТ-ләр нијә дәстәк вермирләр?
- Һакимијјәтин гәзәтләри дәстәкләјирләр, шәрһ верирләр. Амма мүхалифәт гәзетләри вә мүстәгил гәзетләр бу ишә шүбһәли бахырлар. Бир нечә игтисадијјатла мәшғул олан ГҺТ-ләр вар ки, онлар коррупсија системини арашдырырлар. Онлара президентин коррупсијаја гаршы мүбаризәјә башламасы лазым дејил ки, бу ишдә өзләрини ҝөстәрсинләр. Онлар коррупсијаја гаршы мүбаризә апарырлар. Рәна Сәфәрәлијеванын, Азәр Меһтијевин, Рөвшән Ағајевин, Губад Ибадоғлунун вә Вүгар Бајрамовун рәһбәрлик етдикләри ГҺТ-ләр вар ки, онлар һәгигәтән коррупсија илә мүбаризә апарырлар.
- Зәрдүшт бәј, өлкәдә коррупсијанын олмамасы кимләрә сәрф едир?
- Коррупсијанын олмамасы халга сәрф едир, олмасы исә коррупсијадан фајдаланан һакимијјәтә сәрф едир. Һалал зәһмәтлә јашајан инсанлара коррупсијанын олмамасы лазымдыр, онлар истәјирләр зәһмәтләри дүзҝүн гијмәтләндирилсин.
