Әһли Бејт -АБНА- хәбәр аҝентлијинин вердији хәбәрә әсасән: Мөвсүм Сәмәдовун вәкили Анар Гасымов билдириб: Азәрбајҹан Ислам Партијасынын һәбс олунмуш лидери Мөвсүм Сәмәдовун 3 ајлыг һәбс гәти-имкан тәдбири, ев дустаглығы илә әвәз олуна биләр.
Онун сөзләринә ҝөрә, артыг бунунла бағлы Нәсими Рајон Мәһкәмәсинә мүраҹиәт олунуб. “Нәсими Рајон Мәһкәмәсинә Мөвсүм Сәмәдовун барәсиндә сечилмиш һәбс гәти-имкан тәдбиринин ев дустаглығы илә әвәз олунмасы барәдә вәсатәт вермишәм. Бу мәсләјә јахын ҝүнләрдә бахылаҹаг вә чох ҝүман ки, биринҹи ҝүн мәһкәмә просеси олаҹаг. Үмүд едирик ки, мәһкәмә бизим вәсатәтимизә мүсбәт ҹаваб верәҹәк”-дејә вәкил Анар Гасымов билдириб.
Азәрбајҹан Ислам Партијасынын һәбсдә олан сәдри Мөвсүм Сәмәдовун һазырда сәһһәтинин нормал олдуғуну билдирән Анар Гасымов, “Мөвсүм Сәмәдовла мүтәмади олараг ҝөрүшүрәм вә сәһһәти нормалдыр. Һеч бир ишҝәнҹә вә ја бу кими һаллара јол верилмәјиб. Әһвал-руһијјәси дә јахшыдыр. Јанында өзүндән әлавә 3 нәфәр дә һәбс олунан сахланылыр. Кечән һәфтә мүхалифәт гәзетләри истәсә дә, Мөвсүм бәјә бу гәзетләри вермәјибләр. Дејибләр ки, бәс бура анҹаг рәсми гәзетләр ҝәлир. Ону да гејд едим ки, Мөвсүм бәј, рәсми иттиһамлары гәбул етмир. Мәсәләјә мәнәви бахымдан јанашдыгда исә һәбс олунмасына Аллаһын мәсләһәти кими бахыр вә буну илаһи ҝөстәриш кими гәбул едир. Дејир, белә олмалы имиш, белә дә олуб”-дејә вәкил гејд едиб.
Диггәт: Хәбәрдән истифадә етдикдә мәбәјә истинад лазымдыр
